BIMBINGEN MORIA 4 - 10 SEPTEMBER 2016

BIMBINGEN MORIA

INGETLAH PERKUAH ATE TUHAN

Nats : Perngandungen 3 : 1-24

Pdt. Maria E br Sitepu

-          Pengantar

Adi siakap hal kai si la banci lang pasti jadi ibas kegeluhennta ibas wari sipepagi ?

Adi piga-piga jelma si kusungkun biasana jawabanna eme Matahari mbincar tep erpagi-pagi ras pultak arah kenjulu.

Tapi adi aku adi sungkunndu e, si la banci lang pasti jadi eme keleng ate Tuhan ntah pe padan Dibata. hal si enda kai pe terjadi bas geluhndu pasti terjadi bas geluhndu. Aminna pe melala percuban peganci-ganci reh kubas kegeluhenndu tapi e la banci erbahanca kita ragu janji Dibata si nggo padankenNa nandangi kita.

Selaku anak-anakNa kita harus tetap erpengarapen.

Tapi kinata gundari melala kita moria adi lit persoalan ntah pe perbeben si seh kal luar biasana reh kubas kegeluhennta, nggo tempah-tempah lanai lit pengarapennta. Siakap geluh enda nggo dung lanai lit pengarapen.

Hal si enda pe terjadi ibas bahan pengogennta

-          Tafsiran Perngandungen 3:1-24

Kitab Perngndungen enda eme kitab si berisi ratapan kalak Israel sangana ia i tanah pembuangan. Mungkin melala kita si lenga ngangkasa kepeken ibas bahasa Ibranina kitab enda ertina Engkai ntah pe kenapa. Kata enda me biasa sipake adi kita meratapi hal-hal si terjadi bas kegeluhennta, contoh :

1.      Engkai Aku

2.      Engkai maka gundari

3.      Ras penungkunen-penungkunen engkai maka banci jadi bage.

Kuakap lanai asing bas kita penungkunen si bage me moria kami ?

Bahannta enda pe ncidahken uga ratapan Nabi Yeremia ras bangsa Israel sangana ia bas pembuangan. Adi siperdiateken sada persada ayat ibenaken ibas ayat 1 nari seh 19, tangkas kal uga penderitaan si luar biasa si nanami kalak Israel, si erbahanca adi siukuri arah logikannta nggo kita menyerah.

Tapi kepeken ibas si e, Nabi Yeremia ngidah sada cahaya si reh ibas Dibata nari. Makana ikatakenna “aminna pe bage”. Pengarapen tetap lit.

Sada kata man kalak si tek “Pengarapen”, kerina banci bene tapi e labo erbahanca kita surut tapi adi pengarapen lanai lit, kai pe nggo nol kerina.

-          Kaiten ras tema

Emakana man kam moria kami, ieteh kami pasti melala paksa gundari enda reh kubas kegeluhenndu, tapi inget bagi nabi Yeremia, ibas kerina perbeben enda, tetap ia lit pengarapenna erkiteken kai si terjadi ibas wari sipepagi. Inget pengarapen enda me salah sada si menjiwai kekristenan. Makana ingetlah pengarapen erkiteken keleng ate Tuhan sir eh kubas kegeluhennta e tetap seh rasa lalap la pernah berubah.