BIMBINGEN MAMRE 2 - 8 Oktober 2016

BIMBINGEN MAMRE

Kelengilah Ndeharandu Alu Dem Pengertin

Nats : 1 Petrus 3 : 7

Pdt. Maria E br Sitepu

-          Penjelasen Nats

Bahanta enda tergabung ibas perikop si membahas kerna hubungen ndehara ras perbulangen. Sada gambaren siituriken Petrus ibas sikap nggeluh si harusna lit ibas sekalak ndehara bagepe perbulangen. Bahanta enda khususna ayat 7 menekanken 2 hal si harus lit ibas sekalak perbulangen/mamre, eme: dem pengertin, ras mehamat man ndehara. Dem alu pengertin eme salah sada biak kepentaren/kebijaksanaan. Sekalak perbulangen eme sekalak pemimpin/ penguasa I tengah jabu.

Janah  ndehara ras anak ibereken guna ipimpinna. Tapi Dibata mereken  kuasa ras kepemimpinan e man  perbulangen si mimpin alu dem kepentaren/ kebijaksanaan/ dem pengertin dingen si ngasup ngergai ndehara ibas jabu. Ertina sekalak siipercayakan Dibata selaku pemimpin jabu ia harus beluh ngangkai situasi ndehara, ngasup ngoge ukur ndehara. Meteh kekurangen ndehara,dingen pe nggejapken maka gegehen ia asangken ndehara.enda me biak si harus lit ibas sekalak perbulangen.

Sipeduaken emekap mehamat man ndehara ertina ngergai ndehara. Ngergai keberadaan, pendapat, bagepe kesenangen  ndehara. Memperhitungken  ndehara selaku tinepa Dibata si seri ras ia,sebab tangkas ikataken Petrus maka ndehara pe radu nge ras perbulangen ngaloken kiniulin ibas Tuhan nari. Ertina ndehara pe mempunyai hak si seri nge ras sekalak perbulangen emaka harus ibereken kebebasen guna ndatkensa. Sebab Dibata pe labo pernah mbedaken mbelin kitikna kekelengenna nandangi kerina tinepaNa.

Emaka bahan enda itutup alu sada penekanen maka hal enda kerina harus idalanken guna sada tujun si mehuli, sebab adi la idalanken, ayat 7c ikataken Petrus gelah ola lit si ngolangi pertotonndu ku Tuhan. Ertina adi sekalak mamre/perbulangen la ngasup ngangkai ndehara dingen pe la ngehamati ndehara tentu sikapna e ngolangi pertotonna ku Dibata.

-          Aplikasi

Ibas zaman end ape khususnaibas peradaten kalak karo, sekalak dilaki ibas jabu ianggap selaku pemimpin. Tetapi arah bahan enda kita iajari maka amina pe perbulangen sekalak pemimpin tetapi kerna hakta ras kedudukenta seri nge ilebe-lebe Dibata. Emaka harus lit biak s idem pengertin ibas mamre. Ertina la memaksaken  sura surana guna idalanken sekalak ndehara. Harus ngenehen situasi dingen gegeh ndehara, labo hanya mempersalahken ndehara tapi pe alu dem pengertin meteh kai si terjadi ibas kegeluhen sekalak ndehara. Ngangkai maka gegehen ia asangken ndehara arusna mabai ukur perbulangeen guna berbuat lebih banyak disbanding ndehara. Tidak berusaha njadiken ndehara bagi ukurna ras sura surana tapi mbuen megiken ras ngaloken ndehara uga litna. Aminna pe melala si kurangna ibas sekalak ndehara perbulangen harus tetap mehamat man ndehara labo justru menganggap ndehara la penting, kehadirenna la penting, pendapatna la penting.  Enda me tandana sekalak mamre tulus ngkelengi ndehara.