Khotbah GBKP Minggu Tgl. 3 April 2016

KHOTBAH MINGGU GBKP TGL. 3 APRIL 2016

Minggu Kenca Paskah (Quasimodogeneti : Bagi Anak Si Mbaru Tubuh)

Pdt. Larena br. Sinuhadji (Nd. Reynard Tarigan)

Invocatio : “Malem me ate kalak si la megiken pedah kalak jahat, si la ngusih perbahanen kalak perdosa, si la erteman ras kalak megombang man Dibata” (Masmur 1:1)

Ogen : Johanes 20:19-31 (Tunggal)

Khotbah : Masmur 150 (Responsoria)

Tema : PUJILAH TUHAN KERINA SI ERKESAH

Penjelasen Bahan Pustaka Si Badia

Bahan khotbahta e me bagin terakhir i bas kitab Masmur si isina e me kap seruan Pemasmur man perpulungen gelah memuji Tuhan. Memuji Tuhan erkiteken perbahanen Tuhan si mbisa ras erkitken kemulian Tuhan si meganjangNa si enggo icidahkenNa ku tengah-tengah kegeluhen manusia. Memuji Tuhan alu erbage-bage alat musik: terompet, suling, tanduk, malu gendang dingen landek, kulcapi, ngembus serune, penganak ras sora gung si erbolo-bolo. Ras seruan Pemasmur si pendungina, maka kerina si erkesah memuji Tuhan. Ertina, asum ibereken Tuhan denga kesempaten nggeluh, bernafas, maka tetaplah kita memuji Tuhan. Sabab jelas kalak si mate la nari ia banci memuji Tuhan.

Bahan ogenta ngerana kerna Tuhan Yesus si ncidahken diriNa man ajar-ajar. Ay. 19-23, Yesus ncidahken diriNa man ajar-ajarNa ras i bas ay 24-29 Yesus ncidaken diriNa secara khusus man Tomas. I ja kekeken Tuhan Yesus labo hanya isaksiken secara pribadi, Maria Magdalena, tapi pe isaksiken ajar-ajarNa. Kondisi paksa si e ajar-ajar lit i bas kebiaren, i ja pulung ia kerina ras-ras i bas sada ingan, janah perban mbiarna ia man kalak Jahudi si erkuasa e maka ierukna pintun. Kebiaren ajar-ajar cukup beralasan, sabab Yesus enggo ianggap pemberontak pemerintah Romawi, la banci lang ajar-ajarNa ianggap pengikut pemberontak (bdk. Joh. 19: 12). Tapi Yesus si enggo keke reh guna mereken kemalemen ate man ajar-ajar. I ja ibabaNa salam mejuah-juah (Terj. Alkitab TB-LAI, “Damai sejahtera bagi kamu”). Icidahken Yesus  tanNa ras awakNa man ajar-ajarNa si erbahanca meriah kel ajar-ajarNa ngidah Tuhan Yesus (bdk. Lukas 24:39, maka Jesus labo hantu si la lit nahena ras dagingNa kenca kekekenNa). Tapi  genduari kehadiren Yesus mampu menembus ruang si tertutup, i ja pa pe banci hadir (omnipresence). Je nari ipetetap Yesus ukur ajar-ajarNa, alu kata-kata, “Tetapkenlah ukurndu. Bagi Aku isuruh Bapa, bage me pe kam Kusuruh”. Je nari isempulken Yesus Kesah si Badia man ajar-ajarNa.

Je nari Yesus encidahken diriNa man Tomas kenca erbahan pernyataan man ajar-ajar si deban kenca enggo begina kesaksian teman-temanna, “Adi la kin kuidah bekas paku i bas tanNa, janah adi la kin kutamaken jari-jaringku ku je bage pe adi la kin kutamaken tanku ku awakNa, labo aku tek”. Tomas tek nandangi kekeken kalak i bas si mate nari, tapi la ia tek maka Yesus keke alu daging kulaNa, sabab i bas keyakinen kalak Jahudi keberadaan roh la banci ilepasken i bas tubuh. Adi tubuh enggo mate, banci jadi roh tetap nggeluh tapi keberadaanna labo nge jelas. E maka jelas Tomas la tek man Yesus si enggo keke, adi kin la itamakenna jari-jarina ku bas tan ras awak Yesus. Keraguan Tomas minter ijawab Tuhan, i ja reh Tuhan i bas kinipulungen ajar-ajar i ja pintun enggo ieruk, tapi banci Yesus bengket ku bas. Kenca enggo dung Yesus nehken kata mejuah-juah e maka nina, “Tamakenlah jari-jarindu ku jenda, janah nehenlah tanKu. Dadaken tanndu, tamaken ku awakKu. Ola nai la tek, tapi teklah!” Minter ijawab Tomas, “O Tuhanku, O Dibatangku!” Nina Yesus man Tomas, “Ma perbahan idahndu Aku nge maka kam tek? Malem tuhu-tuhu ate kalak si tek man bangKu aminna pe la Aku idahna”. Secara fisik la lit pengalamenta bagi ajar-ajar Yesus si menyaksiken kekeken Yesus, i ja Yesus encidahken diriNa man banta, tapi tek kita. Malem tuhu-tuhu ateta aminna pe la si idah Yesus si keke, tapi tek kita erkiteken kuasa kekekenNa si mpelimbarui kita, nelamatken kita, nampati kita, mpegegehi kita.

Aplikasi

Tema-nta i bas minggu enda e me “Pujilah Tuhan kerina si erkesah”. Geluhta e me kap geluh si memuji ras memuliaken Tuhan i bas kerina paksa, labo hanya bas Rumah Pertoton tapi i ja pe ras katawari paksa pe kita mpermuliaken Tuhan. Engkai maka kita arus muji Tuhan? Selain kita sebage tinepa, maka enggo ibereken Dibata keselamaten, keterkelinen arah pengorbahen Tuhan Yesus Kristus. Kinitekenta man Yesus si enggo keke mabai kita tetap setia ernalem man baNa. Seruan, “O Tuhanku, O Dibatangku”, labo hanya seruan si ndarat i bas biberta nari tapi seruan kiniteken maka Tuhan Yesus ngenca Tuhan ingan penalementa suari ras berngi. Kuasa kekekenNa si jadi andalen i bas kita ndalani kegeluhen enda, termasuk perbeben si ialami kita. Arah kemenangen demi kemenangen si ialami kita mabai kita tetap muji ras mpermuliaken Tuhan.

Termasuk arah pengkebet geluhta pe ilumbaken tetap kita mpermuliaken Tuhan. Invocationta mabai kita tetap nggeluh bagi si ngena ate Dibata. Ula begiken pedah kalak jahat, ula ngusih perbahanen kalak perdosa ras ula erteman ras kalak si megombang man Dibata. E maka perlu tetap kita metenget ras ise kita bergaul. Ras ise kita ndeher ras bergaul tep-tep wari sangat menentuken karakterta. E maka ertemanlah man kalak si banci membangun imanta gelah alu bage reh ngasupna kita mpermuliaken gelar Tuhan i bas kegeluhenta (bdk. 1 Kor. 15:33, “Ola kal kam papak! Pergaulen si la mehuli, ncedaken biak si mehuli”). Tetaplah kita bergaul rembak ras Tuhan desken sekalak anak si mbaru tubuh maka katawari paksa pe tetap ia butuh orang tuana, bergantung sepenuhna man orang tuana. Bagem iarapken selaku kalak si tek tetap kita rembak ras Tuhan gelah pancaran Kristus banci katawari paksa ersinalsal i bas geluhta.

Cataten tambahen arah Pt. Bp. Novi Ginting :

Kesah si paling mahal i bas kegeluhenta. Ketika kita banci denga erkesah sada kesempaten banci kita muji Tuhan.