Bimbingen PA Kategorial Tgl. 29 Februari - 5 Maret 2016

PA PERMATA TGL. 29 FEBRUARI - 6 MARET 2016

Pdt. Larena br. Sinuhadji (Nd. Reynard Tarigan)

Pemimpin si Pentar

1 Korinti 2:1-5

Gelah PERMATA GBKP:

1) Nuriken kerna proses pembentukan kepemimpinen i bas diri Paulus

2) Makeken kepentaren Dibata i bas kepemimpinen selaku anak si nguda

Metode : roleplay/games kepemimpinan

Penjelasen Bahan PA

Rasul Paulus pernah tading i Korinti 18 bulan dekahna guna pembarken Berita si Meriah (Perb. Rasul 18:1-8) kira-kira tahun 50 Masehi. Kurang lebih 5 tahun kenca si e, rasul Paulus nulisken suratna si pemena man perpulungen i kota Korinti. Surat Rasul Paulus man perpulungen Korinti enda tujunna guna nehken pedah-pedah (penggembalaan) rikutken situasi si berkembang i perpulungen Korinti paksa si e. Situasi si berkembang paksa si e ijelaskan rasul Paulus i bas ps. 1:10-17, e me terjadi perselisihen i antara kelompok-kelompok si lit i bas perpulungen Korinti. Persoalen si deban ituriken rasul Paulus i bas ps. 1:18-31, lit denga anggota perpulungen si mengandalken kepentaren manusia asangken kepentaren Dibata.

Bahan PA sekali enda adi rikutken Alkitab Terjemahan Baru (TB) LAI nari merupaken sada bagin i bas ps. 1:19-2:1-5, alu judul “Hikmat Allah dan hikmat manusia”. I bas Alkitab Bahasa Indonesia Sehari-hari (BIS) ps. 2:1-5 merupaken bagin si terpisah alu judul “Berita tentang kematian Kristus disalib”. Pustaka Si Badia seri ras Alkitab BIS judulna “Berita kerna kematen Kristus i kayu persilang”. Ps. 2:1-5 merupaken penegasen rasul Paulus tangtangna ia meritaken Berita si Meriah i Korinti, la ipakena kebeluhen ras kepentarenna sebage manusia guna meritaken Berita si Meriah, tapi ipakena Kuasa Dibata (ay. 5). Adi sinen latar belakang rasul Paulus i bas Perb. Rasul 22:6-16; 26:12-18, situhuna lit kebeluhenna guna nerangken isi kitab Taurat ras kitab Nabi-nabi, tapi kenca itandaina Kristus maka kerina pemetehna e ianggapna sebage hal si sia-sia (Pil. 3:8). E maka iandalkenna kuasa Dibata, gelah e pe jadi usihen man perpulungen Korinti.

Pengkenaina

Tema: “Pemimpin si pentar”. Tujun, gelah PERMATA GBKP : 1) Nuriken kerna proses pembentukan kepemimpinen i bas diri Paulus. 2) Makeken kepentaren Dibata i bas kepemimpinen selaku anak si nguda. Adi rikutken tema e maka pemimpin si pentar e me pemimpin si mengandalken kepentaren Dibata. Adi lit pe umpamana kebeluhenna si meganjang, labo e ijadikenna sebage palas, tapi kuasa Dibata si ijadiken palas i bas ia memimpin. I bas hal si sada enda, labo hal si gampang sebab ibutuhken kiniteruken ukur guna mengakui bahwa kuasa Dibata lebih besar asangken kebeluhenna.

Proses si cukup gedang i bas Paulus guna banci ibentuk Tuhan seh makana lit perobahen si mehuli i bas dirina (band. Gal 1:17), meteruk ukurna, dem i bas ia kekelengen, meriah ukurna aminna pe ipesega-sega kalak rsd. Ertina, PERMATA iarapken pe i bas kengudaanna tetap nggit ibentuk Dibata gelah menjadi pemimpin si pentar. Lebe kepentaren e nggeluh i bas dirina sendiri. Terpimpinna dirina (mandiri) lope ia menjadi pemimpin man kalak si deban. Janah kepentaren si lit bas PERMATA arus mampu ipakekenna guna menjadi contoh (teladan) man kalak si deban, subuk i bas perukuren, perbahanen, pengerana, kesetian, kebadian, rsd. (bdk. 1 Tim. 4:12).

BIMBINGEN PA MAMRE TGL. 28 FEB. - 5 MARET 2016

Pdt. Larena br. Sinuhadji (Nd. Rey Tarigan)

Ngangkai Karakter Mamre

Ogen : Job 40:6-10

Tema : Jile-jele (Biak/Karakter) Mamre

Tujun : Mamre Ngasup :

1) Mereken pengakunna man Dibata arah pertoton kerna perbahanen si ncedai (melketi) dirina

2) Nuriken perayakenna bas geluhna, je nari nuriken kai jile-jilena sedekah enda

3) Njadiken jile-jele (biak/karakter) Mamre si tuhuna e me ayat 10

Metode : Membaca naratif dan partisipatif

Penjelasen Ogen

Job mengalami kiniseran si luar biasa, ps. 1, anak-anakna mate kerina, kebayakenna kernep kerina, suruh-suruhenna kerina mate, la bo je saja, ia pe ikenai pinakit kulit, ugah si mekelek tapak-tapak nahena nari seh ku piserna. Bahkan si erbahanca tambah suina, ndeharana sendiri si kin iarapkenna jadi penolong, penyemangat malah njunguti Job (Istri perongrong buka penolong). Tapi si patut man usihen, Job tetap nggeluh erkemalangen man Tuhan, la lit ibelaskenna cakap si la mehuli kerna Tuhan (ps. 1:10b). Sahabat-sahabatna kerina (Billdat, Sopar, Elipas) nalahken Job tapi kurang ibahanna solusi rikutken mpegegehi Job.

Ope teks si jadi bahan renungenta si ibere judul “Tuhan menantang Ayub” (TB - LAI), maka banci siidah i bas proses Job ngalaken kiniseranna walaupe i bas pasal 1 ikataken erkemalangen man Tuhan, tapi i bas realitana Job merasa diri benar dingen andalkenna gegehna. I jenda Tuhan menantang Job sebage seorang laki-laki (budaya Patriakal), si lebih itandai megegeh, lebih mengandalken rasio, rsd. Apakah arah Tuhan menantang Job, sedar Job (nggit kam gundari talu) entah malah itoganna Tuhan? Tapi banci siidah i bas jawaben Job maka tuhu-tuhu ia mpeteruk dirina i lebe-lebe Tuhan (ay. 4-5). Je nari i bas ay. 6-10 ngerana Tuhan sekali nari i bas angin meter nari. Ipindoken Tuhan gelah Job mereken jawab kerna penungkunen Tuhan adi kin tuhu-tuhu ia dilaki (selesaikan secara bertanggung jawab, ula cengeng). Penungkunen-penungkunen retoris si la perlu jawaben sabab e kerina biak Tuhan. Tuhan bujur, la ise pe pang ngataken Tuhan e la bujur. La mungkin Job nalahkan Tuhan gelah teridah ia benar. Tuhan megegeh, dingen manusia enggo jelas talu ibahan Tuhan sabab Tuhan si nepa manusia. Sora manusia hanya mampu berjarak piga-piga meter tapi Tuhan sorana terbegi ku kerina doni enda arah lenggur.

E maka nina Tuhan, gelah Job makeken kemulian, kedolaten, kehamaten ras kehagan, maka aminna pe lit kiniseran si nderpa geluhta tetap ipasu-pasu Tuhan bahkan jadi pasu-pasu man kalak si deban.

Pengkenaina

Tuhan e medolat, erkuasa i bas kegeluhenta janah la lit kai pe kita i lebe-lebe Tuhan. E maka tetap sedari kemahakuasaan Tuhan i bas kegeluhenta. Rikutken tujun maka :

1) Mamre katawari paksa memohon ampun man Tuhan arah dosa-dosa si erbanca melket dirina. La lit kita manusia si sempurna, termasuk Job sendiri pe i bas perikopta enda. Sedar kita arah kesalahen entah kesilapen si ibahan kita. Kadang kita, khususna Mamre enggo pe ietehna salahna mela guna ngakui kesalahenna (egois) subuk man manusia bage pe man Tuhan. Merasa diri benar. Sekalak Pendeta si terkenal i bas salah sada acara i TV Swasta pernah ngatakenca ciri orang yang selalu merasa benar e me: Marah jika ditegur. Selalu merasa orang lain yang tidak benar. Tidak akan pernah minta maaf. Hanya ingin dipuji, dimengerti dan menjadi pusat perhatian. Tidak akan pernah mengambil pelajaran di balik masalah kehidupan. Lit kang perpayona kai si ikataken sekalak Pendeta enda. Adi lit denga karakter si bage, tentuna perlu kita memohon ampun man Tuhan ras berobah.

2) Tetap megegeh i bas ngalaken kiniseran.

3) Janah njadiken dirina sebagai saksi Kristus. Kemulian Tuhan, kedolatan, kehamaten ras kehagan Tuhan nggeluh i bas diri Mamre. Labo arah nggeluh si “sok jaim”, tapi meteruk ukur, dem kekelengen, kiniulin, rsd. Sabab melala gundari jelma merhat ihamati (iergai), merhat lalap tampil, merhat ijadiken ingan penggurun, tapi karakterna la banci jadi usihen. Situhuna la perlu nari kita ndarami kemulian, kehagaan sebab tempas Dibata enggo lit bas kita asum kita itepaNa. Mulia kel kita manusia i tepaNa. Walaupe enggo ceda erkiteken dosa, tapi dareh Kristus mpengasup kita mulihi ncidahken kemulian, kedolaten, kehamaten, kehagan Tuhan i bas dirinta arah pengkebet geluhta si tep-tep wari.