PJJ GBKP Tgl. 27 Maret - 2 April 2016

PJJ GBKP TGL. 27 MARET - 2 APRIL 2016

Pdt. Larena br. Sinuhadji (Nd. Reynard Tarigan)

“Persadan Ras Kristus I Bas Lakon Persadan Si Badia” (Lukas 22:14-20)

Penjelasen Ogen & Perenungen

Ngerana kerna Lakon Persadan si Badia (Terj. Alkitab TB-LAI: Penetapan Perjamuan Malam) si itulisken teluna kitab Injil (Matius, Markus, Lukasa) ras Surat Paulus man perpulungen Korinti (1 Kor. 11:23-25), e me salah sada dari dua Sakramen i bas Protestan. Sakramen Perjamuan Kudus ras Peridin si Badia merupaken dua hal si niperentahken Tuhan Yesus si arus ilakoken.

Perjamuan malam ilakoken Yesus ras ajar-ajarNa i bas berngi ope Ia ipakuken ku kayu persilang. Selain berkaiten ras perayaan Paskah kalak Jahudi, ate Yesus mpegegehi ajar-ajarNa bage pe kerina pengikutNa gelah tetap paguh kinitekenna arah pengorbahen Tuhan Yesus si ilambangken arah roti ras anggur si ipan ras si inem kita.

Johanes Calvin sekalak Bapa Gereja (Reformator) ngatakenca maka kita isuruh mbuat, man ras minem daging ras dareh Kristus si ilambangken roti ras anggur gelah gegeh ras kuasa i bas kematenNa sipegeluhken tuhu-tuhu erkuasa i bas kegeluhenta. E maka fungsi Perjamuan Kudus e me:

• Sebage peringeten kerna kematen ras karya keselamaten Kristus. Roti si icepik-cepik merupaken daging kula Kristus si ngenanami kiniseran seh ngayak mate tapi keke i bas wari peteluken. Ras anggur si enggo mambur i uruk Golgota merupaken lambang dareh Kristus si enggo mambur guna pengalemi dosanta.
• Sebage Lambang Persekutuan, e me persadan ras Kristus si enggo menang ras ersada anggota perpulungen sebage kula ni Kristus.
• Sebage Pengharapen Eskatologis, 1 Kor. 11:26, “Tep-tep kam man roti e, dingen minem tare calung e, alu bage iberitakenndu kematen Tuhan, seh ngayak Ia reh mulihken”. Ertina arah Lakon Persadan si Badia, kegeluhen kalak si tek iarahken seh ku pendungi jaman enda. Alu bage perpulungen banci lebih menghayati kinitekenna alu lebih dinamis ras semangat seh ngayak kerehen Tuhan si peduakaliken.

Alu pemahamen si bage, i ja luar biasa kepeken makna si banci sidatken kita arah kita ngikuti Lakon  Persadan si Badia, maka enggo seharusna la lit nari alasen-alasen i ja lit anggota perpulungen si la pernah ikut LPS, umpamana, “la aku metunggung”, “mbue denga kal dosangku”, “aku la memenuhi syarat sabab la pernah mengikuti kebaktin pekan-pekan”, rsd. Janah i bas Liturgi LPS pe enggo jelas, maka si idilo Tuhan e me kap si mengakuken kesalahenna ras perlatunggungenna i lebe-lebe Dibata dingen tole ipelimbaruiNa geluhta gelah reh paguhna kinitekenna ras reh ngasupna kita ndalanken kegeluhenta sue bagi si ngena ate Tuhan.