BIMBINGEN PJJ TGL 13-19 NOVEMBER 2016

BIMBINGEN PJJ TGL 13-19 NOVEMBER 2016

THEMA:RAJA PENAMPAT SINGUBAHKEN GELUHTA

BAHAN : Yesaya 9 : 1-7

Pdt. Maria E br Sitepu

-          Penjelasen Teks

Tentuna adi kita ngoge bahan enda, si pertama lebe turah bas perukurennta enda me nubuaten erkiteken kerehen mesias. Memang adi biasana bahan enda ipake guna ncidahken uga mesias si reh ibas padan Simbaru, nggo mbarenda nari ibas zaman nabi-nabi nggo inubuatken. Tapi labo lit salahna adi kita ernin situasi si erbahanca nabi Jesaya nuriken nubuat enda nandangi bangsa Israel.

Ibas paksa sie, Bangsa yehuda sangana hancur ras mbue kalak mate erkiteken serangan Raja arama ras raja Israel Utara. (bnd 2 Kronika 28:5-8).[1] Hal sienda erbahanca Raja Ahas ras Kalak Yerusalem mbiar (bnd 7:2), tapi ibas kebiarenna e, raja Ahas labo mindo penampat ku Dibata melainkan pindona penampat man Raja Asyur (bnd 2 Kronika 28:16-21). Tapi hal si enda labo erbahanca persoalan si e dung tapi Raja Asyur malahan menyerang balik bangsa Yehuda.

Ibas situasi si bagenda rupana me nabi Jesaya reh guna ngajuk raja Ahas ras bangsa Yehuda gelah erpengendes man Dibata saja. Erkiteken bagi padan Dibata ndube nandangi Daud (bnd 2 Samuel 7:12-16), labo lit si banci ibas takhta kinirajanndu adi la kesusurenndu (kesusuren Daud). Tapi erkiteken kebiaren raja Ahas, emakana pindona tanda man nabi Jesaya janah ibas Yes 7:14-17 tanda e icidahken nabi Jesaya (Raja hizkia anak raja ahas).

Bagi kerina nubuat siterjadi. Labo terjeng gundari saja tapi seh ibas wari si reh epe nubuat enda tetap lit. sekalak raja si gundari enda si tandai arah diri Tuhanta Yesus Kristus ia me raja si nubuatken nabi Jesaya nandangi bangsa Israel simbaru (kita). Janah adi siperdiateken ibas bahan enda, lit empat gelar sibereken nabi Jesaya nandangi penampat enda :

1.      Penampat si meganjangna

2.      Dibata Si mada kuasa

3.      Bapa si rasa lalap

4.      Raja Dame

-          Aplikasi

Raja penampat si ngubahken geluhta eme tema PJJ ibas minggu enda. Ibas bahan pengogenta kepeken Dibata nggo rencanakenna sekalak penolong siluar biasa nandangi perpulungen. Penolong si banci mereken kemalemen ate, keriahen ukur, ketenangen, kedamen ras sidebanna kerina. Si e kerina ngasup guna merubah kegeluhennta kuarah si mehulina. Gundari tergantung kita, nggit ntah lang Raja e reh man dirinta guna perubahi dirinta ku siarah mehuli. Ntah ateta bage-bage kita lalap. Gundari iendesken man kita me keputusan enda. Lang ntah oe kita nggit iubahken.

---

[1] Hal sienda terjadi erkiteken raja ahas la nggit bekerja sama ras dua raja enda guna ngelawan raja Asyur si atena memperluas wilayah kekuasaannya. Jadi serangan enda gelah raja ahas banci nusur ibas kinirajanna igantiken sekalak anak tebeel (bnd 7:6)