BIMBINGEN MAMRE Tgl 11-17 September 2016.

BIMBINGEN MAMRE Tgl 11-17 September 2016.
“Mengermet Nangdangi Roh Jaman”
Thema:METENGETLAH NANDANGI “NABI-NABI PERGUAK”
Nats : Matius 7 : 15-20
Tujun;-Nuriken pebahanen-perbahanen sisemal ilakoken nabi-nabi perguak ibas –
             Ogen ras jaman enda.
           -Nuriken kai-kai saja siarus ilakoken Mamre guna ngelawan nabi-nabi perguak.
Pdt. Maria E br Sitepu

• Penjelasen Nats

Bagin enda eme sada bagin ibas pengajaren Jesus i datas uruk. Ibas bagin enda, turiken Jesus gelah kalak Kristen harus metenget nandangi nabi-nabi perguak si banci erbahanca kita lepak arah kai si nggo ajarken ntah pe turiken Jesus (ibas bahan matius 5-7).
Tapi sope kita masuk ter mbagesen ibas bahan enda. perlu lebe sipahami, engkai maka Jesus mereken perhatin si luar biasa nandangi nabi-nabi perguak enda.

1. Nabi Eme posisi si cukup sentral ibas pengajaren nandangi kalak. Erkiteken si e, maka adi nabi lanai mereken Kata Dibata, maka banci pengajaren si bereken man kalak nggo lanai sue bagi kai sura-sura Dibata
2. Gelar nabi banci erbahanca kalak tek nandangi sekalak jelma. Posisi nabi selaku persuruhen Dibata, erbahanca melala kalak si perukurenna la mehuli memanfaatkan gelar enda, guna muat keuntungan man dirina.

Dua hal si enda si mungkin erbahanca Jesus mereken perhatin si luar biasa nandangi nabi-nabi perguak enda. emakana ibas bahan enda turiken Jesus uga carana bedaken nabi si persuruhen Dibata ras nabi-nabi perguak enda.
Ibas bahan pengogenta,
Ayat 15
Ikataken sekalak nabi perguak ndahi kam bagi biri-biri si melemuk, tapi situhuna ukurna bagi serigala si merawa.
Kai ertina enda :
Biri-biri ertina jenda, sekalak nabi perguak ia reh bagi kita semalna kalak Kristen. Uga kita bas perpulungen bage ka ia reh.
Emakana adi secara implisit ayat enda, ngatakenca sekalak nabi perguak berusaha gelah mata kalak si erkiniteken banci tertipu arah penampilanna (Penampilan lahiriah). Tapi pusuhna bagi serigala (merangap).
Ayat 16-18
Ibas bagin enda, i turiken Jesus adi sekalak nabi perguak banci si tandai ia arah perbahanenna ntah pe buahna. Emakana banci kataken penandainta nandangi kalak enda, la banci bagi nandangi sada barang, nin maka mis sieteh, tapi butuh waktu, erkiteken harus lebe “Pendaratna buahna” maka nggo sieteh kai sura-surana.
Bagi kita adi nukur bibit buah, si erbinaga tentu saja ngatakenca e buah si mantapna, tapi guna membuktiken si e perlu waktu si cukup ndekah gelah tuhu-tuhu banci sinanami buah si e. tapi adi buahna nggo ndarat ras la bagi sura-sura, makana ibas
Ayat 19
Adi batang si la mehuli itektek ras iambeken kubas api. Tentuna hal si enda nggo sea-sea, erkiteken waktu si ndekah, tapi kepeken labo bagi kai si nggo isura-suraken.
Emakana perlu nina Tuhan Yesus “Metengetlah nandangi nabi-nabi perguak” enda, gelah kai si nggo ajarken Yesus lanai sia-sia ras tuhu-tuhu banci sidalanken ibas kegeluhennta.

• Aplikasi

Adi nggo sieteh uga bahayana tek nandangi sekalak nabi perguak ras sieteh ka kepeken labo hal si mesukah guna nandai kalak enda, la banci lang perlu proses si gedang. Perbahanen si uga me si banci jadiken indicator gelah kita banci nentukennca sekalak enda nabi perguak ntah lang ?.
Ibas Galatia 5 : 22-23, jelas turiken rasul Paulus uga buah roh ntah pe ulih kesah sibadia, eme :

1. Lit kekelengen
2. Lit kemalemen ate
3. Lit keriahen
4. Lit kesabaren
5. Perbahanenna mehuli
6. Setia
7. Meteruk ukur
8. Ngasup engkuasai diri

Enda me 8 perbahanen si erbahanca kalak jadi persuruhen Dibata situhu-tuhu.
Gundari ngulih ku kita, memang lit waktu guna nandai sie kerina, tapi waktu sibereken kita tentuna pasti mereken ulih siluar biasa nandangi kegeluhen kinitekenna.