Bimbingen PJJ Tgl. 14 - 20 Agustus 2016

PJJ GBKP TGL. 14 - 20 AGUSTUS 2016

Nrs. Bp. Rey Tarigan

Tema : KUBEGI PERTANGIS BANGSANGKU (Keluaren 3:7-17)

Penjelasen Bahan Ogen & Perenungen

Ogenta sendah nuriken kerna Musa si isuruh Dibata guna mabai bangsaNa Israel ndarat i bas perbudaken i Mesir nari. Lit piga-piga point penting i bas ogenta sendah, e me :

Si pemena, Dibata si isembah bangsa Israel e me Dibata si tuhu-tuhu erdiate man bangsaNa si lit i bas kiniseran, ibegikenNa pertoton bangsaNa si nderkuh mindo penampat man baNa. Karakteristik Dibata si mediate nandangi bangsa si ikelengiNa enda teridah i bas gelarNa, ay. 14 nina, “AKU TETAP AKU”, i bas bahasa Ibrani “EHYEH ASYER EHYEH” erti harafiahna i bas bhs. Indonesia, “AKU akan hadir dan bertindak” guna mulahi bangsaNa i bas perbudaken i Mesir nari. Maknana, Dibata e seri kuasaNa, erdiateNa, kekelengenNa, nai-nai nari, genduari, seh rasa lalap. I bas kinatana memang tuhu Dibata i bas kuasaNa si mbelin enggo mulahi ras naruhken bangsaNa e ku taneh Kanaan sue ras si enggo ipadankenNa. Bahkan seh asa gundari kalak Yahudi tetap denga ipasu-pasu Dibata jadi bangsa si isegani bangsa-bangsa si deban.

Si peduaken, Musa isuruh Tuhan guna ndahi raja Mesir ras mabai bangsa Israel ndarat i Mesir nari. Ertina, ibereken Dibata tanggung jawab man manusia guna jadi alatNa, amin pe kuasa Dibata la terbatas guna ngelakoken kai pe. Tapi uga tanggapen Musa? Melala alasen si ibahanna gelah tanggung jawab e la isehken Dibata man bana (ay. 11, 13), janah i bas bindu 4:14 merawa kel Dibata man Musa erkiteken itulakna tanggung jawab si ibereken Dibata man bana. Akhirna Musa nggit ngaloken tanggung jawab e itemani seninana Harun. Berkat ia ras keluargana ku Mesir i Midian nari, ipengasup Tuhan Musa mabai bangsa Israel ndarat i Mesir nari seh ku taneh Kanaan, amin pe la seh ia ku taneh si ipadanken Tuhan e.

Tema PJJ-nta sendah e me, “Kubegiken Pertangis BangsangKu”, entah pe banci sikalimatken alu kalimat si deban, “Dibata megiken pertangis kalak si tek man baNa”. I bas ogenta sendah Dibata labo saja megiken tapi pe mulahi kalak si tek i bas perbebenna nari. Dibata tetap lit ras erdahin i bas kegeluhenta, kuasaNa seri nai-nai nari seh asa gundari. Persoalenna mungkin melala kalak si ngaku tek man Dibata tapi i bas kinatana la ia tek nandangi kuasa Dibata si mbelin. E maka si banci jadi bahan perenungenta sendah si pemena, tuhu-tuhu kin tek kita nandangi Dibata si megiken pertangista? Janah tuhu-tuhu tek kin kita nandangi kuasa Dibata si ngasup mulahi kita i bas perbebenta? Adi tek kita maka siandalkenlah Tuhan i bas kita ngalaken perbebenta ula siandalken kuasa-kuasa si deban si lit i sekelewetta. Si peduaken, bagi Musa, kita pe isuruh Tuhan guna nampati kalak si deban si sangana i bas perbeben pulah i bas pebebenna nari. Mungkin lit kita si usur ngatakenca, “Aku pe man sampaten nge, uga ka aku banci nampati kalak si deban?” Entah pe melala alasen si deban si ibahan kita gelah terbebas i bas tanggung jawabta nampati kalak si deban. Kita enggo ipulahi Dibata arah Yesus Kristus i bas dosanta nari, e maka kita enda kalak si merdeka i bas kuasa kematen nari. Sebage kalak si enggo ibebasken Dibata, tentuna kita arus mpergunaken kesempaten si lit guna ngataken bujur man Dibata ras guna ngelakoken kerina si mehuli sue ras peraten Dibata (bdk. Gal. 5:13). I bas si e tentuna sebage kalak si enggo imerdekaken Dibata, kehadirenta i japa pe menjadi solusi, labo menjadi masalah.

Si terakhir, i bas minggu enda kita ngerayaken HUT RI si pe-71-ken. Ngataken bujur kita man Dibata erkiteken IA enggo mulahi bangsanta i bas penjajahen bangsa si deban nari seh makana kita jadi bangsa si merdeka. Mari radu ras sipergunaken kemerdekaan si lit guna jadi alat Dibata mabai kalak si lit i bas perbeben pulah i bas perbebena nari arah penampatta ras pertotonta asa kengasupenta. Dibata si mpengasup kita.