BIMBINGEN KHOTBAH 20 NOPEMBER 2016

BIMBINGEN KHOTBAH 20 NOPEMBER 2016

MINGGU PENDUNGI TAHUN GEREJA

THEMA:MEGEGEH IBAS TUHAN

Invocatio : 1 Korinti 15 : 10

Ogen : Masmur 46 : 1 – 12

Renungen : Kolose 1 : 11 – 20

-          Pengantar

Ibas piga minggu kubelakang enda, situhunna melala hal si menarik si banci jadi pengalamennta erkiniteken khususna ibas negaranta enda. Demo si terjadi ibas piga wari silewat nadingken piga-piga refleksi si luar biasa :

1.      Ibas salah sada stasiun televisi swasta lit wawancara nandangi sekalak tokoh agama si ngerana erkiteken salah sada tokoh si sangana gundari enda bagi artis si naik daun.

Sitik kukutip kai sibelaskenna menarik kal nina “keluargana pe ibas etnis enda si A enda tapi nggo ikut ia, kari si A mbera-mbera ngikut agama si tokoh ndai” kurang lebih bage nina kata tokoh agama ndai.

2.      Ibas salah sada pemberitaan ka, lit sekalak tokok politik mindo man artis A enda gelah pindah agama segelah ia banci terpilih ibas jabatanna si sangana ijemakna.

3.      Rsdna kerina.

Ngerana masalah enda situhunna labo lit tendensi penulis ibas kejadin enda, tapi selaku kalak si beragama khususna Kristen, memang hal si enda erbahanca kinitekennta sangana iuji alu berbagai macam cara. La sieteh kai kin situhunna maksud ibas si e kerina, tapi perlu ka kejadin si sangana terjadi enda jadi refleksi kita ibas kinitekennta sedekah enda.

Ibas minggu enda, eme minggu si igelari minggu pendungi tahun gereja, 2 bahannta ngerana masalah uga kita selaku kalak si erkiniteken nandangi Tuhan (Yesus Kristus) ngasup guna ngalo-ngalo kejadin si sangana nderpa kegeluhennta tep-tep  wari.

-          Mazmur 46 : 1-12.

Mazmur 46 enda, itulis ibas paksa bangsa Israel iserang Raja Asyur (Sanherib). Tentuna sieteh uga kin situasi si melanda kalak Israel ibas persoalan si bagenda rupana. Emakana pemazmur menaken bagin enda alu :

1. Ayat 2-4

Bagin enda ngerana uga Dibata eme Allah si luar biasa si tetap nampati kita ibas situasi si ugapana pe. Istilah si ipake guna ncidahken mbelinna kuasa Dibata banci siidah ibas ayat 3-4. Enda ncidahken uga kuasa Dibata e, mbelinna asangken kerina kuasa si lit idoni enda termasuk kejadin-kejadin doni si la ngasup jelma nanggulangisa. 

2. Ayat 5-8

Ibas bagin enda, pemazmur nuriken alu penggambaran uga Dibata tetap setia guna nampati bangsana. Gambaran Lau Mbelin si ipake (Ibas Yerusalem lalit lau mbelin si mentasi Yerusalem) nuriken uga Dibata bagi “Kesegaran ibas kiniseran” jadi kai pe si nderpa bangsa Israel ibas paksa si e subuk persoalan politik, ekonomi rsdna labo erbahanca kebiaren nandangi kalak Israel. Erkiteken Dibata eme pertahanenta labo tembok Yerusalem.

3. Ayat 9-12

Ibas bagin enda, pemazmur ngajuk man bangsa Israel guna ernin kupudi. Nin uga penampat Dibata sedekah enda nandangi kegeluhenna. Janah ibas ayat 11. Istilah “Pengadilah” e banci ka iartiken “Tadingkenlah” kerina hal-hal si erbahanca kita lanai erpengendes man Dibata saja.

Jadi tuhu-tuhu bagin enda, nuriken uga situhunna sikap ras perbahanen si arus ilakoken bangsa Israel ibas persoalan si sangana nderpa ia gundari. Janah adi sinin ka ibas bahan pengogennta si peduaken :

-          Kolose 1 : 11-20

Adi siperdiateken ibas Kolose 1:1, sinulis surat enda eme Rasul Paulus ras Timotius, tapi kecendrungen si mbuena kal muat bagin ibas surat enda eme Rasul Paulus.

Surat enda ialamatken nandangi Perpulungen Kolose wilayah Frigia Propinsi Romawi I Asia Kecil. Ibas paksa itulis, perpulungen Kolose ngenanami persoalen erkaiten ras Pengajaran-pengajaran sesat si sangana berkembang ibas perpulungen Kolose. Pengajaren enda eme :

1. Ajaran si menekankan kegiatan-kegiatan si alu tegas mengatur erkiteken pangan ras inemen si banci ipake, janah ritual keagamaan (bnd Kolose 2: 16-17) ras erkiteken sunat (bnd Kolose 2: 11; 3:11).
2. Peraturan-peraturan si teridah badia tapi kepeken enda ibahan guna pribadi sekalak-sekalak janah ibadah enda pe melala larangan si arus idalanken (Bnd Kolose  2:21, 23)
3. Nembah man malaikat (Bnd Kolose 2:18)
4. Reh kurangna kepercayaan nandangi Kristus (Bnd. Kolose 1:15-20; 2:2-3:9)
5. Pemeteh erkiteken hal-hal si rahasi (bnd. Kolose 2:18)
6. Kepercayaan nandangi hikmat ras budaya manusia (bnd. Kolose 2:4, 8)
7. Pemuasan nafsu duniawi (Bnd. Kolose  2:23; 3:5)

Hal si enda me kerina si erbahanca Rasul Paulus nulis surat enda nandangi perpulungen i kolose.

Ibas bagin pengogennta enda, Paulus nuriken uga kin situhunna Kristus enda nandangi kegeluhen perpulungen Kolose :

1. Turiken Paulus, Kristus me si erbahanca kita megenggeng ibas kai pe si terjadi ibas kegeluhennta (Ayat 11-12)
2. Kristus me si erbahanca kita Pulah ibas dosa-dosannta (Ayat 13-14)
3. Kristus nggo nampati kita mulai ibas hal si kitik nari (ayat 16-17)
4. Kristus me si jadi usihennta (ayat 18-20)

-          Aplikasi

Emakana ibas minggu enda, tema si seh man banta eme “Megegeh Ibas Tuhan”. Adi kita ngerana masalah tema enda, situhunna lanai perlu si pegedang-gedang adi nggo bas Tuhan ugapape kita pasti megegeh. Inget istilah si ipake eme megegeh, ertina banci kataken persoalan ntah pe percuban labo mis bene ibas kegeluhennta tapi kita jadi ngasup guna ngalo-ngalosa alu pemikiran si positif. Melala kita ibas paksa gundari enda ibas situasi si banci kataken la menguntungken nandangi kita kalak si minoritas mindo penampat man tuhan gelah ipulahi ibas persoalen enda, tapi hal si enda erbahanca kita lemah lanai jadi manusia si megegeh, emakana ibas kai pe persoalen si reh kubas kegeluhennta sipindolah man Tuhan gelah tetap megegeh. Gelah kita sikap katawari paksa pe guna ngalo-ngalo kerina perbeben siugapana pe segelah ka pe kita jadi manusia si luar biasa erkiteken pergegeh si reh ibas Dibata nari.