BIMBINGEN MORIA 28 AGUSTUS - 3 SEPTEMBER 2016

BIMBINGEN MORIA

RATUR DINGEN ERKINITEKEN

Nats : Kolose 2 : 1-5

 Pdt. Maria E br Sitepu

-          Pengantar

Ratur eme salah sada hal si sukah ngelakokenca, adi kita ibas paksana aman damai, pokokn lalit gangguan. Kerina pasti siibahan ratur kerina. contoh :

1.      Biasana moria adi nggit ia membersihken rumah me biasa suruhna bapak ntah pe mamre ras anak-anak lawes rumah nari, gelah tenang ia membersihken, gelah ratur kerina bahanna i rumah.

2.      Adi biasana sekalak jelma adi atena tutus erdahin ntah pe erlajar biasana ibas berngi simbagesna lakokenna, enda tentu saja gelah ia banci ia datken ketenangen.

Jadi memang kinitaruren e lalap berhubungen ras situasi tenang aman ras nyaman.

Ibas bahan enda, menarik kai sicidahken ras kataken rasul Paulus man perpulungen I kolose ija :

-          Tafsiran Kolose 2 : 1-5

ibas ayat 1, tangkas kataken rasul Paulus uga meserana iakapna ibas paksa si e. enda tentuna erkiteken sanga menulis surat enda, rasul Paulus sangana ibas penjara. Tentu adi siukur-ukuri guna nciptaken keteraturen geluh man diri sisada saja mesera apalagi erban keteraturan man perpulungen si la ras ia je. Tentu e hal si mesera.

Ibas ayat 2 ras 3, ikataken rasul Paulus, si e kerina ibahanna guna perpulungen ngenca ras kemuliaan Dibata. gelah kerina perpulungen metehsa kai rahasia Tuhan nandangi kerina jelma i doni enda si tek man Bana.

Ibas ayat 4, jenda ikataken rasul Paulus uga masalah Perpulungen Kolose, ija lit kalak si alu bahasa-bahasa si manis guna nadingken kiniteken perpulungen Kolose enda man Yesus.

Ibas ayat 5. Puji-pujin si kataken rasul Paulus man perpulungen Kolose erkiteken kiniraturen ras kinitekennna man Yesus aminna pe ndauh sirang.

-          Kaitan ras tema

Emakana sue ras tema moria ibas wari sisendah enda, situhunna enda nggit ngajari moria guna tetap ratur dingen erkiniteken man Tuhan Yesus saja ibas kerina persoalan si nderpa kegeluhenna.

Melala moria ibas kerina persoalan lanai ia ngasup guna erbahanca kiniraturen i tengah-tengah geluhna subuk pribadi, jabu ras sidebanna erkiteken masalah si sangana nderpa ia. Tapi inget, me rusur sikataken bahwa perbeben enda cara si pake Dibata guna ernin ketutusen ateta, adi erkiteken si e kita banci lanai ratur nggeluh, ertina kita nggo italuken perbeben e. inget perbeben e la mungkin hebaten asangken kita. kita harusna selaku manusia beluhen rukur labo perbeben e ngatur kita tapi kitalah beluh-beluh ngatur perbeben enda gelah ula mempengaruhi perdalanen geluh kita.

Inget keteraturen ras kiniteken sada jabu maun-maun nande ntah pe moria sangat berpengaruh, emakana adi kit ape nggo lanai teratur ras erkiniteken uga pe jabu banci kerina terpengaruh.