BIMBINGAN PJJ 21 - 27 AGUSTUS 2016

BIMBINGEN PJJ

RUKUR RAS ERDAHIN GUNA KINIULIN BANGSA

Nats : Nehemia 2 : 1-18

Pdt. Andreas Sabar Brahmana

-          Pengantar

Ibas minggu si lewat tepatna ibas tanggal 17 Agustus 2016 nggo si peringeti ulang tahun kemerdekaan negarannta si pe71-ken. Tentuna melala hal-hal si banci pelajari ibas kita peringeti ulang tahun enda. ija kepeken kemajun Negara enda la banci terlepas arah peran aktif warga Negara guna mendukung ntah pe mereken sumbangsih si mehuli guna kemajun bangsannta.

Tapi sadar ntah la sisadari, melala warga Negara erpengakap bahwa penampat si bereken man Negara harus si teridah kal, emakana melala warga Negara ntah pe rakyat Indonesia nggo lit sifat la mediate erkiteken pengakapna harus berdampak. Tapi ibas bahan pjj enda, lit piga –piga hal banci sipelajari arah pelayanan si lakoken Nehemia guna banci jadi usihen man kita guna rukur ras erdahin guna bangsanta.

-          Tafsiran Nehemia 2 : 1 – 18

Sope kita masuk kubas bahan enda, siperlu sieteh lebe bahwa Nehemia :

-          Juru Minuman raja si dahinna nanami kerina minuman si i inem raja, emakana banci kataken Nehemia enda orang kepercayaan raja.

-          Nehemia erdahin ibas raja bangsa Kafir si sangana ibas paksa si e menguasai bangsa Israel i ingan pembuangan.

Emakana menarik kal nabi Nehemia enda, ibas tengah-tengah bangsa si labo bangsana ia tetap mengingat Dibatana ras bangsana.

Kai hal si banci si nen ibas pribadi Nabi Nehemia :

-          Ia rajin ertoto

Jenda situhunna banci sijadiken salah sada cara uga kita selaku kalak si erbangsa ras ernegara. Penungkunenna man kita selain ibas wari minggu piga kali si totoken Negara ras bangsannta ?

-          Ia sangat mengutamakan Tuhan ntah pe gereja asangkan kepentingen pribadina.

Hal si enda ka banci si kaitken ibas hubungennta ras negarannta. Erkiteken piga kali kin sipikirken kepentingen Negara ntah pe bangsanta enda asangken kepentingan dirinta ? contoh masalah nggalari pajak.

-          Nehemia rusur ipegajangna Dibata asangken dirina.

Enda si perlu si pahami ibas hubungan erbangsa ras ernegara, ija ibas kita nggeluh itengah kegeluhen bangsa ras Negara perlu sipentingken Negara enda, gelah tuhu-tuhu Negara enda banci perdiatekenna kita.

            Emakana ibas pelayanenna banci sinin, eme :

-          Nehemia emekap kalak si ndarami labo nimai

Hal enda si rusur terjadi bas tengah-tengah hubungennta ras Negara, kita cenderung pasif nandangi kai arus sibahan guna negarannta, tapi adi hakta kurang aktif siakap Negara enda. emakana perlu siinget bahwa kita sebagai bagin si la terpisahkan ras Negara harus turut berperan aktif ibas kegiatan ibas bangsa ras negarannta. Misalna kegiatan gotong royong ibas lingkungennta.

-          Nehemia lit taktik ras rencana

Bas hubungennta ras Negara maun-maun kita lalit rencananta. Uga harus sibahan man daerah tadingnta saja, kebersihanna rsd e kuidah jarang kal terpikirken kita, emakana perlu kita selaku warga Negara mereken sumbangsih si membangun man bangsa ntah pe negarannta.

-          Nehemia gunaken kalak sideban ibas rencanana.

Ertina ibas dahiken dahin enda, perlulah siajuk temannta guna dahikenca, erkiteken melala kejadin kalak la nggit erdahin guna bangsana erkiteken la akapna ia langasup erkiteken sisada ia. Emakana perlu siajuk temanta guna dahiken dahin enda. perban dahin enda guna kiniulin kita kerina

-          Si terakhir Nehemia jelma si la pantang mundur ibas pelayanenna.

Kuakap kita perlu ka bage, biasana erbahan si mehuli melala pantanganna, tapi kuakap guna kiniulin kerina kita la banci surut erkiteken enda kerina guna kiniulin ras kita kerina.

Emakana ibas bahan PJJ enda, ipersingeti kita guna rukur kai nggo silakoken man bangsanta, adi lenga lit kai pe sibahan makana ipersingetika kita tole guna erdahin guna kiniulin bangsa ras negaranta erkiteken bangsa ras Negara eme hamba Dibata si erdahin guna kita.