Bimbingen PJJ Tgl. 13 - 19 Maret 2016

BIMBINGEN PJJ TGL. 13-19 MARET 2016

Pdt. Larena br. Sinuhadji (Nd. Rey Tarigan)

Tema : Meteruk Ukurlah (Johanes 13:1-17)

Penjelasen Bahan Ogen & Refleksi

Peristiwa Yesus murihi nahe ajar-ajarNa terjadi sada wari ope wari raya Paskah Jahudi. Enggo ieteh Yesus maka seh paksaNa itadingkenNa doni enda janah mulih Ia ku BapaNa. Janah ieteh Yesus maka enggo ibereken Dibata man baNa kuasa kai pe (Mat. 28:18), ietehNa Ia reh ibas Dibata nari. Tapi la iagahkenNa (ipamerkenNa) kuasa si lit bas Ia. I ja paksa si e Yesus sangana man berngi ras ajar-ajarNa (bdk. Mat. 26:17-25, Luk22:7-13, Mrk. 14:12-21), janah ipakeNa sada kamar simbas ibas loteng. Enggo pasti la lit si erdahin (budak) si murihi ras ngelap ise pe si bengket ku rumah e, bagi semalna i rumah-rumah kalak Jahudi. La lit sekalak pe si nggit mpeteruk dirina guna murihi nahe Yesus ras teman-temanna. Iidah Yesus situasai enda ras tedis Ia, ijadikenNa diriNa jadi budak man ajar-ajarNa. ItangtangiNa jubahNa, jenari ibentingkenNa uis, itamakenNa lau ku bas sambung jenari iburihiNa nahe ajar-ajarNa janah ielapNa alu uis si ibentingkenNa. Bayangkenlah i ja paksa si e situasi Yesus sangana lit ibas perbeben si mberat (kentisik nari menjalani via dolorosa), si kin aturna kalak lebih mperdiateken. Tapi ibas situasi si mberat sekali pe Yesus tetap mpeteruk diriNa. Kai si ibahan Yesus erkiteken kekelengenNa man ajar-ajarNa sekaligus ngajari ajar-ajarNa gelah nggeluh alu meteruk ukur. Sabab kenca enggo dung Yesus murihi nahe ajar-ajarNa, isungkunNa ajar-ajarNa, “Iangkandu kin kai tujunna si Kubahan man bandu enda ndai?” Sabab mbiar Yesus la iteh ras la banci ibuat ajar-ajarNa makna si mbages arah kai si enggo ibahan Yesus (kai sibahan Yesus berlalu begitu saja, secara sia-sia). E maka iberekenNa pesan maka adi Ia sebage guru bage pe Tuhan nggit murihi nahe ajar-ajarNa, maka ajar-ajar Yesus pe banci meneladani Yesus e me jadi si ngelai man sesama. Tegas Yesus ngatakenca, “Enggo Kubahan si man usihenndu gelah banci ibahanndu bagi si enggo Kubahan man bandu e”. Situhuna lalit budak beliden asangken tuanna, labo lit suruh-suruhen beliden asangken si nuruh ia. Tapi Yesus selaku Tuhan nggit Ia mpeteruk diriNa jadi budak, jadi suruh-suruhen. Kai si enggo idah ajar-ajarNa ngasup min iusihna. Sabab jelas nina Yesus, “Malem tuhu-tuhu atendu adi idalankenndu i bas geluhndu”.

Yesus sebage Guru ras Tuhan labo sada gelar guna nuduhken kekuasaan duniawi si banci ipake guna ate-ate man kalak ras berhak Ia ndatken kehamaten (pujin) bas kalak si deban nari. Pesan arah Yesus murihi nahe ajar-ajarNa jelas, maka Ia sebage Guru ras Tuhan pe la iagahkenNa pangkat ras jabatenNa, bahkan nggit Yesus mpeteruk diriNa. Arah si e Yesus ngajar kita gelah kita sebage ajar-ajarNa pe banci saling melayani, mengasihi, mpeteruk dirinta sada ras si debanna, amin sekali lit embel-embel titel, kebayaken, jabaten siampu kita. Asum kita ngasup saling mengasihi sada ras si debanna, saling melayani ras mpeteruk dirinta, la sombong amin sekali lit bas kita (kemampuan, kebayaken, kehebaten, rsd.), nina Tuhan Yesus kemalemen ate jadi sikerajangenta.

Sebage Pdt., Pt., Dk., kepala keluarga, pejabat, kai pe kita, sikap meteruk ukur enda arus tetap sidalanken gelah kalak si deban banci nggejapken keleng ate Kristus arah kehadirenta.