BIMBINGEN KHOTBAH 28 AGUSTUS 2016

BIMBINGEN KHOTBAH 28 AGUSTUS 2016

DIBATA ULU KEPENTAREN

Invocatio : Kejadin 1 : 27

Ogen : Roma 12 : 1 – 3

Renungen : Jakup 1 : 1 – 5 

Pdt. Maria E br Sitepu

-          Pengantar

Sadar ntah la sisadari, jelma ibas doni enda memiliki kepentaren si berbeda-beda sada ras sidebanna. Hal si enda tentuna berkaiten ras sura-sura manusia e mulihi, kepentaren si apai nge si atena i pebagesna.

Nina howard gardner lit 8 kepentaren jelma :

-          Kepentaren Linguistik ntah pe kepentaren ngerana

Kepentaren enda biasana banci siidah adilit kalak beluh kal ia ngatur kata-kata si tulisna ntah pe sikatakenna.

-          Kepentaren Matematis ntah pe logika

Kepentaren enda, kengasupen kalak guna dungi masalah alu logikana.

-          Kepentaren Visual

Kepentaren enda biasana banci siidah man sekalak jelma si beluh ia ernin gambar ntah pe adi lit gambar seh kal telitina.

-          Kepentaren Kinetik

Kepentaren enda biasana erkaiten ras kengasupen guna makeken daging kulana (landek, rsdna)

-          Kepentaren Musikal

Kepentaren si berkaiten ras kengasupen sekalak jelma guna memahami musik

-          Kepentaren interpersonal

Kepentaren guna ngangkasa jelma sideban

-          Kepentaren intrapersonal

Kepentaren si erkaiten kengasupen guna ngangkasa dirina sisada

-          Kepentaren naturalis

Kepentaren si berkaitan ras kengasupen kalak guna menikmati alam ras makekenca alu mehuli

Arah 8 kepentaren enda, situhuna kita nggo banci menilai ibas bagin siapai kin kita ? kepentaren siapai si menonjol arah kita ?.

Tapi ibas paksa gundari enda adi siperdiateken enterem jelma si paksana ngenanami stress. Engkai maka stress ? perban kai si isura-surakenna la sue ras kinata si terjadi ibas kegeluhenna. Padahal nggo ka secara 8 hal datas ipahamina ras itingkatkenna. Engkai maka banci bage ?

-          Jakup 1 : 1-5

Bahan enda itulis sekalak rasul si tergelar Jakup. Jakup enda eme senina Tuhan Yesus, tapi si menarikna ibas bagin pemena ikatakenna labo ia senina Tuhan tapi persuruhen Tuhan Yesus.

Enda hal pemena si menarik ibas bahan enda, perban enterem jelma adi nggo pentar ntah pe melala kade-kadena kalak hebat nggo ka peganjang-ganjangna gelarna. Tapi Jakup lang.

Sipeduaken si menarik ibas bahan enda, eme :

Istilah si pake jakup Ibas ayat 1, istilah senina-senina, ertina uga ia keleng ras la nin beda dirina ras kalak Israel si sangana ibas tanah perlajangen.

Kepentaren si bageme si jarang ipelajari, arah kata Dibata enda ngenca kita ngasup datken kepentaren si bage

Ibas bagin selanjutna ayat 2-, kataken Jakup sangap min iakapndu adi re herbage-bage percuban, erkiteken kam banci jadi kalak megenggeng.

Kepentaren si enda ka si mesera si dat ibas bangku sekolah. Sie kerina tuhu-tuhu idatken kita arah penandainta nandangi Tuhan. arah si e maka Tuhan nambah-nambahi kepentaren nandangi kita.

Emakana bagi terakhir ibas ayat 5 tangkas kataken rasul Jakup pindolah gelah ibereken kepentaren man banta. Kepentaren siapai ?

Kepentaren ibas kita ndalani wari-wari kegeluhennta.

-          Roma 12 : 1-3

Emakana ibas bahan si pemena ikataken rasul Paulus man perpulungen I roma :

-          Endeskenlah Kulandu man Dibata

Jenda si rusur mesera kita datken kepentaren si luar biasa arah Dibata, perban la si endesken kerina dirinta enda. adi memang kita ate Tuhan erdahin bas dirinta siendeskenlah kerina. Perban tek aku, Dibata la nggit merubah setengah-setengah ngenca tapi kerinana. Emakana endeskenlah dirindu man Dibata

-          Ula pelepas dirindu seri ras doni enda.

Adi ate datken kepentaren si rehna ibas Dibata nari, makana la banci kita seri ras doni enda. perban adi kita seri ras doni enda, kalak biasana ngarapken kepentaren guna kepentinganna jine. Tapi kepentaren si bereken Dibata harus ipake guna kiniulin ras-ras.

-          Ula iakapndu ganjangen kam asa patutna.

Enda salah sada hal ka si perlu si pahami ija, ibas kerina si bereken Tuhan kari man bandu labo erbahanca kam hebattan kam asangken kalak si deban. Tapi si enda erbahanca kam jadi penampat man kalak sideban. Erkiteken Dibata mereken man kerina kita kepentaren guna erbahanca hal-hal si erguna man kalak sideban.

Emakana sue ras tema si sendah. Dibata ulu kepentaren, labo ise pe. mungkin melala cara si banci silakoken kita guna datken kepentaren. Tapi si paling pentingna ibas si e kerina, kerina e rehna ibas Dibata nari. Kai si bereken Dibata pasti ate Dibata guna ipake guna muji ras mpermuliaken gelarna saja, labo gelar ise pe.