BIMBINGEN MORIA Tgl 18-24 September 2016

BIMBINGEN MORIA Tgl 18-24 September 2016

Thema:GEJAPKENLAH PASU-PASU TUHAN

Nats : Ulangen 28 : 1-9

                                    Tujun :Nuriken salah sada ulih ngikutken perentah Tuhan.

                                               Ngenanami ulih kepatuhen man Tuhan .

                                    Metode PA:Meligai ras nuratken erbage-bage pasu-pasu Tuhan .

                                                                    Pdt. Maria E br Sitepu

-          Penjelasan Teks

Pasu pasu eme salah sada hal si ibereken  Dibata man manusia, manusia si pemena Adam ras Hawa pe ipasu pasu Dibata (Kejadin 1:28), terus pe ku nini nini kalak Israel Abraham Ishak ras Jakup pe pasu-pasu Dibata tetap iberekenNa. Janah ibas teks ta wari enda pasu-pasu pe tetap isediaken Dibata man bangsa Israel si enggo pulah ibas Mesir nari janah atena bengket ku negeri Kanaan (negeri siigambarken dem alu pasu-pasu).

Pasu pasu siipadanken Dibata berupa kebutuhen si jadi ketedehen ate nandangi bangsa enda si enggo ndekah jadi budak ibas kuta kalak, pengalamen masa lalu  ija bangsa enda harus mengungsi ku mesir guna ncukupi keperlun panganna, maka tentuna kebayaken, kelimpahen page, lembu ras biri biri jadi hal si iarapken bangsa enda. tapi la terjeng je saja, ibereken Dibata pe jaminen nandangi kuta ras juma si bakal iiani bangsa enda. ayat 4-5 ras 8  tentuna jadi gambaren jaminen man bangsa enda maka ibesuri Dibata me ia secara kebutuhen jasmani she maka labo banci bangsa enda kekurangen. Enterem kesusuren (ayat 4) jadi symbol gegeh nandangi bangsa Israel pe ipadanken Dibata , sue ras siipandankenNa tangtangna nai nandangi nini nini bangsa Israel. Janah pasu pasu si berikutna siipadankan Dibata emekap status selaku bangsa si terpilih jadi sikerajangen Dibata(ayat 9).

Adi sipegejapken bas geluhta kune kerina enda engo lit ibas geluhta tentu kita me si sangapna ibas doni enda. tapi kata Tuhan si harus siinget, ibas pemena aras pendungi ayat bahan ogenta sendah eme syarat siharus silakoken guna ndatken si enda kerina. “adi iikutkenndu Tuhan Dibatandu dingen alu tutus ipakendu kerina perentahNa si kubereken man banndu sendah, ibanNa kam jadi bangsa si belinen asang bangsa bangsa si deban”. Tentu guna ndatken kerina kesangapen e harus me bangsa Israel patuh nandangi perentha Dibata, sebab kerina perentah Dibata njagai kegeluhen bangsa Israel ibas taneh simbaru iianina e. Dibata mbentengi bangsa Israel ibas kegeluhenna segelah ula murah terpengaruh ibas bangsa si deban nari si lit isekitar taneh e. sebab kune bangsa e nadingken Tuhan ras ngikutken bangsa sideban dingen nembah man dibata bangsa sideban tentu kesangapen e banci ndauh sirang ibas bangsa e nari.

Pasu pasu siipadanken Dibata e pe terus iberekenna man kerina kalak sierkiniteken man banNa, emekap kita kerina. tapi guna ndatkensa tentu Dibata ras kerina si ngena ateNa harus jadi Tujun geluhta. Yesus pe tangkas ngatakensa ibas matius 6:33 sipentingna kal daramilah lebe kinirajanNa, janah dalankenlah si ngena ateNa, maka icukupkenNa kai si perlu man banndu. Tapi si rusur  terjadi bas geluhta emekap kurang rusur siakap pasu pasu Tuhan ibas geluhta. Emaka ibas penggejapen sibage rupana lit 2 hal si harus silakoken. Sipemena emekap cuba si cek kegeluhenta enggo nge kita nggeluh sue ras singena ate Dibata (hidup menyenangkan Allah). Adina enggo siakap I dalanken kerina si ngena ate Tuhan tapi pasu pasu e pe bagi si kurang lalap ertina harus silakoken hal sipeduaken emekap,merubah pola pikirta ibas nggejapken pasu pasu Dibata. sebab kalak siipasu pasu labo terjeng siibereken Dibata gulenna manuk setiap wari tapi ibas kacepe si sada ons pe ngasup kita ngataken bujur eme pasu pasu situhunakel, sebab arah keriahen ukurta ngaloken kerina siibereken Dibata ertina enggo kita ndalanken si ngena ate Dibata. tapi ibas erta siberlimpah pe lit denga nge manusia lenga iakapna enda pasu-pasu Tuhan she maka lalap ia muas nandangi pasu-pasu Tuhan janah biak si merangap sibagenda tentu labo bagi sura-sura Dibata. emaka marilah kita tetap patuh man Dibata segelah pasu-pasuNa pe sampur ibas kegeluhenta.