BIMBINGEN KHOTBAH PEKAN KELUARGA WARI/BERNGI VI

BIMBINGEN KHOTBAH PEKAN KELUARGA WARI/BERNGI VI

JABU SIERADVENT

Invocatio : Miha 5 : 2

Ogen : Jesaya 11 : 1 – 9

Renungen : Matius 1 : 18 – 25 

Pdt. Maria E br Sitepu

-          Pengantar

Ribas enda gelarna grup musikna. Salah sada grup music si cukup terkenal ibas zamanku bagepe ibas judul lagu si rusur lalap kuinget eme “Menunggu ternyata menyakitkan”. Menunggu entah nimai ibas bahasa karona, melala kalak erpengakap enda me dahin si paling membosankan. Tapi pernahkah kita rukur engkai maka nimai e membosankan? Tuhu kin ia membosankan ntah erkiteken opini kalak maka siakap membosankan.

Engkai maka bage ningku, enterem jelma si gundari ngerana hal si la pernah ilakoken bahkan si parahna labo terjeng ngerana tapi ia menilai hal si la pernah ilakokenna.

Emakana engkai maka menunggu e membosankan ?

-          Erkiteken ibas menunggu e lit harapan adi lalit man kai kita nimai. Erkiteken harapan enda me maka maun-maun menunggu e membosankan

-          Erkiteken enterem kalak ibas menunggu sinik ntah la kai pe banna.

-          Erkiteken ibas menunggu lit janji si erbahanca nimai e membosankan.

tapi ibas kalak Kristen, nimai enda nggo jadi sada kewajiban penting, adi istilahna menunggu enda membosankan tapi harus ilakoken. Maun-maun arah si enda, Dibata menguji bangsana tutus ia ntah lang nimai janji ntah pe padan si berekenna man banna. Hal sie banci siidah ibas :

1.      Janji Tuhan man Abram nandangi kesusuren banci jadi bangsa si besar, adi la kusilap berhitung kurang lebih 400 tahun maka igenapi

2.      Janji Tuhan man Bangsa Israel ibaba ku tanah perjanjian adi la kusilap 40 tahun ndekahna epe alu kiniseran si mesangat nandangi bangsa Israel

3.      Janji Tuhan guna Mesias ibas bahan enda  

-          Jesaya 11 : 1-9

Ibas pasal 11 enda, Nabi Jesaya nuriken uga pengharapan bangsa Israel nandangi kerehen Mesias kutengah geluh bangsa Israel. Engkai maka e terjadi, erkiteken ibas paksa si e kinirajan Israel nggo getem ntah pe hancur. Emakana Tuhan arah nabi Jesaya janjiken sekalak mesias nandangi bangsa Israel. Uga kin mesias enda :

1.      Ibas ayat 2-9 nggo cukup tangkas uga mesias e reh pagi luar biasa kal. Kerina tinepa Dibata subuk si nggeluh bagepe si la nggeluh datken keriahen bagepe kiniulin ibas kerehen mesias kudoni enda.

2.      Ibas ayat 1, ituriken pereh Mesias enda bagi tunas siturah ibas tongkeh nari. Uga kin enda :

-          Adi siperdiateken adi gelarna tunas reh ibas tongkeh nari, me ertina tongkeh harus itabahi maka banci ndarat tunas ndai.

-          Tunas enda seh kari galang memerluken waktu sicukup ndekah. Emakana perlu kesabaran kita guna nimai kerehen mesias  e.

Emakana bagenda me padan sibereken nabi jesaya nandangi bangsa Israel, gelah tetap setia ibas nimai kerehen mesias guna nampati. 

Janah adi si nin ibas bahan pengogennta sipeduaken ibas :

-          Matius 1:18-25

Cerita enda nuriken uga Tuhan Yesus tubuh kudoni enda, arah jabu ntah keluarga si mbaru eme keluarga Yusuf ras maria. Adi sinin hubunganna ras bahan pengogennt sipemena, uga ndekahna antara pada sibereken Dibata ku nabi Jesaya erkiteken Mesias ras penggenapan si terjadi. emakana lit piga hal kita perlu erlajar arah bahan enda ikaitken ras bahan sipemena :

1.      Waktu

Menunggu pasti lit waktu, Cuma persoalanna waktuna ndigan e Dibata ngenca metehsa. Tugas ras tanggung jababta eme nimai tanpa junggut-junggut.

2.      Kesabaran

Adi gelarna menunggu pasti me kita butuh kesabaran. Erkiteken si biasa terjadi ibas kegeluhen enda, ibas kita paksana nimai pasti lit persoalan sir eh kubas kegeluhennta. Bahkan mbuen asangken si biasa sinanami. Emakana enda pe perlu sipegejap-gejap.

3.      Gambaran cerita sipeduaken situhunna gambarken bahwa mesias enda banci reh ibas cara ras gaya si la sisangka-sangka. Emakana perlu kita megermet. Adi biasana kalak menunggu, pasti sanga menunggu enda pikirkenna kira-kira gua kin model kalak si reh enda. Tapi hal enda banci erbahan kita kecewa.

-          Aplikasi

Jabu Sieradvent. Enda sada pendilo man kita, gelah kita jadi jabu Kristen si tetap lit pengarapennta guna nimai kerehen Tuhan Yesus Kristus. Ugapape kemewahan, kenyamanan, kenikmatan si nggo tawarken doni enda man banta, kerina si e la banci naluken keriahen si nggo padanken Tuhan ibas kerehen Yesus sipeduakaliken. Emakana marilah kita tetap sabar, megegeh ras ngasup guna bengket kubas minggu advent-adventta enda, janah marilah simaknai minggu advent enda labo terjeng guna nimai kerehen Tuhan Yesus, tapi guna jadi minggu guna kita berefleksi ibas kai nggo silakoken ibas kita nimai kerehen Tuhan Yesus sipeduakaliken.

Aku ngutip salah sada pemotivasi ibas Indonesia enda, bagenda nina “Menunggu memang pekerjaan yang membosankan, tapi lebih membosankan lagi kalau tidak ada yang ditunggu”