BIMBINGEN KHOTBAH 18 SEPTEMBER 2016

BIMBINGEN KHOTBAH 18 SEPTEMBER 2016
TOTOKENLAH SERAYAN TUHAN
Minggu Notoken Serayan Tuhan I
Invocatio : Masmur 84 : 4
Ogen : Perbahanen Rasul-Rasul 12 : 4 – 12
Renungen : Kolose 4 : 2 – 6
Pdt. Maria E br Sitepu

• Pengantar

Ertoto eme nafas nggeluh kalak si tek. Istilah si biasa rusur si begi ibas kita dalani kinitekennta enda man Dibata. tentuna labo sembarangen saja kalak mereken istilah si e, erkiteken si eteh kerina uga pentingna Pertoton nandangi kiniteken sekalak kalak.
Ertoto eme sarana kita guna ercakap ntah pe nuriken pengataken bujur ntah pe persoalan si sangana ibas paksa enda nderpa kegeluhen manusia.

Bageka adi siperdiateken ibas Pengajaren i datas uruk, khususna ibas pasal 6 : 5-15, ije teridah Tuhan Jesus pe menaruh perhatian si mbelin nandangi uga cara kalak ertoto man Dibata.
Arah enda encidahken ertoto eme hal si penting si arus ilakoken kalak si erkiniteken man Dibata. jadi perlu iakap Tuhan Jesus guna mereken pemahaman uga situhunna cara ertoto man Dibata si mehulina.
Ibas minggu enda, bahan Khotbahnta pe ngerana masalah pertoton eme “Totokenlah Serayan Tuhan”. situhuna adi manjar-anjar sipahami tema enda, labo masalah situhunna ertoto, tapi masalahna si man tontonken ise. (bdk Matius 5:44).
Adi bas temanta enda si man totonken eme Serayan Tuhan.
Melala persepsi kalak adi sekalak serayan Tuhan salah sadana eme kalak si lanai lit persoalenna erkiteken nggo iarak-arak Dibata. payo kin e ?

• Perbahanen Rasul-rasul 12 : 4-12

Cerita enda me salah sada bukti kepeken Serayan Tuhan labo kalak si lalit persoalenna. Ibas bahan enda, ituriken uga ibas paksa sie eme paksa bencana man gereja erkiteken Herodes (ayat 1) eme salah sada raja si jahat kal erkiteken ia menindas kalak Kristen ibas paksa si e (bdk ayat 2 ras 3).
Petrus selaku serayan Tuhan ibas paksa si e ngenanami kekejaman arah raja Herodes enda, ija ibas bahannta enda, ituriken uga ia itamaken kubas penjara. Tapi erkiteken pertolongen Dibata, maka petrus banci pulah ibas penjara enda.
Tapi ibas bahan enda, lit 2 kata si menarik ibas kepulahan Petrus ibas penjara nari :
Ayat 6, ikataken jenda Petrus tunduh
E ngatakenca bahwa Petrus seh kal tekna ia nandangi Tuhan, aminna pe nggo ibegikenna uga Yakobus mate ibunuh tapi la ia mbiar.
Biasana adi kalak sangana ibas persoalan man, tunduh mesera akapna, tapi petrus ngasup, engkai perban tek ia man Dibata. tapi labo terjeng jenda saja.
Ayat 5
Perpulungen alu tutus ate ertoto lalap man  Dibata erkiteken petrus e.
Jenda situhuna si menarik, perban aminna pe sekalak serayan enda tutus ia ngelai perpulungen Tuhan ras erkiniteken ia man Dibata, tapi tetap perlu Perpulungen notoken serayan enda, gelah Dibata nampati serayan enda guna ngasup dalani wari-warina si ija si eteh labo gampang-gampang saja.
Emakana dua hal perlu si kombinasikan jenda, eme kiniteken serayan ras toto perpulungen. E tuhu-tuhu mereken penampat si luar biasa ibas dahin pelayanan serayannta.  
Bage ka adi siperdiateken bahannta sipeduaken ibas

• Kolose 4 : 2-6

Jenda teridah uga sekalak serayan Tuhan si terkenal erkiteken kinitekenna mindo penampat man perpulungen gelah itotoken gelah tetap megegeh ras ngasup dalani tugas ras tanggun jawabna. Perban tek ia pertoton perpulungen enda tuhu-tuhu mereken kiningasupen si luar biasa nandangi sekalak rasul eme Paulus.

• Aplikasi

Kuakap tangkas kal uga pentingna kita notoken serayan enda, erkiteken lit enden-enden ngatakenca rocker juga manusia, bageka serayannta enda ia manusia denga. Kekurangan pasti lit bas ia, emakana perilu sitotoken.
Melala siidah ntah sieteh serayan si mungkin la bagi ukur, eme situhunna tugasta perpulungen guna notoken ia ula cikuraki ia. Dahin gereja enda labo tugas serayan saja tapi radu ras kerina perpulungen. Serayan dalankenca, perpulungen mpengasup serayanna. Makana marilah sitotoken serayanta siugapanape biakna gelah Dibata mpelimbarui serayata enda kuarah simehuli.