BIMBINGEN MAMRE tgl 25 September 2016

BIMBINGEN MAMRE tgl 25 September 2016

Thema:Perbulangan Selaku Pengulu Jabu

Nats : Ester 1 : 22; 1 Petrus 3 : 7

Pdt. Maria E br Sitepu

Tujun: mamre ngasup:

1.Nuriken antusen perbulangen kap pengulu jabu.

2.Nuriken tanggung jawab Mamre selaku pengulu

                                  Jabu.

-          Penjelasen Nats

ibas bagin pengogennta si pemena sinibuat ibas ester 1:22, tangkas kal lit dua perintah si ipedarat Raja Persia eme Ahasweros man kerina perjabun ibas bangsana eme :

1.      Perbulangen eme pengulu ibas jabu

2.      Ndehara arus megiken kata perbulangen.

Hal si enda la terlepas ibas peristiwa si terjadi nandangi Raja Ahasweros sangana ia erban pesta man-man guna kerina bangsa, subuk pembesar bagepe rakyat si lit ibas negerina e. Ibas ayat 1-8, ije teridah uga kebesaran, kebayaken ras kekuasaan raja Ahasweros nandangi rakyat bagepe kerina kuta si nggo talukenna.

Tapi bagi istilah kalak sunda, “hati-hati dengan tiga “ta””. Eme harta, tahta ras wanita, bage ka si terjadi nandangi raja Ahasweros. Ibas kekuasaan ras kebayaken si cidahkenna nandangi rakyatna, tentuna e lenga bo lengkap adi ibas sada kehebaten sekalak dilaki lalit sekalak Diberu si luar biasa.

Hal si enda banci si nin ibas ayat 10-11, ija raja ndilo kemberahen Wasti (ratuna) guna cidahkenna man kerina pegawai ras temuena uga jilena ratu wasti enda. tapi labo bage sura-sura raja e. raja wasti menolak perintah raja enda (ayat 12). Erkiteken si e maka nembeh kal ate raja.

Erkiteken si e ka, maka adi siperdiateken ayat 16-20, iakap raja perlu guna nungkun si metehsa undang-undang erkiteken perbahanen ratu wasti ndai. Emakana sue ras masuken ibas kalak enda, dua hal siterjadi, eme :

1.      Ratu wasti lanai jadi ratu nandangi bangsa Persia (ayat19)

2.      Status Perbulangen ras tugas ndehara nandangi perbulangen (ayat 22)

Menarik kal adi siperdiateken, uga usul-usul si bereken pegawaina. Ibas ayat 18, labo kepeken perintah gelah ndehara megiken kata perbulangen enda, guna keuntungan perbulangen ngenca, tapi erkiteken pikirkenna ka keuntungan man ndehara (perbulangen merawa man ndehara). Sada hal, adi si pergermetken ngidahsa luar biasa kal.

Jadi aturen si pedarat raja ahasweros enda labo man perbulangen ngenca tapi man ndehara.

Ibas bahan pengogen si peduaken eme 1 petrus 3 : 7, situhunna enda gambaren uga jadi sekalak perbulangen si igelari pengulu i tengah jabu.

Sekalak perbulangen arus :

1.      Melala pengertin ibas ia nandangi ndehara ras anakna

2.      Mehamatlah man ndehara.

-          Aplikasi

Emakana adi rikutken tema PA Mamre ibas minggu enda eme “Perbulangen selaku pengulu jabu”, makana arus min lebe sipahami istilah pengulu.

Biasana pengulu ipake man kalak si minpin sada desa, ntah pe bahasa indonesiana kepala desa. Adi secara tata bahasa Indonesia pengulu berasal ibas kata ulu, si antusenna eme sumber, asal, rsdna, ertina sekalak perbulangen :

1.      Sumber Kebijaksanaan

2.      Sumber keuangan

3.      Sumber aturen

4.      Rsdna

Emakana man kita mamre adi kita sekalak pengulu jabu, si e arus lit bas kita, ula kari nggo ka sebalikna. Kita ka sumber masalah, kita ka man biayanya, rsdna. Si e kerina labo biak sekalak perbulangen si igelari pengulu jabu. Janah arah bahan enda pe perlu jadi persinget man kita, gelah kita selaku perbulangan tuhu-tuhu banci jadi sekalak pengulu itengah-tengah jabunta.