BIMBINGEN MAMRE 16 - 22 Oktober 2016

BIMBINGEN MAMRE

ULA MBERATI TEMAN SI BAS KEPICETEN

Lukas 13 : 1 – 5 

Pdt. Maria E br Sitepu

-          Penjelasen Teks

Ibas bagin enda lit 2 kejadin si terjadi :

1.      Ayat 1

Sekalak Galilea si ibunuh Pilatus sanga ia mpersembahken persembahenna man Dibata

Ibas bagin selanjutna ibas ayat 2-3, teridah kalak si nuriken berita enda man Yesus labo gelah ieteh Yesus lit kejadin bagenda rupana, tapi kepeken ia nggit mempepayo pemahamanna,

adi kalak mate alu cara si la biasa e erkiteken dosana si luar biasa hebatna man Dibata. Emakana adi ia si ngasa gundari nggeluh denga ertina ulin ia asangken kalak si mate ndai.

2.      Ayat 4

Sepuluh walu kalak mate itindihi menara i siloam

Kejadin enda situhunna nggit cidahken man kalak sir eh ndai, labo erkiteken kalak si mate enda lalan dosana asangken kalak singgeluh maka bage cara perpatena.

Janah ayat 5 Tuhan Yesus nuriken kai kin situhunna pemahaman erkiteken kejadin si nggo nderpa kalak Galilea ndai :

1.      Labo kalak si erdosa kal maka cara matena bagi la biasa

2.      Kematen si nderpa kalak e situhuna pendilo guna kalak gelah bertobat sangana nggeluh denga.    

-          Aplikasi

Ibas piga-piga waktu silewat lit 2 kejadin si nderpa bangsa Indonesia si erbahanca melala timbul pemahaman-pemahaman sideban eme :

1. Tsunami Aceh

La terpungkiri ibas tahun 2004, bencana enda me bencana si luar biasa si terjadi ibas bangsa Indonesia. Secara logika hal si enda banci terjadi erkiteken Indonesia ibentasi cincin api pasifik (gunung berapi), tapi si jadi masalah gundari kejadin e terjadi ibas tanggal 26 Desember, ija wari sope si e eme peringeten wari ketubuhen Tuhan Yesus. Emakana melala kalak Kristen enda eme hukuman Tuhan nandangi kalak Aceh si mayoritas Islam. Payo kin e ?

2. Gunung Api Sinabun

Kejadin si ngasa gundari lenga dung-dung enda, rusur ikait-kaitken erkiteken masyarakat ibas sekelewet gunung sinabun lanai dalanken pedah Dibata, erkiteken si e maka Dibata ngukum kalak karo.

Adi siukuri pemahaman si bage situhunna banci jadi hal sipositif gelah kita pe banci berubah. Tapi hal si negatifna mbuen asangken positifna, erkiteken ibas paksa si e kalak enda sangana kepiceten, reh ka kita maba pengangkannta si labo erbahanca malem atena ibas persoalan enda, tapi maba mberatna.

Ingat sada hal kita labo Sekretaris Dibata, Dibata ngenca metehsa kai maka terjadi. tugasta gundari eme nampati kalak si sangana datken kemalangen.