Bimbingen PA Kategorial Tgl. 13 - 19 Maret 2016

BIMBINGEN PA MAMRE TGL. 13 - 19 MARET 2016

Nrs. Bp. Rey Tarigan

Panggilan, Komitmen (Tugas Pengurus)

Ogen : Matius 4:18-22

Tema : Minter Kuikutken Pendilo Tuhan

Tujun : Mamre :

1) Nuriken dolat Tuhan tupung ndilo ajar-ajarNa

2) La ertahan ras ertaktak i bas ngikutken Tuhan

Penjelasen Bahan Ogen

Bahan ogen nuriken kerna pendilo Tuhan Yesus mana ajar-ajarNa si pemena, e me Simon Petrus ras Andreas (duana ersenina) bage pe Jakup ras Johanes (duana ersenina). Sope turi-turin kerna pendilo Yesus man ajar-ajarNa enda, pasal 4 iawali alu pencuban i gurun pasir. Kenca enggo italukenNa pencuban i bas Iblis nari, Yesus menaken pelayanenNa i Kapernaum i daerah Sebulon ras Naptali alu ngajar kalak si labo bangsa Yahudi. Yesus meritaken kerna berita pertobaten ras kinirajan surga si enggo ndeher (ps. 4:17).

Sanga Yesus menaken pelayanenNa je IA ndilo ajar-ajarNa si pemenana. I bas pendiloNa enda lit piga-piga hal si menarik. Si pemena, inisiatif ibenaken i bas Yesus nari si ndilo ajar-ajarNa. Ertina, Dibata si erinisiatif ndilo manusia guna jadi alatNa. Si peduaken, pendilo Yesus enda labo erpalasken ukuren doni enda, tapi erpalasken misi keleng ate Dibata nandangi kerina manusia. Sebab adi siidah status sosial Simon, Andreas, Jakup ras Johanes, e me kalak si biasa-biasa saja, penjala nurung ngenca, labo kalak si meganjang kedudukenna i bas strata masyarakat Yahudi. Si peteluken, tek ajar-ajar e nandangi pendilo Yesus amin pe lenga itandaina ise Yesus enda. E maka kenca enggo ibegina pendilo Yesus, minter itadingken ajar-ajarNa kerinana, pendahin ras keluargana. Kai si ilakoken ajar-ajar enda banci inen sebage simbolisasi pertobaten, e me nadingken masa lalu bengket ku bas kegeluhen si mbaru. Tapi banci ka inen sebage simbolisasi komitmen si tuhu-tuhu nandangi pendilo Dibata guna jadi alatNa. Komitmen si tuhu-tuhu i jenda berkaiten ras keputusen ajar-ajar njadiken pendilo Yesus sebage prioritas si utama i bas kegeluhen. Si menarik i jenda, la lit ituriken kerna keragu-raguan ajar-ajar e nandangi kegeluhenna (nafkah ras keluargana). Sebage manusia biasa tentuna merupaken hal si wajar adi lit keraguan entah pe kekuatiran nandangi kegeluhen i bas doni enda, tapi i bas Markus 10:29-30 je ajar-ajar iyakinken Yesus kerna pemenuhen kebutuhen geluh i bas Dibata nari. I bas ngaloken pendilo Dibata, si niperluken e me kiniteken, entah pe beriman bahwa Dibata pasti ncukupi kerina si nibutuhken ajar-ajar e guna kegeluhenna.

Pengkenaina

Hal si penting si pemena si banci sirenungken e me, Dibata si ndilo kita e me Dibata si erkuasa, adi Dibata si enggo berinisiatif ndilo kita jadi alatNa berarti enggo isikapken Dibata kai-kai saja si nibutuhken kita guna ndalanken misiNa bage pe guna kegeluhenta i doni enda. E maka si niperluken i jenda e me kinitekenta, yakin kita bahwa Dibata nemani ras mperlengkapi kita i bas kita ndalanken misiNa. Memang enda labo hal si murah guna ndalankenca. Lit jatuh bangunna. Ajar-ajar Yesus pe lit paksana ragu-ragu, bahkan nadingken Yesus sanga Yesus lit i bas kiniseran, tapi i bas kitab Injil ras Perb. Rasul, teridah bahwa pada akhirna ajar-ajar e ipake Dibata jadi alatNa guna pembarken Berita si Meriah. Si paling penting i jenda, e me nggit kita erproses ngikutken peraten Dibata alu cara Dibata memproses kita i bas kegeluhenta.

Pengurus Mamre e me leader sekaligus servant, pemimpin sekaligus pelayan. Sebage pemimpin tentuna perlu isedari bahwa pemimpin e me ikuten entah pe teladan man si debanna. Sebage pelayan perlu isedari konsekuensina ndahiken dahin Dibata kai pe resikona. Ertina, pasti lit tantangen i bas kita ndahiken misi Kristus, tapi bagi temanta sendah, “Minter kuikutken pendilo Dibata”, e me persinget sekaligus pergegeh man banta bahwa si ikutken kita e me Dibata si erkuasa.

BIMBINGEN PA PERMATA TGL. 14 - 20 MARET 2016

Nrs. Bp. Rey Tarigan

Tuhu Nge Tuhan Yesus e Mate janah Keke Mulihi?

(Jumat Agung - Sabtu Pengarapen - Paskah)

1 Korinti 15:3-4

Gelah PERMATA GBKP:

1) Nuriken kesaksin Paulus kerna kematen bage pe kekeken Yesus Kristus

2) Tetap tek kerna kematen bage pe kekeken Tuhanta Yesus Kristus i bas kegeluhenna

Metode : Nonton bareng “Passion of the Christ”

Penjelasen Bahan Ogen

Bahan ogen merupaken kesaksin rasul Paulus nandangi Yesus Kristus si enggo keke i bas kematen nari. Kesaksin enda merupaken penegasen rasul Paulus kerna kinitekenna (pengakuan iman) nandangi Yesus Kristus sekaligus pengajuk man perpulungen Korinti gelah  paguh kinitekenna i bas Kristus. Inti kesaksin rasul Paulus i bas ay, 3-4 merupaken palas (si pentingna kel) kiniteken Kristen e me kematen Kristus guna nebusi dosa manusia ras kekeken Yesus Kristus. I bas ay. 12 teridah bahwa i tengah-tengah perpulungen Korinti lit si la tek nandangi kekeken i bas si mate nari. Padahal kekeken Yesus i bas kematen nari e me merupaken palas kiniteken kalak Kristen. I bas ay. 14 ikataken rasul Paulus, “Adi Kristus la ipekeke Dibata i bas si mate nari, sia-sia me berita si isehken kami, janah sia-sia pe kinitekenndu”. Ertina kekeken e tuhu-tuhu terjadi, labo kejadin si ikarang-karang, tapi kejadin si memang enggo irencanaken Dibata guna keselamaten kalak si tek man Yesus Kristus.

Adi sioge secara keseluruhen pasal 15 enda, tuhu-tuhu rasul Paulus berusaha meyakinken perpulungen Korinti kerna kekeken Yesus Kristus i bas si mate nari. Lit 19 ayat i bas total 58 ayat i bas pasal 15 enda si membahas kerna kekeken Yesus Kristus. Ertina banci ikataken bahwa i bas perpulungen Korinti enggo melala perpulungen si terpengaruh ajaren-ajaren sesat si ngajarkenca bahwa la lit kekeken i bas si mate nari. Enggo melala perpulungen si meragukan iman akan kebangkitan Yesus Kristus. Tapi i bas kesaksin rasul Paulus enda iarapken gelah perpulungen e semakin iteguhkan kinitekenna amin pe la iidahna secara langsung kekeken Yesus Kristus.

Pengkenaina

Tema PA PERMATA sendah merupaken penungkunen, tuhu nge Tuhan Yesus e mate janah keke mulihi? Jabapenna tentu saja tuhu Tuhan Yesus enggo mate janah keke mulihi. Engkai makana isungkun kerna kematen ras kekeken Yesus Kristus man PERMATA? E merupaken penungkunen si sifatna perenungen evaluatif nandangi kinitekenta man Yesus Kristus Juruselamatta. Payo nge tek kita bahwa Yesus enggo mate ras keke mulihi? Adi payo, apai buktina bahwa Yesus e enggo mate ras keke mulihi? E penungkunen si khas logika, entah pe menggunakan kekuatan logika untuk membuktikan sesuatu yang tidak bisa dilogikakan. Adi bas bahasa Latin lit istilah Deus semper maior est, ertina Allah selalu lebih besar, selalu lebih berkuasa, seh makana la banci terlogikaken manusia kuasa Dibata e. E maka hanya melalui kiniteken saja banci teraloken kuasa Dibata si mbelin e. Hal si paling penting e me labo hanya soal ngatakenca bahwa tek kita nandangi kekeken Yesus tapi kinitekenta e arus lit output-na si ncidahkenca bahwa memang tuhu kita tek.

Metode PA PERMATA sekali enda e me “Nonton Bareng” film The Passion of the Christ. Mel Gibson, sutradara film enda ngatakenca, "This is a movie about love, hope, faith and forgiveness. He [Jesus] died for all mankind, suffered for all of us. It's time to get back to that basic message. The world has gone nuts. We could all use a little more love, faith, hope and forgiveness." Ertina kurang lebih ibas bahasa Indonesia, “Ini adalah film tentang kasih, pengharapan, iman, dan pengampunan. Yesus mati untuk semua manusia, menderita untuk kita semua. Sekarang saatnya untuk kembali kepada pesan semula. Dunia semakin rusak. Kita membutuhkan lebih banyak kasih, iman, harapan, dan pengampunan”. Semoga film enda banci nambahi ketutusenta ibas erkiniteken man Yesus Kristus.