BIMBINGEN PA MORIA 2 - 8 Oktober 2016

BIMBINGEN MORIA

ULIH KESAH SIBADIA

Nats : Galati 5 : 22-23
Pdt. Maria E br Sitepu

-          Penjelasan Teks

Ibas bahan pengogennta bas bahan pa Moria enda, kuakap tangkas kal ikataken rasul Paulus uga situhunna ulih kesah sibadia man dirinta adi kita nggit kegeluhenta itegu-tegu Kesah si Badia.

Lit 9 (siwah) hal sikataken bahannta enda, erkiteken ulih Kesah si Badia, eme :

1.      Kekelengen

2.      Keriahen

3.      Kemalemen Ate

4.      Kesabaran

5.      Perbahanena mehuli

6.      Mehuli

7.      Setia

8.      Meteruk ukurna

9.      Ngasup engkuasai diri

Enda siwah hal si banci sidatken kita adi tuhu-tuhu siikutken kesah Sibadia.

Tapi lit hal sicukup menarik adi siperdiateken bahan enda, ibenaken ibas ayat 16-26.

Ibas ayat 16, ikataken jenda uga pengarapen Rasul Paulus nandangi perpulungen I Galatia gelah lit keinginan perpulungen gelah kegeluhenna itegu-tegu Kesah Sibadia ras banci tahanna perukuren manusia.

Jadi cukup tangkas kal, kataken rasul Paulus kepeken ibas diri manusia dua hal si ngatur kita guna mutuskenca kai si harus silakoken eme Kesah Sibadi ras Perukuren manusia. Tapi kepeken ibas ayat 17, ikataken rasul Paulus dua hal enda, sijadi bagin si la tersirangken ibas diri manusia kepeken erlawanen sada ras sidebanna. Jadi harus lit pilihan. Kesah Sibadi si ngatur kita ntah perukuren manusia ntah pe dirinta si ngatur kita.

Janah ibas ayat selanjutna ikataken uga adi kita ngikutken dua hal enda.

Sipertama adi siikutken perukurennta, ibas ayat 19-21, ituriken rasul Paulus kai si banci teridah bas dirinta adi perukuren manusia enda siikutken. Janah

Sipeduaken ibas ayat 18, ras ayat 22-23 (bahan pengogenta), ikataken rasul Paulus kai si banci jadi bas kita adi siikutken Kesah Si Badia bas kegeluhennta.

Emakana ibas bagin si terakhir ibas ayat 24-26, ituriken rasul Paulus je uga situhunna memang nggo jadi sada kewajiban ibas kalak Kristen gelah kesah Sibadia me si jadi persukuten ibas geluhna.

-          Aplikasi

Emakana ibas bahan morianta minggu enda, tujunnna guna memaksimalkan potensi hidup. Emakana perlu siinget piga hal guna memaksimalkan potensi hidup terutama masalah Roh ntah perukuren, eme :

1.      Keinginan

Ibas ayat 16 ituriken uga sekalak jelma gelah nggit memaksimalkan potensi hidup si lit bas dirina, haruslah lebe lit keinginan, labo lalap bicara masalah hasil, tapi sope si e harus lit torah keinginan

2.      Tantangan

Tentuna keinginan biasana bene ntah pe masap erkiteken lit tantangan. Tapi harus siinget setiap keinginan pasti lit tantangan. Tapi ibalik si e kerina lit hasil si nggo nimai

3.      Hasil

Enda me si itimai kalak ibas atena berubah. Tapi inget enda jadi adi memang tutus ibas kita dalanken pilihan si nggo ibahan kita. Emakana si siwah hal si kataken ibas bahan pengogennta banci teridah ibas dirinta adi tuhu-tuhu kita tutus ibas ngikutken kesah si badia. Ula maun oe maun lang.

4.      Alasan Umum

Si terakhir, tangkas kal, aminna pe lalit hasil si berdampak langsung kubas kegeluhen kalak si geluhna I tegu-tegu Kesah Si Badia, tapi situhunna enda nggo jadi tanggung jawab si la tersirangken arah manusia si nggeluh guna Kristus.

Emakana marilah si maksimalkan kai si nggo bereken Dibata man kita, si tuhu-tuhu kerinanna guna kiniulinta kita jine.