BIMBINGEN KHOTBAH 13 NOVEMBER 2016

BIMBINGEN KHOTBAH 13 NOVEMBER 2016

KULANDU EME RUMAH PERTOTON KESAH SIBADIA

Invocatio : 1 Korinti 6 : 19-20

Ogen : Jesaya 38 : 1 – 20

Renungen : 1Tesalonika 5 : 23 – 24 

Pdt. Maria E br Sitepu

-          Pengantar

Sehat tentuna salah sada harapan kalak ibas kegeluhen enda. Adi kalak si beluh rukur tentuna harapkenna dirina gelah sehat, adi lit kalak nggo harapken dirina gelah idilo Dibata, e kuakap perlu lebe isungkun ntah ites lebe kejiwaanna.

Kerina sibahan manusia benaken ibas pagi-pagi nari seh berngi e kerina guna kesehaten nandangi dirina. Contohna :

1.      Man tentuna gelah ula melihe ras la sakit labo lit kalak kuidah man erkiteken meriah-meriah ngenca.

2.      Rsdna kerina.

Janah adi nggo kita sehat tentuna umur gedang, banci berjumpa ras kalak sikelengi kita eme jadi salah sada hal si banci sidatken kita.

Jadi banci kataken kita kerina pasti sehat.

Gambaren si enda, banci siidah ibas bahan Pengogennta si pemena si ibuat ibas

-          Jesaya 38 : 1-20.

Hizkia eme raja kalak Yehuda si menurut piga-piga penelitian ia jadi raja tahun 729 SM-686 SM ibas tahun pelayanan nabi Jesaya nandangi kalak Israel.

Raja Hizkia termasuk salah sada raja si hebat. Kai silakokenna kerina bagi kai sura-sura Dibata nandangi bangsa Israel. Hal si enda banci siidah ija :

1. Ibas awal pemerintahanna, raja Hizkia nalangi pintu-pintu rumah Tuhan ras mpekenana. (bnd 2 Kronika 29:1-31).
2. Meruntuhken gana-gana ras sembah-sembahen si ibahan bangsa Israel nandangi dibata-dibata sideban (bnd 2 Raja-raja 18:4)
3. Ndarami penampat Dibata guna erperang ras bangsa Asyur (Bnd 2 Kronika 32 : 1-23)
4. Ngelakoken perayaan Paskah (2 Kronika 30 : 1-31)

Tapi kerina hal si enda labo erbahanca raja Hizkia pulah ibas sakit pinakit.

Ibas bahan pengogennta ituriken uga Raja Hizkia sakit  janah nandangi mate (ayat 1a). Janah si sakitna ka pe, tentu adi kalak sakit biasana lit pengarapenna guna malem, tapi kai sikataken Nabi Jesaya ibas paksa si e nandangi raja Hizkia, tentuna seh kal sakitna (ayat 1b) erkiteken tangkas katakenna kam nggo nandangi mate.

Bahasa si kataken Nabi Jesaya man raja Hizkia tentuna erbahanca mesui kal pusuh Raja Hizkia. Kuakap adi aku iposisikan selaka raja Hizkia tentuna ibas kerina kai si kubahan nandangi Dibata, la kin tersampatina aku ibas penakitku enda. (kemungkinen menurut penelitian penakit si lit bas raja Hizkia eme pinakit PES si isebabken menci (Tikus))

Gambaren kegogon pusuh Raja Hizkia banci siidah ibas ayat 9-15.

Tapi erkiteken raja Hizkia la nggit menyerah ibas persoalen enda, mis ia ertoto man Dibata alu iluh mambur. Erkiteken pertotonna ndai maka Tuhan nyuruh nabi Jesaya guna ngatakenca man raja Hizkia nggo itambahi umurna 15 tahun nari.

Gambaren cerita raja Hizkia enda cidahken uga pentingna kesehatan man sekalak manusia. Tapi selain sie, lit piga hal si banci sipelajari arah bahanta enda :

1. Uga Raja Hizkia si la pernah menyerah aminna nggo ia ivonis mate
2. Lalit hal si mustahil ibas doni enda asal kita nggit berusaha. Tapi inget usaha si maksudken jenda tentuna harus alu ketutusan ate
3. Lit istilah si ngatakenca bagenda “Labo erkiteken kam tua maka mate, janah labo erkiteken kam muda maka gedang umurndu. Hal sienda banci ka sikaitken ras bahannta sendah. Ija labo erkiteken kita ngelakoken si mehuli maka mis bereken Dibata kesehatan.

Emakana ibas bahan sipeduaken :  

-          1 Tesalonika 5 : 23-24

Surat Tesalonika enda itulis Rasul Paulus nandangi perpulungen i tesalonika, surat enda itulis guna mereken dorongan ras kiniteken si paguh nandangi perpulungen si lit ibas daerah ndai. Janah mereken jawaban-jawaban ibas piga-piga penungkunen perpulungen.

Selain si e, surat enda pe ncidahken uga penolakan kalak Yahudi nandangi Paulus guna meritaken berita si meriah ku tengah-tengah kuta Tesalonika khususna nandangi kalak non Yahudi.

Secara terkhusus bas bahan pengogennta, rasul Paulus menasihatkan 3 hal nandangi perpulungen i tesalonika :

1. Uga sikap perpulungen nandangi pemimpin (12-13)
2. Uga tanggung jawab selaku pemimpin nandangi perpulungen (14-17)
3. Uga sikap perpulungen nandangi dahin Kesah Sibadia ras dahin si labo dahin kesah Sibadia.

Janah ibas bagin pengogennta eme termasuk bagin penutup.

Bas bagin pengogennta ituriken Paulus uga :

1. BerekenNa kemalemen ate si erbahanca kita badia ibas kai pe

Adi aku erpengakap jenda bahwa kemalemen ate situhunna enda bagin si nggo jadi sikerajangennta. Erkiteken sie ibas kai pe malem ate e nggo badia. 

2. Kesah, tendi ras kulanta e bersih ras ikawalina gelah tetap bersih asum Yesus reh pagi

Adi aku erpengakap jenda, ertina kerina situhunna kita enda bersih tapi harus siinget bahasa si ipake rasul Paulus “Engkawali” ertina Dibata engkawali tapi adi kita la nggit kita ikawali e nggo tergantung kita (Freewild).

3. Dibata setia kap.

Tentu kuakap tangkas ertina kai sikataken Dibata enda la pernah berubah mulai tangtang nari seh ngasa gundari tetap bagi kai singgo padankenna.

-          Aplikasi

Emakana rikutken tema minggu enda, “Kulandu eme Rumah Pertoton Kesah sibadia”, ibas bagin 1 Tesalonika 5 : 23-24 kuakap nggo cukup tangkas uga Rasul Paulus nurikenca Tuhan erdahin ibas dirinta, berekenNa terbaik nandangi dirinta, tapi terkadang kita si erbahanca si nggo baik enda nggo jadi buruk. Erkiteken adi siperdiateken bahan enda Tuhan tetap setia. Jadi kai sibereken si mehuli man kita pasti tetap mehuli. Tapi erkiteken kai silakoken kita maka sijadi sikerajangennta enda nggo berubah.

Tapi hal sie banci jadi mulih kukita asal kita tuhu-tuhu ngendesken diri kita man Dibata gelah Dibata erdahin bas Dirinta (Raja Hizkia).

Emakana rikutken minggu kesehatan minggu enda, emakana sisadari min kesehatan enda situhunna nggo sikerajangenta tapi erkiteken kita erbahanca maka kita banci sakit. Tapi perlu ka siingat labo alat ntah pe tambar si banci erbahanca kita malem, tapi pengendesen diri man Dibata epe penting, erkiteken Dibata me si metehsa kerina dirinta enda. Emakana ibas minggu enda marilah sijaga kesehatan kita alu ngelakoken cara sisehat ras ngelakoken kai pedah Dibata. Gelah kai padan Dibata man manusia tuhu-tuhu jadi sikerajangennta.