PEKAN KELUARGA WARI I

 PEKAN KELUARGA WARI I

MINGGU 20 NOVEMBER 2016

THEMA : KEGELUHEN ENDA DESKEN PERDALANEN

Invocatio : 1 Samuel 2 : 26

Ogen : Kolose 2 : 6 – 10

Renungen : Bilangan 9 : 15 – 23  

Pdt. Maria E br Sitepu

-          Pengantar

Hidup adalah Proses. Pemahaman si enda si pentingna kal harus sipahami ibas kegeluhennta. Enterem kalak erpengakap kesuksesan ntah pe keberhasilen kegeluhen sekalak jelma iidah arah hasil si idatkenna ibas kegeluhenna subuk :

1.      Materi

2.      Anak

3.      Jabu

4.      Rsdna kerina

Memang payo labo si salah, tapi adi kita ngerana masalah hasil ngenca, kita banci terjebak ibas sada pemahaman ugapape asal dat. Enda pemahaman si salah. Bagi sekalak anak kecil sangana ibas persekolahan, enterem orang tua si erpengarapen gelah anak e datken hasil si mejile ibas persekolahenna jadi angka ntah pe ponten 10/100 jadi harga mati nandangi anak. Hal si enda berakibat kerina cara ipake anak gelah datken hasil bagi kai siisura-suraken orang tuana. Jadi hasil kal si pentingna proses e nomor 2.

Tema Pekan si pemena kita eme “Kegeluhen enda desken Perdalanen”. Adi sipahami tema enda, situhunna banci sipergemetken kepeken labo masalah seh kita bas sada ingan ibas perdalanennta tapi lit hal-hal si penting si perlu si pelajari ibas mencapai hal si e, maun-maun ibas sada perdalanen lalit si mulus-mulus saja, banci ka lit persoalan ntah pecah ban, ntah ngadi ka kita man rsdna kerina. Hal enda cidahken uga kegeluhenta ka pe la terjeng hasil tapi ibas memperoleh hasil e lit proses si harus idalani guna mencapai si e.

Ibas bahan pekannta enda, 2 bahan pengogennta ngerana :

-          Bilangan 9 : 15-23

Bahan khotbahta enda, nuriken uga perdalanen bangsa Israel ndarat tanah mesir nari kutanah perjanjian (kanaan). Ibas perdalanen enda kepeken Dibata tetap mereken penampat nandangi bangsa Israel eme embun api.

Embun api enda, bagi bangsa Israel ibas paksa si e, ncidahken tanda kerehen Dibata nandangi bangsa Israel ibas perdalanen. Ija ibas berngi gelah ula mbergeh ras adi suari gelah ula melas. (ayat 15-16)

Selain sebagai tanda kerehen Dibata, embun api enda pe menjadi tanda nandangi bangsa Israel lawes ntah pe tading ibas sada ingan (ayat 17-18). Jadi banci kataken perdalanen bangsa Israel ibas paksa si e tergantung ras embun api ndai.

Menurut logika si gundari adi kita erdalan mulai mesir nari seh kutanah perjanjian ntah pe Israel alu kecepatan normal (erdalan) enda banci itempuh alu waktu 2-3 bulan ngenca, tapi adi siidah ibas peristiwa bangsa Israel lawes tanah mesir nari kutanah perjanjian menam 40 tahun waktu siipakena. Hal si enda kemungkinen terjadi erkiteken bangsa Israel ibas bahannta banci tading sada wari saja (ayat 21) ntah piga-piga wari (ayat 20) ntah piga-piga bulan dekahna (ayat 22). jadi tuhu-tuhu Dibata nentuken perdalanen bangsa Israel enda (ayat 23).

Jadi banci teridah labo terjeng naruhken bangsa Israel kutanah perjanjian ngenca, tapi Tuhan mpesikap bangsa Israel sope masuk kutanah perjanjian (ayat 19). Janah adi siidah ibas :

-          Kolose 2:6-10

Bagin enda nuriken uga nasihat rasul Paulus nandangi perpulungen Kolose sisangana ibas paksa sie lit pengajaran-pengajaran sesat si terjadi ibas perpulungen kolose. Ibas kejadin si bagenda rupana luar biasa kal kai nasihat Rasul Paulus nandangi perpulungen.

1.      Tetap ngaloken ras tetap ibas Yesus

Rasul Paulus ngajuk ugapape pemahaman si lit si banci encedaken perpulungen tapi tetaplah ibas Yesus. Erkiteken si erbahanca kita ngasup ntah pe megenggeng ibas ngaloken kerina sireh kubas geluhta

2.      Rurat ibas Yesus, ibangun ibas Yesus, reh teguhna begepe tetap hati-hati ibas kai-kai saja pengajaren si la mehuli

3.      Kesempurnaan ras kebenaran situhu-tuhu eme Yesus Kristus

-          Aplikasi

Emakana bagi temanta sendah “Kegeluhen enda desken Perdalanen” bagi sekalak pernah nuriken uga kegeluhen enda bagi perdalanen eme :

1.      Kita banci mentasi kerina ingan ras mungkin terjadi perubahan rencana ibas sada paksa bagepe banci terjadi hal si la bagi ukur ibas perdalanen geluhta.

2.      Tangtangna kita erdalan ibas kegeluhen enda, siakap orangtuanta banci seh rasa lalap ras kita, tapi kepeken ibas sada paksa nggo ka ia harus nusur bas sada ingan janah kita harus tetap ngelanjutken perdalanennta tanpa orang tua

3.      Janah masuk ka sideban sinemani kita ibas perdalanen, subuk perbulangen, ndehara, anak ras kempu, tapi banci saja ka sinemani kita enda nusur ka ibas ingan sideban.

Emakana situhuna labo masalah ise jadi temannta ibas perdalanen geluhta enda, tapi siperlu sipikirken katawari kin kita banci nusur ntah pe ngadi ibas perdalanen enda. Emaka :

1.      Jadilah kita kalak si mehuli ibas perdalanen geluh enda

2.      Sitadingkenlah si mehuli nandangi si nerusken perdalanen geluhna si sedekah enda jadi temannta ibas perdalanen geluhta

3.      Tuhan saja nge jadi Nakhodanta ibas perdalanen geluh enda, segelah kai pe terjadi ibas perdalanen geluh enda ngasup kita ngalo-ngalosa.