BIMBINGEN KHOTBAH 16 OKTOBER 2016

BIMBINGEN KHOTBAH 16 OKTOBER 2016

MBUNGKAR RAS MPEKENA PERBAHANEN SI LA PAYO

Invocatio : 2 Korinti 4 : 16

Ogen : Epesus 4 : 23 – 31

Renungen : Jeremia 1 : 10 – 19 

Pdt. Maria E br Sitepu

-          Pengantar

Adi siperdiateken ibas zaman gundari enda, melala bencana-bencana sosial si terjadi ibas kuta ingana tading. Piga-piga contoh eme :

1.      Bodrex si sedekah enda ipake guna tambar takal gundari nggo ka ipake guna hal-hal sideban. Adi istilah anak gundari supaya fly.

2.      Lem Kambing si sedekah enda ipake guna ngelem kertas, nggo ka ipake anak-anak si nguda guna fly.

3.      Seks, si sedekah enda tabu guna iperbincangken ibas kalangan masyarakat berbudaya, gundari nggo lanai tabu, bahkan ilakoken.

4.      HIV/AIDS si semakin menjamur ibas kalangan masyarakat gundari

5.      Kenakalan remaja si luar biasa kelekna ibas paksa gundari

6.      Rsdna

Piga-piga contoh idatas enda, situhunna ncidahken uga kemerosotan moral masyarakat gundari nggo seh kal luar biasana. Agama ras budaya si biasa ipake guna jadi baleng-baleng ntah pe sukat-sukat ibas kegeluhen masyarakat terkhusus masyarakat Indonesia nggo lanai ipake. Sifat individualistis tuhu-tuhu nggo tangkas teridah ibas masyarakatta gundari. Istilah elo gua nggo jadi hal si biasa bas geluhta gundari. Sekalak-sekalak nggo ngukuri dirina ngenca jine.

Emakana gereja selaku institusi keagamaan si concern ibas hal si bage, kuakap perlu kal nggo mulai mikirken uga kin ngatasisa masalah si sangana mekelek bas kegeluhen masyarakatta gundari. Gereja lanai banci sinik saja ernin si e, erkiteken indikator keberhasilan gereja teridah arah uga kinirajan Dibata teridah ibas doni enda.

Kinirajan Dibata si uga?tentuna situasi ija lit ketenangan, kedamen  ras kenyamanan manusia sapih-sapih ia.

Adi kita flashback, banci siingat uga bapak-bapak reformatoris gerejanta berusaha gelah manusia beragama mulih ku fitrahna. Maksudna jenda, kai siajarken Tuhan Yesus e si arus idalanken. Ula erkiteken tuntutan zaman ras tuntutan ekonomi maka gereja ipake guna jadi alat legitimasi ntah pe alat pembenaran kai sisalah. (Martin Luther, Calvin, Zwingli). Jadi banci kataken gereja harus dalanken fungsi kontrolna ibas kegeluhen enda. Kontrol si maksudken jenda tentuna kontrol alu Kata Dibata si tuhu-tuhu labo si ibahan gereja saja.

Emakana adi mulih kita ku kemerosotan moral si paksana gundari terjadi ise kin situhunna si salah Gereja ntah manusiana ?

Adi si jawab penungkunen si e, maka banci waktunta keri guna ndarami ise si salah. Gundari lanai waktuna/paksana ndarami ise si salah, tapi uga kita radu ras erkomitmen guna mpekena kai si nggo salah si terjadi.

Uga carana?, mari sinin bahan khotbahta ibas minggu enda 

-          Jeremia 1 : 10-19.

Bagin enda eme bagin pemena ibas kitab enda, si nuriken uga Dibata ndilo Jeremia guna jadi nabi nandangi bangsa Israel si sangana ibas paksa si e ibas kepemimpinan Raja Josia. Ibas paksa si e, bangsa Israel nggo terpengaruh ibas ibadat-ibadat bangsa Kafir (Asyur). Hal si e erkiteken ibas pemerintahan raja Manasye, Raja Manasye setia kal ras bangsa Asyur emakana sie pe erbahanca kehidupan keberagamaan Bangsa Yehuda ipengaruhi peribadatan bangsa Asyur. Penyembahan ku dibata-dibata sideban, persembahan korban anak bagepe ketidakadilan social rusur terjadi ibas paksa sie, emakana ibas masa pemerintahan Raja Josia, Dibata milih Jeremia aminna pe nguda denga guna banci Ngulihken bangsa Yehuda jadi bangsa Dibata.

Ibas ayat 10, Dibata mereken perintah man Jeremia, gelah :

1. Mbungkarken dingen ngeruntuhken ras Ngkernepken dingen ngeruntuhken

Empat kata kerja enda cidahken hukuman si bereken Dibata nandangi Bangsa-bangsa ras kerajan-kerajan si la setia man Dibata

2. Manteki dingen nuan

Dua kata kerja enda, cidahken keterkelinen si ngikut hukuman si bereken Dibata.

Janah ibas bagin 11-14, turiken Jeremia pengenehenenna man Dibata :

1. Kayu Ketapang.

Gambaren batang kayu ketapang enda, adi rikutken pengertin Ibrani emekap “Siap sedia” ntah pe “menonton”, ertina Dibata nggo siap guna ngelakoken perintahna man Jeremia ibas ayat 10 nandangi bangsa Yehuda.

2. Kudin taneh, luam isina, rehna i utara nari.

Gambaren kudin tanah si sangana luam isina eme gambaran ntah pe symbol hukuman si bereken Dibata nandangi umatNa. Janah utara ibas paksa si e iidentikkan alu hal si la mejile ntah pe liah (malapetaka)

Emakana mungkin malapateka si imaksudkenna rehna ibas bangsa ndarat nari si banci menyerang Yehuda.

Ibas ayat 15, 2 gambaran enda pe ncidahken uga bangsa Yehuda pasti irendahken ras lanai lit nari kemerdekaanna.

Tapi tentuna hal si mengeriken enda lit alasenna. Ibas ayat 16 ituriken hal si enda ilakoken Dibata erkiteken bangsa Yehuda nggo itundalkenna Dibata. Kebiasaan-kebiasan si enda nggo mendarah daging ibas bangsa Yehuda.

Janah ibas ayat 17-19, Dibata nurikenca man Jeremia, aminna hal sienda terjadi nandangi bangsa Yehuda erkiteken dosa si nggo ibahanna nandangi Dibata, tapi Dibata mereken pergegeh nandangi nabi Jeremia.

Emakana adi sipahami bagin enda ras sicoba kaitken ibas bagin pengogennta si pemena ibas

-          Epesus 4 : 23-31

Situhunna banci sibuat piga-piga pemahaman :

1. Kepeken adi ate berubah ula min setengah-setengah. Totalitas ibas perubahan iarapken kal.

Ibas bahan khotbahta ibas ayat 10 ras bas bahan pengogennta ayat 23, teridah adi ate mpelimbarui diri harus lit totalitas. Kata si ipake eme dekonstruksi labo rekonstruksi. Ertina tuhu-tuhu ibungkar benaken arah si kitikna nari ku sigalangna.

Sedekah enda si terjadi ibas jelma, lit denga itadingkenna sitik-sitik hal-hal si la payo enda. Hal si kitik enda me si banci erbahanca mbelin perbahanen si la payo.

2. Memplimbarui perbahanen si la payo enda labo ertina nggo bene kerina, tapi arah bahan enda (ayat 10), kepeken lit sesuatu si positif si ngikutken adi kita ersura-sura mehuli.

Mpelimbarui harus lit solusi si pikirken guna hal si ate si perubahi. Maun-maun si terjadi gundari maka melala kalak berubah tapi metir ka mulih, erkiteken dung perubahan e nggo dung siakap, tapi inget ibas perubahan si ilakoken kalak, tetap perlu lit penguatan si bereken kita gelah tuhu-tuhu paguh kinitekenna guna berubah.

3. Langsung e istilah si ipake guna mpelimbarui dirinta. Ula timai-timai lebe.

Melala kalak bage gundari timai lebe. Dungna la surung. Tekad iperluken. Komitmen guna perubahan.

4. Aminna pe ibas perubahan e melala tantangan tapi tetaplah kita ibas komitmenta.

-          Aplikasi

Emakana rikutken temanta ibas minggu enda “Mbungkar ras mpekena perbahanen si la payo”, sisingetken min perpulungen gelah :

1. Lit Komitmen
2. Lit Keberanian
3. Lit Totalitas

Erkiteken arah 3 hal enda ndai ras siidah bahan pengogennta, kepeken jelma sibage la pernah itadingken Dibata ibas komitmen si mehuli si ibahanna.

Gundari penungkunen man kita nggit kita berubah kuarah si mehuli bagi sura-sura Tuhan?, ntah kita ate bage-bage saja lanai lit perubahan si mehuli si terjadi bas geluhta.