BIMBINGEN KHOTBAH 16 OKTOBER 2016

BIMBINGEN KHOTBAH 16 OKTOBER 2016

TETAPLAH ERBERITA

Invocatio : Masmur 40 : 10

Ogen : Masmur 34 : 1 – 15

Renungen : Roma 15 : 15 – 21 

Pdt. Maria E br Sitepu

-          Pengantar

Minggu enda igelari minggu zending, ija kita iarapken kerina guna nginget tugas ras tanggung jawabta selaku kalak Kristen guna tetap erberita si meriah ibas tengah-tengah doni enda.

Erberita si meriah tentuna jadi sada kinimerhatan kalak Kristen ibas nggeluhna, erkiteken berita si meriah enda tentuna labo terjeng tading ntah seh bas kita saja, tapi iarapken banci seh ku belang-belang doni enda bagi sikataken Yesus ibas Matius 28 : 19-20.

Tapi tentuna hal si enda labo mesukah guna ngelakokenca erkiteken adi siidah ibas perberita si meriah i GBKP enda saja, melala tantangan si idatkenna ibas paksa si e. salah sada contohna saja uga tanggapan kalak Karo ibas paksa si e nandangi bangsa Belanda si notabene eme perberita si meriah. Lenga ka adi ngerana kita masalah bahasa, budaya rsdna si la seri. Enda kerina jadi hambatan si luar biasa ibas paksa si e.

Apalagi ibas masa genduari ija banci siidah :

1.      Hampir melala kalak nggo lit agamana

2.      Minoritas pe jadi masalah.

3.      Konsep Kristen eme agama penjajah

4.      Rsdna

Si erbahanca erberita si meriah aminna pe labo ngajuk gelah ia berpindah agama, tapi nuriken kebenaren Dibata epe seh kal meserana.

Tentuna tantangan-tantangan enda me jadi salah sada hal siharus ipikirken gereja. Gereja sinimaksudken kami jenda, labo gereja ibas pengertin pengurus ntah pe kalak si erjabatan bas gerejanta saja, tapi bagi tema ibas tahun enda eme partisipasi kerina perpulungen ibas pelayanen. Emakana ibas minggu enda, kita ate ngerana uga sikap siarus tetap silakoken selaku kita kalak Kristen segelah kita tetap ngasup erberita ibas situasi doni si bagenda rupana.

Emakana ibas minggu enda, kita ibabai guna ngangkai si pemena lebe situhunna palasta ibas kita erberita si meriah ibas :

-          Roma 15 : 15-21.

Ibas bagin enda, rasul Paulus nuriken palas ia erberita si meriah nandangi kalak si labo kalak Jahudi man perpulungen i roma :

1. Erkiteken Lias ate Dibata (ayat 15)

Palas utama si ikataken rasul Paulus eme lias Ate Dibata. Tek kita adi siukuri arah kebeluhennta selaku manusia si nggeluh denga bas doni enda, erberita si meriah eme hal si luar biasa mesera, erkiteken nuriken kelemahan ntah pe kesalahen kalak eme jadi hal si arus ilakoken ibas erberita si meriah gelah nggeluhna banci ipelimbarui Dibata maun-maun la ngasup kalak ngalokenca. Emakana bagi nina Rasul Paulus Lias Ate Dibata si mpengasup kita guna dahiken dahin e. 

2. Dibata si milih kita.(ayat 16)

Adi ngerana masalah keterpilihen enda, tentuna lit sada hal si akap Dibata hebat lit bas kita maka ipilihna kita. Kuakap labo Dibata sembarang saja ndabuhken sada pilihan man kalak adi iakapna kita la ngasup. Tapi genduari penungkunenna man kita nggo kin si pengasup dirinta, ntah sedekah enda secara sengaja la sipengasup dirinta ?

3. Sada kemegahan erdahin Guna Dibata (ayat 17)

Adi kusungkun kita kerina manusia sada persada, Lit kin jelma si hebat akapndu bas doni enda ?. adi la kita mela ngakukenca pasti lah lit. adi nggo kita fans biasana ras ia erdahin tentuna sada kemegahan si luar biasa, apalagi adi kita erdahin guna Dibata si nepa kerina isi doni enda. Lalit alasannta guna la ermegah. 

4. Gelah kalak terkelin (ayat 18)

Melala kalak palasna guna dahiken dahin e gelah dat sesuatu. tapi inget, adi dahin e erkiteken ada apanya, banci kita kecewa, erkiteken dahin si ngarapken timbal balik adi la sue ras sura-sura banci kecewa.

Empat hal enda me si jadi palas nandangi rasul Paulus maka ngasup ia guna erberita si meriah nandangi kalak Kristen Yahudi ntah pe si labo kalak Yahudi.

Selain ngerana masalah palas, bagin enda pe nurikenca kai cara si ipake Rasul Paulus ibas dahin e, eme :

1. Arah Kata ras perbahanen (ayat 18)
2. Daramina kalak si langa nandai Yesus (ayat 20-21)

Tapi la banci ipungkiri aminna e kerina sidahiken pasti lit lalap persoalen. Tapi ibas

-          Masmur 34 : 1-15

Jenda siidah uga Daud ngataken bujur man Dibata ibas kerina perbahanenNa si mbelin nandangi Daud.

Bagin enda situhunna la banci si pesirang arah 1 Samuel 21 ras Masmur 56, erkiteken guna ngangkasa pengogen enda, maka perlu sipahami uga penderitaan Daud sanga ia iayak-ayak Saul, seh maka Daud nggo arus erkulah-kulah la demsa ukurna i lebe-lebe kalak erkiteken kebiarenna (masmur 56).

Kejadin bagi si nanami Daud enda, banci kari jadi ibas kegeluhen ibas kita meritaken berita si meriah, tapi ibas masmur 34 enda, ikataken Daud, piga-piga hal :

1. Tetaplah ngasup ngataken bujur (ayat 2)
2. Tetaplah Ertoto (ayat 5)
3. Tetaplah erpengarapen (ayat 6)
4. Tetaplah lakoken si mehuli (ayat 15)  

-          Aplikasi

Tema kita ibas minggu enda eme “Tetaplah Erberita”, tetap, ertina kai kin persoalan si lit bas kita dalanken si e, tetap saja lakoken. Erkiteken lit nina kalak bijak ngerana “ sesuatu akan jadi kita dilakukan bukan direncanakan saja”, jadi ugapape persoalen si lit tetaplah erberita, erkiteken kerina si ilakoken kita enda labo man dirinta tapi man kiniulin nandangi kalak.