BIMBINGEN MORIA Tgl 30 Oktober - 05 Oktober 2016

BIMBINGEN MORIA Tgl  30 Oktober -  05 Oktober 2016

Thema : SADA KULA, SADA KESAH

Bahan : 1 Korinti 12 : 4 – 13 

Pdt. Maria E br Sitepu

-          Penjelasen Teks

Kitab enda, eme kitab si itulis rasul Paulus nandangi perpulungen i korinti. Kitab enda khususna bagin enda, itulis erkiteken lit persoalen nandangi perpulungen i kota korinti ija melala kepeken pemere kesah si teridah itenga-tengah perpulungen korinti. Tapi hal sienda labo erbahanca keriahen nandangi perpulungen korinti tetapi menjadi masalah simbaru, erkiteken si e turah cian ras perjengilen sapih-sapih perpulungen.

Perbedaan ibas pemere kesah ndai labo iakap sebage pemere Dibata tetapi erbahanca kalai ndai nggo meganjang ukurna. Janah erkiteken sie ka, penggunaanna nggo lanai guna kiniersadan tetapi guna kiniganjangan ukur semata ngenca.

Emakana ibas bagin enda ibas :

1.      Ayat 4-6, turiken kepeken kerina si ilakoken kita e kerina reh ibas Dibata nari.

Melala kalak erpengakap bahwa kai si jadi kebeluhenna e erkiteken usaha si ilakokenna. Kurang si menyadari bahwa si e kerina erkiteken pemere Dibata. Tapi adi siperdiateken misalna lit 10 kalak merhat ia guna mempelajari sada hal ras cara guna ngajarisa seri, tapi ibas pedungina labo seri kebeluhenna. Lit sibeluh kal lit si lang. engkai maka bage ? enda kita ngerana masalah pemere Dibata nandangi manusia. Pemere enda maun-maun la sisadari ras la sieteh tapi adi siasah lalap dungna sieteh, emakana adi nggit kita metehsa kebeluhennta cubaken kai pe, kai siakap kita beluh ras pentar em biasana pemere Tuhan nandangi kita

Tapi ibas inget

2.      Ayat 7 hal sie idatken kalak guna kepentingan ras-ras.

Syarat guna ngembangken pemere kesah gelah reh mejilena eme pemere kesah enda igunaken guna kepentingen ras-ras.

Enterem kalak si nggo ietehhna kai kebeluhenna ntah pe karuniana tapi erkiteken tujun ras sura-sura la mejile erbahanca pemere ndai la maksimal. Jadi guna maksimal pemere kesah ndai inget igunaken guna kiniersadan. janah

3.      Ayat 8-13 nuriken kerina hal sie saling memperlengkapi sada ras sideban bagi gambaren daging kulanta enda.

-          Aplikasi

Sada kula, sada kesah enda me tema pa moria ibas minggu enda. Tema enda situhunna nggo cukup tangkas nuriken uga seharusna moria ibas perdalanen pelayanen ras perdalanen kegeluhenna sadar kepeken kai kelebihan si lit ibas ia situhunna ibereken Dibata guna memperlengkapi kalak sideban.