BIMBINGAN PEKAN KELUARGA WARI SIPETELUKEN

BIMBINGAN PEKAN KELUARGA WARI SIPETELUKEN

THEMA:DEWASA IBAS PERPULUNGEN

Ogen : 2 Raja-Raja4 : 8-13

Khotbah : Heber12 :3-11

Pdt. Maria E br Sitepu

A.     Penjelasan Teks

-          2Raja-Raja 4:8-13

Adi siidah struktut kitab 2 raja-raja, emakana banci siidah kitab 2 raja-raja enda ibas pasal  1-13, nurikenca dahin sekalak nabi nandangi raja bagepe kalak Israel ras kalak Yehuda khususna nabi Elia ras Elisa.

Ibas bahan pengogennta enda, kita labo secara khusus nuriken perdalanen Nabi Elisa ntah pe dahinna tapi kita ngerana erkiteken sekalak diberu sunem si ngelakoken hal si luar biasa nandangi Nabi Elisa engkai ?

1.       Diberu Sunem enda kalak bayak (ayat 8)

Enda sada hal si luar bisa erkiteken adi siidah gundari jarang kal kalak bayak nggit nenahken kalak kurumahna guna man, tapi enda ilakoken diberu sunem enda nandangi nabi Elisa

2.       Diberu Sunem enda lenga bo tandaina nabi Elisa (ayat 9)

Nenahken kalak kurumahta biasana siibahan nandangi kalak si nggo itandai kita tapi diberu sunem enda merubah si e kerina arah perbahanenna nandangi nabi Elisa

3.       Diberu sunem enda ngatakenca Nabi elisa eme dilaki badia (ayat 9)

Penggelaran dilaki Badia enda labo sembarangen, tapi diberu sunem enda meteh bahwa Nabi Elisa eme nabi, enda cidahken uga Diberu sunem enda erninsa nabi Elisa alu kacamata kiniteken labo alu kacamata biasa.

4.       Diberu Sunem enda mperlengkapi kerina kebutuhan Nabi Elisa sangana tading irumahna (ayat 10)

Jadi labo terjeng man saja, tapi kerinana iperlengkapina nandangi nabi Elisa, hal si luar biasa nginget Diberu Sunem enda lenga bo tandaina nabi Elisa

5.       Diberu Sunem enda la ngarapken kai pe ibas kerina si ibahanna nandangi nabi Elisa (ayat 13)

Biasana adi kalak erbahan mehuli janah si isampati kita ndai mereken penampat mulihken jarang kita la nggit ngalokenca, tapi diberu sunem enda teridah ketutusenna ras kininggitennaguna nampati erkiteken kai pe la iarapkenna janah la ipindona.

-          Heber12:3-11

Kitab heber eme salah sada kitab si lit ibas padan simbaru si ngasa gundari adi ngerana kita masalah  ise si nulisa lenga bo jelas ras sangana mengalami perdebatan ibas ahli-ahli, erkiteken kitab enda labo secara tangkas nurikenca ise si nulisa. Melala kemungkinan erkiteken penulis kitab enda, lit si ngatakenca Paulus tapi erkiteken cara nulis ras isi labo bagi tulisan Rasul Paulus emakana lenga bo banci jadi patokan maka Rasul Paulus si nulisa kitab enda.

Tapi si pasti kitab enda itujuken man kalak Yahudi sisanganan ngenanami perbeben si mesangat, gelah arah surat enda perpulungen reh megegehna kinitekenna man Yesus.

Emakana salah sada cara siilakoken penulis eme ngingetken man perpulungen erkiteken kai si nggo ibahan Tuhan Yesus nandangi dirinta.

Hal sienda me banci siidah ibas bahan pengogennta ibas kitab Heber 12:3-11 uga penulis ngingetkenca mulihken pengorbanan si nggo ilakoken Tuhan Yesus man banta.  Janah alu bage iarapken penulis gelah perpulungen ngasup guna ngaloken perbeben enda, erkiteken perbeben enda eme cara Dibata guna didik anak-anak gelah anak-anakna ngasup seh ku kedewasaan erkiniteken man baNa.

B.      Aplikasi

Emakana nggo me cukup tangkas situhunna adi kita ngerana kita masalah temanta eme “Dewasa ibas perpulungen” arah 2 bahan pengogennta enda, si pertama lebe ngajari kita ersikap ibas kita lit itengah-tengah perpulungen. Diberu sunem cidahken uga si harus ilakoken kita ibas tengah-tengah perpulungen si mungkin aminna la si itandai ntah pe la bagi ukurta tapi keleng ate si iajarken Yesus Kristus harus tetap si lakoken. Janah sipeduaken uga penulis ibrani nurikenca kemungkinan-kemungkinan si banci jadi man banta ibas kegeluhenta itengah-tengah perpulungen eme suka ras duka, tapi kerinana enda eme cara siipake Dibata guna ngajari kita gelah lebih dewasa ibas kegeluhen i tengah-tengah perpulungen.

Emakana adi ngerana kita uga dewasa ibas perpulungen, 2 hal ngenca :

1.       Cidahken keleng ate siajarken Tuhannta

2.       Gengken kerinana erkiteken e cara Dibata mperlengkapi kita.