PEKAN KELUARGA WARI/BERNGI II

                                       PEKAN KELUARGA WARI/BERNGI II

SENIN 21 NOVEMBER 2016

THEMA : PALAS JABU

Invocatio : Kolose 3 : 14

Ogen : Perbahanen Rasul-Rasul 18 : 1 – 4

Renungen : Kuan-Kuanen 24 : 3 – 7 

Pdt Maria E br Sitepu

-          Pengantar

Jabu ntah pe ibas bahasa Indonesia eme keluarga, tentuna labo istilah si asing ibas kegeluhennta, erkiteken hampir kerina manusia idoni enda, lit pasti jabuna ntah pe keluargana. Tuhan Yesus saja pe adi siidah, ia reh kudoni enda gunakan perantaran jabu yusuf ras maria. Situhunna arah enda pe banci kita memami uga luar biasa pentingna peranan jabu ibas tengah-tengah perdalanen geluhta. Ibas invocationta pe teridah uga rasul Paulus ibas persoalen si terjadi nandangi perpulungen i kolose, jabu ntah hubungen ibas jabu e seh kal pentingna guna njagai hal-hal si la mehuli si banci ncedai kegeluhen anggota jabu.

Ibas berngi/wari sipeduaken pekan keluarganta enda, kita isengetken mulihi kai kin situhunna palas jabu ibas kegeluhennta.

Sedekah enda, adi nandangi erjabu palas enda eme kekelengen, pengertin rsdna kerina, tapi adi nggo ka erjabu agak ndekah biasana konsepna berubah ku arah materi, jadi palas jabu eme rumah, sen, mobil,anak rsdna kerina.

Tapi e kin ngenca palas jabu kalak Kristen ibas perdalanen geluhna ?. ibas

-          Kuan-kuanen 24 : 3-7

Adi siperdiateken bahannta enda agak sitik kupudi, banci siidah bagin enda termasuk ibas telu puluh petuah kalak pentar (bnd kuan-kuanen 22:17-24:22), jadi banci kataken bagin enda itulisken raja Salomo gelah banci jadi usihen nandangi kalak si atena pentar ntah pe berhikmat ibas kegeluhenna.

Janah ibas bagin enda, raja Salomo mereken petuah nandangi kalak gelah uga jabuna eme jabu si pentar. Kai-kai saja :

1.      Kepentaren ras pengertin (ayat 3-5,7)

Ibas bahan enda, ituriken raja salomo kepeken guna ngisi rumah alu hal-hal si meherga ras mehuli labo terjeng sen saja si iperluken tetapi lebihen asangken si e.

Adi aku erpengakap mehuli ras meherga enda labo terjeng materi ngenca, tapi ndehara, perbulangen, anak eme barang si seh kal mehergana ibas kegeluhen sada jabu. Janah adi ate ia jadi mehuli maka iperluken kepentaren ras pengertin nandangi kerina jabu guna erbahan si e.

2.      Perencanaan (ayat 6)

Ibas bahan enda ituriken raja Salomo ibas sada jabu perlu kal perencanaan erkiteken manteki jabu labo terjeng ngerana gundari tapi ngerana masalah masa depan. Kai harus ibahan nandangi isi jabunta

Enda me nina raja Salomo hal si penting ibas jabu. Tapi apakah terjeng si e ngenca. Ibas

-          Perbahanen Rasul-Rasul 18:1-4

Akwila ras priskila eme gelar si labo kal terkenal ibas pustaka sibadia. Adi siidah ibas pustaka siBadianta, gelar enda muncul 6 kali ngenca ibas Perbahanen Rasul-Rasul, Roma, ras 1 Korinti. Ise kalak enda ?

Akwila eme sekalak Yahudi situbuh ipontus. Gelarna enda ertina elang/rajawali/kuliki janah ndeharanana eme priskila (ertina :kuno). Dua kalak enda eme sepasang perbulangen ras ndehara si lawes i italia nari ku korinti. Kemungkinen kalak enda lawes i italia nari erkiteken Kalak Yahudi iusir kaisar Klaudius erkiteken pemberontakan si ilakoken Chrestus. Janah adi sinin bahan pengogennta kalak enda duana seri pedahinna eme erbahan tenda.

Tapi kai situhunna menarik ibas pasangan enda ? :

1.      Kalak enda mediate nandangi dahin Tuhan

Hal si enda banci sinin uga rasul Paulus sanga ia i korinti tading ia i rumah kalak enda. Janah adi sinin Perbahanen rasul-Rasul 18:18-20, je teridah uga dukungan pasangan enda nandangi rasul Paulus.

2.      Kalak enda duana memiliki pengertin nandangi Pustaka sibadia

Hal sienda banci sinin ibas perbahanen rasul-rasul 18:26, ije ituriken uga pasangan enda duana ngajari Apolos.

-          Aplikasi

Emakana ibas wari/berngi sipeduaken ibas pekan keluarga enda, Dibata ngajarken kita, kepeken guna membentuk sada jabu Kristen si luar biasa, labo terjeng kekelengen, sisampat-sampaten ngenca, tapi lit hal-hal si perlu ibas jabu kita segelah jabu enda banci cidahken jabu Kristen si tuhu-tuhu. Pengertin, perencanaan, kepentaren, tutus ibas dahin Tuhan, mengerti pustaka Sibadai e sada hal si la banci ipisahken ibas jabu kalak Kristen, gelah tuhu-tuhu jabunta enda jadi jabu si erkomitmen ras jadi jabu si nggit erlajar.