BIMBINGEN MAMRE 21 - 27 AGUSTUS 2016

BIMBINGEN MAMRE

KAM ME SURAT NI KRISTUS

Nats : 2 Korinti 3 : 3

Pdt. Maria E br Sitepu

-          Pengantar

Ibas zaman si gundari melala kal cara kita guna nandai kepribadian kalak eme :

1.      Ayo ntah pe wajah

Cara pengenalan enda didasarkan bahwa kerina kalak lit perbedaan ibas bagin ayo enda, ntah igungna, matana, bibirna, rsdna kerina. Hal si enda me sipake kalak gunai menilai uga kin kepribadian kalak.

2.      Aura

Nina cara enda banci ilakoken alu cara meditasi. Arah meditasi kita banci ernin kai si lit bas Pribadi sekalak jelma

3.      Gambar

Hal si enda biasana ipake ibas ilmu psikologi, ija cara menggambar sada objek e banci mencerminkan kepribadian sekalak jelma

4.      Tulisan Tan

Grafologi istilah si gundari ibas cara guna nandai kepribadian kalak arah tulisanna.

5.      Tanggal lahir

Nina piga-piga kiniteken bahwa lit hubungan angka ras kejadin si terjadi makana banci arah jumlah ntah pe angka kelahirannta ncidahken uga kepribadiannta

6.      Garis tan

Hal sienda kuakap nggo umum bas kita ija melala kalak ernin kepribadian sekalak jelma arah garis tanna.

7.      Shio

Cara enda didasarkan ibas kepercayaan kalak cina. Tanggal lahir ras tahun lahir ipake guna nentuken shio kai sekalak jelma. Janah arah enda ia nentuken kai kepribadianna.

8.      Psikoanalisis

Cara enda didasarkan ibas jawaban sekalak jelma ibas penungkunen si ibereken. Arah jawaban ras gerak tubuh banci kita nentuken kai kepribadian kalak.

9.      Golongan darah

Enda pe banci jadi salah sada cara guna nentuken kepribadian sekalak jelma

10.  Zodiak

Hal si enda didasarkan ibas rasi bintang sangana ia tubuh. Arah rasi bintang enda banci I oge kai kepribadian sekalak jelma.

Enda piga-piga cara si umumna gundari melala kalak tek guna metehsa kai situhunna kepribadian dirina ntah pe temanna.

Tapi penungkunena gundari payo kin ?

-          Tafsiran 2 Korinti 3 : 3

Adi menurut pengakapku kalak ndarami hal si bage erkiteken ia la tek kais i nggo padanken Dibata nandangi dirina. Ibas bahan pa Mamrenta sendah tangkas kal ikataken rasul Paulus man perpulungen I korinti kam me surat ni Kristus si labo itulis alu tinta tapi alu kesah sibadia.

Si enda kerina si maun-maun kita la tek. Siakap e terjeng bahasa ngenca. Tapi mari sibuktiken piga-piga hal :

1.      Adi lit kalak ndabuh ntah jenari, lit ibas pusuhndu si erkusik guna nampati ia ?

2.      Adi lit sekalak pentang ntah la erpengidah lit turah bas pusuhndu ras mekuah ate ?

3.      Rsdna kerina.

Tanda kai kin situhunna enda ?

Ertina bas dirindu Dibata erdahin. Dibata nggit encidahken diriNa arah kita, emakana isitilah si ipake rasul Paulus eme surat ni Kristus. Ertina dirinta eme jadi kabar mehuli man kalak sideban. Kai silakoken ras sikataken aturen enda jadi cerminan diri Dibata ku jelma sienterem.

Tapi kinata bas kegeluhennta si enda rusur sihalangi. Engkai ?

Perban meganjang denga keegoisan silit bas dirinta. Maun-maun bas pusuhta nggo erkusik kai si banci ras si la banci, tapi erkiteken keegoisan maka silakokenlah kai siakap menguntungken dirinta jine.

-          Kaiten ras tema

Adi sikaitken ras temanta ibas wari enda eme Kam me surat Ni Kristus maka :

1.      Selaku bapak i tengah jabu kam ipake Dibata guna ncidahken kekelengenna ma kerina isi jabu.

2.      Selaku Karyawan bas inganndu erdahin kam ipake Dibata guna encidahken kekelengenna man teman I sekelewetndu

3.      Selaku mamre I tengah gereja, kam ipake Dibata guna ncidahken kekelengen nandangi kerina ngawan perpulungen.

4.      Rsd kerina

Emakana adi kita keleng nandangi Dibata si nggo leben keleng nandangi kita, marilah sicidahken uga luar biasana Tuhan nandangi dirinta man kalak si enterem gelah kalak pe banci terkelin erkiteken perbahanen si ilakoken kita man kalak.

Inget kalak tek biasana erkiteken ia ernin kalak si percaya nandangi Kristus. Kai silakokenndu e jadi penilaian kalak nandangi Dibata. Mehuli ibahanndu nandangi kalak, maka kalak se lenga nandangi Dibata la banci lang erpengakap bahwa Tuhan sisembah kita seh kal mehulina.