BIMBINGEN KHOTBAH 09 OKTOBER 2016

BIMBINGEN KHOTBAH 09 OKTOBER 2016

DIBERU SI ERKEMALANGEN MAN DIBATA

Invocatio : Kuan-Kuanen 31 : 30

Ogen : Keluaren 1 : 15 – 22

Renungen : Perbahanen Rasul-Rasul 16 : 13 – 15,40 

Pdt. Maria E br Sitepu

-          Pengantar

Nina agama budha ibas bukuna si tergelar anggutara Nikaya, lit 2 tanda ibas manusia si mesera kita jumpaisa ibas doni enda :

1.      Pubbakari

Ertina kalak enda lit kengasupen ras kemerhatan gunakan mereken penampat sejati nandangi kalak. (lalit kai pe arapkenna)

2.      Katannukatavedhi

Ertina : kalak si lit kesadarenna erkiteken kiniulin si nggo pernah ialokenna ras erusaha guna balas budi nandangi kalak si nampati ia.

Secara kristiani banci kataken kalak e eme kalak si erkemalangen man Dibata.

Engkai maka bage ?

Erkiteken memang melala kita la nggit erkemalangen man Dibata, melala ibas kita cenderung erkemalangen man dirinta saja, ntah pe kuasa-kuasa sideban (sen, pemeteh, teknologi rsdna) padahal kerina sikataken kita ndai lit batasenna. Tapi bagenda me  gelarna manusia.

Berhubungen ras si e, tuhu-tuhu sada kesangapen kal adi kita banci jumpa ras kalak si erkemalangen man Dibata, bagepe banci jadi temannta utamana adi si e banci jadi teman nggeluhta ntah pe perbulangen ntah ndeharanta.

Erkaiten ras ndarami pasangen nggeluh, melala kalak erpengakap bahwa kinijelen ntah pe kegantengan e jadi sada palas guna ndarami pasangan nggeluh, padahal sieteh bagi bahan invocation kinijelen enda la terteki ras terjeng kentisik ngenca. Emakana si mejilena min pasangan kegeluhennta eme kalak si erkemalangen man Dibata.

Ibas minggu enda, eme minggu man moria, emakana iarapken gelah moria banci jadi moria si bage tema enda, eme moria ntah pe diberu si erkemalangen man Dibata.

Uga carana ernin diberu si erkemalangen man Dibata ?

-          Keluaren 1 : 15-22

Ibas bahan pengogen si pemena enda, nuriken 2 kalak bidan si rusur nampati mupus diberu kalak heber siisuruh raja mesir guna munuh anak dilaki si baru dengan ipupus diberu kalak heber. Engkai maka bage ? sieteh me kerina adi sioge ibas ayat 1 nari, uga maka bangsa Israel banci seh kutanah mesir.

Tapi kepeken dungna nggo ka mbuen kalak Israel asangken kalak mesir. erkiteken si eme maka raja si erkuasa ibas paksa si e ndarami dalan gelah menghambat perkembangan kalak Israel. Uga carana :

1. Ayat 11, teridah uga raja nakiti kalak Israel.

Tapi siidah ka tole kepeken ibas penindasan siilakoken raja e, labo reh urakna bangsa Israel tapi reh mbuena.

2. Ayat 13-14, perbudaken ijadiken cara guna menghambat kalak Israel enda. tapi epe la erbahanca reh urakna kalak enda.
3. Ayat 16, suruhna 2 bidan gelah munuh anak dilaki si ipupus diberu kalak Israel
4. Ayat 22, ngambeken kerina anak dilaki bangsa heber si mbaru tubuh ku lau nil.

4 cara siibahan guna menghambat kalak Israel enda tentuna la berhasil, erkiteken bagi ayat 12 reh mbuena bangsa Israel. Bagi lit sada kuan-kuanen, semakin ibabat makin merambat nina. Bageka bangsa Israel ibas paksa si e.

Tapi adi siperdiateken cerita enda, ibas 4 cara siipake, kepeken cara si pe-3-ken, cukup menarik, erkiteken kalak siisuruh guna dalanken cara enda, la nggit (erbual) ngelakoken hal si enda. engkai maka bage diberu enda ?

Ise kin Diberu enda ?

Siprah ras puah eme gelar bidan ndai, tentuna gelar si labo terkenal ibas pustaka si badia. Tapi la banci ipungkiri 2 kalak enda memainkan peranan si labo kitik ibas karya penyelamatan kalak Israel ibas tanah mesir nari. Aminna pe ibas bagin enda ngenca lit gelarna.

E banci cidahken kepeken labo muat galang kitikna glah kita banci ikut ibas karya penyelamatan Dibata nandangi manusia ibas doni enda, tapi erkiteken kiniggitenta

Emakana adi siidah bas bahan pengogennta enda, ibas ayat 17, tangkas kal engkai maka kalak enda duana la nggit ngikutken perintah raja.

Emakana 2 bidan enda, situhunna banci jadi “jargon” ntah pe contoh  uga diberu si erkemalangan man Dibata eme :

1. Meteh kai si banci ilakoken ras si la banci ilakoken.

Adi sekalak si nggo erkemalangen man Dibata, aminna pe tuan ntah pe bos na sinuruhsa adi la payo la padah idalanken.

Emakana erkiteken kai silakoken kalak enda duana maka ibas ayat 20, ibere Dibata ia manteki jabuna.

Jadi banci kataken adi nggit sekalak Diberu jabuna mehuli, makana perlu sadari ia harus erkemalangen man Dibata. perban enda janji Dibata man kalak si erkemalangen man baNa.

-          Perbahanen Rasul-Rasul 16 : 13-15,40

Bage ka ibas bahan pengogen si peduaken enda, sekalak diberu si gelarna Lidia sekalak perbinaga uis ungu ibas kota tiatira nari si memang terkenal alu hasil kerajinan tanna berupa uis ungu, aminna mbarenda kalak kafir, tapi erkiteken nggo endeskenna dirina man Dibata, makana nggo ia tutus ersembah man Dibata.

Gambaran enda pe banci ngajarken kita uga Dibata la mandang ise pe. adi memang e ateNa ipakeNa maka e pakeNa. Lidia me salah sada contoh ibas si e. aminna pe latar belakangna eme agama kafir, tapi erkiteken nggo ka ia erkemalangen ia man Dibata maka ipake Dibata ia guna nampati pelayanan Paulus ras silas

-          Aplikasi

Emakana adi ngerana kita masalah tema moria ibas minggu sienda, makana perlu si bereken kesadaran bahwa Dibata labo bagi manusia, melala kalak Diberu ntah pe Moria adi atena kugereja (contoh ngenca), tuhu-tuhu persiapkenna dirina, gelah mejile, gelah merim, rsdna kerina. hal si enda situhunna labo min dalih, tapi persoalenna nggo ka jadi sada kesemalen ibas tengah-tengah diberu.

Emakana kebiarennta kita terutama diberu nggo dabuh ibas pemahaman adi kugereja si man pesikapen eme packaging ntah pe kemasan.

Padahal situhunna si paling penting eme uga pusuhta enda. eme pusuh si erkemalangen man Dibata. cantik e penting, tapi cantik luar dalam si luar biasa.

Adi bas kalak Indonesia lit 3 hal syarat adi ate ndarami sekalak diberu eme 3 b

1. Brain
2. Beauty
3. Behaviour

Telu hal enda situhunna banci sidatken adi kita erkemalangen man Dibata. erkiteken inget padan Dibata man Kalak si erkemalangen man BaNa.