BIMBINGEN MORIA Tgl 06 - 12 November 2016

BIMBINGEN MORIA Tgl 06 - 12 November 2016

Thema : PERSEMBAHEN SI ERBUAH

Siman Ogen2 Korinti 9 : 6 - 11 

Pdt. Maria E br Sitepu

-          Penjelasen Teks

Kitab enda eme surat si peduaken siitulis rasul Paulus nandangi perpulungen i korinti. Ibas bagin enda, ituriken Paulus uga kin situhunna mereken persembahen. Tentuna persembahan si imaksudken enda, labo guna rasul Paulus ntah pe titus ras senina si nggo leben reh (ayat 1-5), tapi adi siidah ibas 1 Korinti 16 : 1-4, sen si ipepulung perpulungen i korinti guna nampati

pembagunan gereja i Yerusalem. Hal si enda ilakoken Paulus, erkiteken ietehna kai situasi si terjadi i Yerusalem, ija kalak Kristen i Yerusalem sangana itindas ras kemungkinen lit terjadi bencana kelihen ibas Yerusalem.

Emakana erpengarapen Rasul Paulus gelah perpulungen i korinti nggit nampati teman-temanna i Yerusalem.

Ibas bagin pengogennta enda, Paulus mereken piga-piga pedah ibas kita mereken persembahennta :

1.      Ayat 6, bagin enda nuriken uga persembahen si bereken kita enda, memungkinkan kalak sideban guna ikut ngejapken pasu-pasu Dibata.

2.      Ayat 7, ncidahken uga adi kita mere, berekenlah bagi kai si nggo tetapken ibas  ukurta.

Kata ukur siipake rasul Paulus jenda, imaksudken gelah kalak Korinti ula makeken logikana guna mere man perpulungen Yerusalem. adi pakena logikana, maka tentuna melala si la setuju guna mereken penampat nandangi kalak si la tandaina. 

3.      Ayat 8-11 nuriken uga Dibata nggo seh kal luar biasana mereken pasu-pasu man banta. Janah adi kita ngikutken kai sikatakenna erkiteken mereken persembahen, maka mulihna man banta luar biasa. Tapi harus tetap siinget alu tutus ras ukur meriah.

-          Aplikasi

Persembahen sieteh eme pengataken bujurta nandangi Dibata erkiteken kai singgo ibahanna nandangi kita. Tapi masalahna labo terletak ibas sie, tapi terletak ibas kesadaran kita ernin pasu-pasu Tuhan. Melala kita mereken persembahen erkiteken siakap pasu-pasu Dibata e kitik ngenca reh kubas kegeluhennta. Padahal adi siukuri seh ngasa gundari pasu-pasu Dibata e seh kal mbuena. Tapi rusur kita lalap mbiar.

Emakana ibas bahan morianta enda, iajuk man moria gelah mereken persembahen si terbaik rikutken pasu-pasu Tuhan si nggo reh kubas kegeluhennta. Gelah arah persembahenta enda, kalak sideban pe banci ngejapken pasu-pasu Dibata.