PEKAN KELUARGA WARI/BERNGI IV

 PEKAN KELUARGA WARI/BERNGI IV

KAMIS 23 NOVEMBER 2016

THEMA : ERLAJAR EME KERIAHENKU

Invocatio : Kuan-Kuanen 19 : 20

Ogen : Heber 6 : 1 – 5

Renungen : Masmur 119 : 12 – 18

-          Pengantar

Adi ngerana kita masalah erlajar, maka si pertama lebe harus kal sipahami erlajar eme proses. Engkai maka enda perlu? Erkiteken enterem kita erpengarapen adi nggo kita erlajar mis harus sieteh kai si man pelajaran enda. Payo. Tapi inget labo kerina pelajaren banci siidat ibas kita pas erlajar. Tapi bagi siarah lebe ndai mungkin ibas sada paksa lenga bo tentu mis sidat kerina tapi ibas proses kegeluhen kai sipelajari e banci sidat maknana.

Janah sipeduaken adi ngerana kita masalah erlajar, erlajar enda me proses guna merubah ibas hal si la sieteh jadi sieteh, emakana adi lit kalak erlajar la lit progress e perlu jadi penungkunen bas kita.

Emakana ibas berngi si peempatken enda, kita iajuk guna mulihken erlajar, tapi erlajar alu keriahen labo bagi sisedekah enda sipikirken adi ningen erlajar e konsep sipikirken kita pasti, latih, ndekah, membosankan rsdna kerina. Erkiteken adi sipergermetken reh rusurna kita erlajar reh tehna kepeken melala la sieteh ibas doni enda. Ibas

-          Heber 6 : 1-5

Adi ngerana kita masalah kitab heber enda, melala situhuna perdebatan ibas surat enda, erkiteken penulis ras tujun surat enda. Melala kalak erpengakap surat enda itulis Rasul Paulus, tapi adi sinin gaya bahasa siipake lenga bo tentu rasul Paulus sinulisa, janah adi rasul sideban pe sikataken ntah timotius, barnabas lenga bo lit bukti si cukup kuat guna ngatakenca ia me sinulisa Kitab enda. Erkiteken adi siperdiateken kitab ibrani enda, kitab enda berbeda ras kitab ntah pe surat sideban erkiteken biasana adi surat iawali alu perkenalan kalak sinulisa surat ndai tapi ibas ibrani enda banci sinin ibas Ibrani 1:1-2, la nuriken ise pe si nulisa kitab enda.

Janah adi tujun penulisan surat enda pe lalit teridah bas surat enda, tapi melala kalak si tek surat enda ialamatken nandangi kalak berkiniteken ibrani.

Adi siidah bahannya ibas bagin ibrani sipeenamken, erkaiten ras tema ibas pekan sipeempatken enda, maka banci siidah penulis kitab ibrani ngerana :

1.      Perlu lit peningkaten ibas keinginannta guna erlajar (ayat 1)

2.      Perlu lit hal simbaru sipelajari ibas kita ate erlajar. Ula e lalap si man pelajaren. Memang adi siidah ibas ayat 2, 6 hal sikataken penulis kitab enda penting, tapi ula kita lalap ije ngerana. Perlu lit kemajun.

3.      Peningkaten ntah kemajun enda bage peraten Dibatalah (ayat 3)

Maksud jenda gelah ula kita terkesan erlajar enda gelah maju saja tanpa pengertin, emakana perlu kita rukur apakah kita maju erkiteken Dibata nggo mereken kita dalan gelah maju ntah kita si ate maju.

4.      Erlajar enda sipake guna kiniulin nandangi enterem kalak (ayat 4-6)

Emakana banci siidah uga kitab Ibrani enda nuriken pentingna erlajar gelah kita reh majuna bagepe gelah reh mbagesna penandainta erkiteken Dibata. 

Janah uga kin situhunna cara erlajar gelah tuhu-tuhu jadi sada keriahen ntah pe jadi sada kebiasaan nandangi dirinta bagepe nandangi jabunta erlajar enda :

-          Masmur 119:12-18

Mazmur enda masuk ibas masmur pengajaren. Ibas bagin enda, pemasmur nuriken uga kemerhatan pemasmur guna erlajar arah Dibata nari. Uga carana :

1.      Turahkan rasa merhat erlajar

Enda biasa jadi masalah kalak erlajar, melala kalak erlajar labo erkiteken keinginan tapi keinginan kalak ntah keluarga. Hal sienda penting kal ipahami gelah ula anak ntah pe keluarganta lanai bagi kai siisura-surakenna tapi bagi kai siisura-suraken kita.

2.      Biasaken kai sipelajari enda mis sipakeken ibas tengah geluhta

Enda sijarang terjadi ibas kita erlajar. Pelajaran sipahami kita enda melala tading bas takalta ngenca lanai terdalanken jadi banci kataken e jadi konsumsi pribadinta ngenca. Erlajar jadi menarik adi kai sipelajari e berguna man diri bagepe man kalak.

3.      Kai pe sipelajari meriah ukurta

Melala kalak kai siatena ipelajari si bagi sura-surana ngenca, adi la ia sor, seh ndigan pe la ia nggit mpelajarisa. Inget pelajaran enda lalit si la berguna.

4.      Erlajar harus ka i maknai ibas perdalanen geluhta.

Enda ka tole si biasa terjadi ibas konsep erlajar. Erlajar enda sipertama subjekna eme dirinta.

5.      Ibas kita erlajar sipertama lebe endesken dirinta man Dibata gelah kita ngasup guna erlajar ras muat simehuli ibas kai si pelajari kita.

-          Aplikasi

Erlajar eme keriahenku situhunna adi siidah ibas 2 bahan pengogennta enda, mulihken kukita ntah dirinta. Adi memang erlajar enda ate jadi keriahen ertina harus lit sada motivasi si mehuli si turah ibas dirinta ibas kita erlajar enda. Erlajar enda bagi siarah lebe ndai eme proses, emakana erlajar perlu kesadaran situhu-tuhu ibas dirinta gelah kita banci maju. Adi erlajar guna gaya, ntah pe gelah idah kalak banci kita kecewa tapi adi erlajar kita guna dirinta ras kalak sienterem ugapape meserana siman pelajaren Dibata pasti nampati kita.

Emakana marilah siajuk diri, keluarga ras temannta guna erlajar ibas segedang-gedang geluhna gelah kepentaren, hikmat jadi sikerajangenna.