Bimbingen Khotbah Minggu 20 Maret 2016

BIMBINGEN KHOTBAH MINGGU 20 MARET 2016

Minggu Palmarum (Lambe)

Pdt. Larena br. Sinuhadji (Nd. Reynard Tarigan)

Invocatio : “Adi pengarapenta nandangi Kristus, terjeng kegeluhen i bas doni ngenca, maka kita me si liahna ibas kerina manusia” (1 Kor. 15:19)

Ogen : Jesaya 50:4-9a (Tunggal)

Khotbah : Lukas 19:28-40 (Tunggal)

Tema : ERSURAK ERKITEKEN ERPENGARAPEN

Penjelasen Bahan Pustaka Si Badia

Judul perikopta e me kap “Surak-surak si meriah ibas pintu gerbang kuta Jerusalem”, sada peristiwa i ja Yesus imuliaken jelma si nterem asum Ia bengket ku bas kuta Jerusalem. Peristiwa enda ilatarbelakangi litna misi si la sedalanen (berbeda) antara Yesus ras jelma si nterem termasuk ajar-ajarNa. Sura-sura jelma si nterem bage pe ajar-ajarNa, Yesus menjadi raja doni, si banci menggulingken pemerentahen Romawi si paksa si e menjajah Israel. Sedangken misi Yesus ibas BapaNa nari e me kap Ia jadi Juruselamat, si nebusi dosa-dosa manusia. Jadi labo hanya pembebasen (kemerdekaan) secara fisik tapi pe pertendin. E maka piga-piga kali pe Yesus ngerana kerna kiniseran si bakal ialamiNa, la pernah iantusi ajar-ajarNa, bahkan itulakna.

Enda me perdalanen Yesus si terakhir ku Jerusalem, i ja umur 12 tahun pe pernah Ia ku Jerusalem. Jerusalem sebage pusat pemerintahen, sekaligus pusat keagamaan. E maka banci kataken, tupung wari raya agama, enterem kalak pulung i Jerusalem, japa nari pe gia, reh ku je. Enggo ieteh Yesus maka Ia bakal ngenanami kiniseran ras mate. Ieteh Yesus maka kematenNa la banci itawar-tawar. Sementara kalak si nterem ersura-sura maka Yesus ku Jerusalem guna merayaken Paskah sekaligus jadi raja.

Kenca Yesus nuriken perumpamaan kerna duit emas (Bhs. Ind. : uang mina, ay. 11-27), maka iteruskenNa perdalanenNa ku Jerusalem (Bhs. Ind. : Yesus mendahului mereka dan meneruskan perjalananNya ke Yerusalem). Teluna kitab Injil si deban, nuliskenca maka Yesus ras ajar-ajarNa radu berkat. Banci jadi bas kitab Injil Lukas Yesus arah lebe erdalan janah arah pudiNa ajar-ajarNa, tapi banci ka leben sitik Yesus asangken ajar-ajarNa guna mpersiapken kai si niperlukenNa i Jerusalem.

La nari ndauhsa Jerusalem nari, e me kap i uruk Seton deherken Betpage ras Betanin (kurang lebih 3 Km nari ku Jerusalem), isuruh Yesus dua kalak ajar-ajarNa mpersiapken kendaraan, e me kap kelde si bakal iersak Yesus. Kelde si lenga pernah iersak kalak. Kelde kalak si deban ibutuhken Yesus sebage alat transportasi bengket ku Jerusalem, “To lawes, leben kam ku kuta si arah lebendu ah. Seh kenca kam ku bas kuta e, idapetindu kari sada kelede tambat, si langa pernah iersak kalak. Osari nalina jenari baba kelede e ku jenda. Adi lit kari kalak nungkun man bandu, “Engkai maka itangtangindu?” katakenlah, “Perlu Tuhan”. (Injil Markus : “Perlu Tuhan, minter ka kari iulihkenNa ku jenda”). Kai si iperentahken Yesus idalanken ajar-ajarNa alu patuh. Engkai makana kelde la kuda (sabab biasa raja ngersak kuda)?

Hal enda situhuna penggenapen nubuaten Nabi Sakaria (Sakaria 9:9-10, “Ersuraklah, ersuraklah, o anak kuta Sion! Ersuraklah meriah, o kalak Jerusalem! Nehenlah, rajandu reh ndahi kam! Ia dem kemulian, dem kemenangen. Tapi meteruk ukurna, Ia reh ngersak kelede; kelede si nguda denga e me anak indung kelede. Nina TUHAN man bangsaNa, “Kusasapken me gereta perang i Israel nari bage ka pe kerina kuda i Jerusalem nari; panah si ipake ibas perang, Kukernepken seh keri. Rajandu e mperdameken bangsa-bangsa; i lawit nari seh ku lawit iperentahna kerina, mulai i Lau Eprat nari, seh ku tampuk doni enda.").

IersakNa kelde, enda merupaken simbol kiniteruken ukur. Kerendahan hati si tetap icidahken Yesus ibas pelayanenNa seh ngayak Ia ndungi karya keselamaten si ibabaNa. Ertina Yesus reh maba dame, maba perdamen man Jerusalem ras bangsa-bangsa si deban. Yesus reh alu dem kekelengen. Janah tuhu teridah kesederhanaan sabab kelde si iersakNa pe, kelde pinjamen labo keldeNa sendiri.

Dua hal lebe si menarik si banci jadi refleksinta, e me si pemena, si empu kelde. Perlu kita ngusih si empu kelde sebab ia tulus mereken kelde si lenga pernah ipake. La lit penolaken, la lit jungut-jungut sabab ietehna enda guna Tuhan. “Perlu Tuhan”. Ertina,  bersykurlah, ngataken bujurlah adi ipake Tuhan denga tenaganta, pikirenta, dirinta, materinta, rsd. Sabab perlu Tuhan, ipakeNa kita jadi perpanjangen tanNa. Banci jadi la tulus kita melayani, mbue siban perhitungenna, mbue siban alasenna guna kita ipake Tuhan. Si peduaken, termasuk kelde. Kelde usur ipake sebage gambaren rubia-rubia si bodoh. Tapi si luar biasa Tuhan Yesus nggit make kelde enda. Kelde si sederhana enda ipake Tuhan Yesus guna naruhken Ia seh ku Jerusalem guna mate i kayu persilang, guna nebusi dosa-dosa manusia. Ertina, ise pe kita, erbage-bage latar belakangta, entah lit keterbatasen kita subuk fisik, kemampuan, asal nggit saja kita ipake Tuhan pasti Tuhan mperlengkapi kita.

Kerina jelma ersurak-surak ibas ngalo-ngalo Yesus. Alu sora si megang ipujina Dibata, meriah ukurna perban tanda sengget si idahna. Ipasu-pasu gelah Raja si reh ibas gelar Tuhan! Keriahen i Surga ras pujin man Dibata (bdk. Mas. 118:26). Kecuali kalak Farisi si nuruh gelah Yesus mpesinik ajar-ajarNa. Banci jadi cian ras merawa atena erkiteken enggo lebih populer Yesus asangken kalak Farisi. Tapi ngaloi Yesus, “Adi sinik kalak enda, batu-batu enda me si ersurak”. Ertina, adi sinik pe kalak si nterem, alam termasuk batu-batu pe la tergengkenca sinik, guna spontan ersurak ncidahken kehamatenna man Yesus (bdk. Asum Yesus mate, kire-kire Rumah Pertoton pe erbelah dua).

Ibas bahan ogenta, e me kerna kepatuhen suruh-suruhen ibas ndalanken sura-sura Dibata i tengah-tengah bangsaNa. Biak si arus lit ibas serayan Tuhan : nggit iajari Tuhan ras tetap ernalem man Tuhan, i ja tep-tep erpagi-pagi ipekeke Tuhan ukurna lako banci ndengkehken pengajaren Tuhan. E maka Tuhan memperlengkapi serayanNa. Aminna pe mbue perbeben (ngenanami kiniseran fisik, megombang kalak man bana, iciduri kalak, rsd.) la pernah ia surut guna ndalanken si ngena ate Dibata sebab Tuhan si erdolat penampatna, si ngkapiti ia. Kai si tersurat ibas kitab Jesaya merupaken nubuaten ras enggo igenapi i bas Yesus Kristus ngenanami kiniseran erkiteken ketaatenNa man BapaNa.

Pengkenaina

Ibas Minggu Palmarun enda mulihi Firman Tuhan mpesingeti kita maka Yesus Raja di atas segala raja reh Ia alu kiniteruken ukur, babaNa dame ras kekelengen. Enda me gundari si iarapken rayat, enterem jelma pemimpin si merakyat si maba kedamen ras kekelengen. Termasuk kehadirenta pe maba kedamen ras kekelengen.

Jelma si nterem ersurak-surak erkiteken tanda-tanda sengget si enggo icidahken Yesus selama enda (Yesus mere man 5000 kalak, pepalem kalak si gadem iseluki setan, diberu si enggo 12 tahun pendarahen, rsd.). Ertina, kalak si nterem bersukacita erkiteken mujijat jasmani si enggo idahna. Jadi perenungen banta, maka arusna kita lebih bersukacita erkiteken banci sigejapken mujijat rohani (kekeken Yesus ibas si mate nari), si banci mereken keselamaten  jiwanta. E maka nina ivocationnta, “Adi pengarapenta nandangi Kristus, terjeng kegeluhen ibas doni ngenca, maka kita me si liahna ibas kerina manusia” (1 Kor. 15:19). Tek kita man Yesus ula hanya terjeng ndarami mujijat jasmani, kesuksesan materi (teologi sukses), tapi lebih nandangi Yesus si enggo mereken keselematen man banta.