Bimbingen Khotbah Minggu 6 Maret 2016

BIMBINGEN KHOTBAH MINGGU TGL. 6 MARET 2016

MINGGU PASSION V LETARE (TERIDAHLAH)

Nrs. Bp. Rey Tarigan

Invocatio : “Tapi tedis Sakeus janah nina man Tuhan, “Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat.” Ngaloi Jesus nina, “I bas wari enda enggo reh keselamaten man isi jabu enda. Kam pe kesusuren Abraham kap.” [Lukas 19:8-9]

Ogen : Josua 5:9-12

Khotbah : 2 Korinti 5:16-21

Tema : TINEPA SI MBARU

Penjelasen Bahan Pustaka Si Badia

I bas paksa Yesus nggeluh denga, lit pajak pertambahan nilai atas harta benda si igelari cukai si iberlakuken man kerina rakyat i bas wilayah penjajahan Romawi. I bas wilayah Yudea cukai e iserahken ku Gubernur Romawi, i bas wilayah Galilea iserahken ku Herodes Antipas. Lit petugas-petugas khusus si ipekerjaken pemerentah Roma guna muat cukai enda. I bas kitab Injil si terkenal kerna petugas-petugas cukai enda e me umpamana Lewi (Mrk. 2:14) ras Sakeus, duana kalak Yahudi. Lit perbedaan antara Sakeus ras Lewi enda. Lewi, ia hanya petugas bawahan, sedangken Sakeus e me kepala kerina si muat cukai bagi Lewi ndai, si ngaloken kerina cukai i bas wilayah Jeriko. Banci ikataken jabaten Sakeus enda setara ras Herodes Antipas, erkiteken itukurna hak guna ngaloken cukai e man pemerentah Romawi alu cara leben igalarina kerina cukai si itetapken pemerentah Roma i bas wilayah Jeriko. E maka banci sibayangken uga Sakeus muat keuntungen arah cukai enda, banci ikataken cara-cara pemerasen pe ilakokenna erkiteken ia arus muat keuntungen si lebih asangken si enggo igalarina ku pemerentah Roma. I bas konteks enda me iteh engkai makana Sakeus enda imusuhi masyarakat Yahudi, labo saja erkiteken ia ianggap sebage kaki tangan penjajah, tapi ia pe ianggap sebage kalak si dosana mbelin kel. Tapi arah invocationta Sakeus ertobat (jera) erkiteken perjumpanna ras Kristus. Pertobaten Sakeus enda labo terjeng i biber saja, tapi lit bukti nyatana arah perbahanenna si berobah 180%.

Bahan ogenta ngerana kerna sunat sebage tanda perjanjin pasu-pasu Dibata man kalak Israel (bdk. Kej. 17:7-10). Josua iperentahken Dibata gelah nyunatken kerina dilaki si tubuh i bas perdalanen Mesir nari ku taneh Kanaan. Sunat enda labo terjeng seremonial tapi tuhu-tuhu sebage tanda bahwa generasi e enggo ipelimbarui ras ipasu-pasu Dibata, i bas Alkitab Bahasa Indonesia Sehari-hari (BIS) ikataken ay. 9a, “TUHAN berkata kepada Yosua, “Hari ini kehinaan kalian sebagai budak-budak di Mesir sudah Kulenyapkan”. I bas Padan si Mbaru, sunat e enggo igantiken alu baptisen. Baptisen e me tanda pertobaten (bdk. Perb. Rasul 2:38; Roma 6:1-4). Baptisen enda labo terjeng tanda seremonial saja tapi tanda nggeluh i bas pertobaten si arus teridah i bas kegeluhen si tep-tep wari.

I bas bahan khotbahta, 2 Kor. 5, rasul Paulus mereken pedah-pedah pengajaren kerna pertobatan (kinijeran) si arus teridah buah-buahna secara nyata i bas kegeluhen sebage “ciptaan baru” (ay. 17). Sebab paksa si e perpulungen Korinti lenga bertumbuh imanna seh makana melala denga usur terjadi perselisihen i bas perpulungen. I bas salah sada buku tafsir bahkan ikataken seh tahun 96 M (40 tahun kenca Paulus nulisken surat-suratna) lalap terjadi perselisihen i bas perpulungen Korinti enda (V.C. Pfitzner, 1999, hlm. 12).  I bas ay. 20 rasul Paulus bagi si mindo alu mesangat (memohon) man perpulungen Korinti gelah berobah, “Ipindo kami alu mesangat man bandu: bere min maka kam si gelgel nari ermusuhen ras Dibata banci ibahan Dibata jadi temanNa!” Nuduhkenca uga kerasna watak perpulungen Korinti enda. Tapi intina, Paulus erpengarapen gelah perpulungen Korinti enda nggeluh bagi tinepa si mbaru, si enggo iselamatken Kristus, e me nggeluh i bas pertobaten.

Pengkenaina

Tema i bas minggu enda e me “Tinepa si Mbaru”, arah piga-piga bahan Pustaka si Badia i datas enggo tangkas man banta kerina bahwa tinepa si mbaru enda sangat erat berkaiten ras pertobaten, nggeluh si mbaru i bas Kristus. Tema pertobaten situhuna merupaken tema si penting i bas Padan si Mbaru. Berita si tangtangna iberitaken Tuhan Yesus sanga Ia mbenakenca pelayanenNya e me berita kerna pertobaten (bdk. Mat. 4:17). Tobat ertina jera, la nai nggeluh i bas geluh si ndekah si bergelimang dosa, tapi nggeluh i bas kegeluhen si mbaru (keselamaten) si enggo ianugerahken Dibata i bas Yesus Kristus. Konsekuensina tentu saja arus terjadi transformasi entah pe perobahen si tuhu-tuhu, labo terjeng i biber saja, tapi i bas perukuren ras perbahanen pe terjadi perobahen si nyata.

Arus iakui bahwa i bas konteks gerejanta, pertobaten enda lenga mengakar. Pdt. A.G. Suka (alm.) i bas analisisna kerna pekabaran Injil i bas masyarakat Karo nai ngatakenca bagenda, “Injil di tengah-tengah orang Karo belum mengakar karena penginjilan yang dilakukan oleh NZG di tengah-tengah orang Karo kurang menekankan aspek pertobatan dan lebih menekankan aspek-aspek di luar Injil itu sendiri, seperti misalnya bidang kesehatan dan pendidikan formal, dsb.” (Beras Piher Vol. 3, No. 3 : September-Desember, 2004, hlm. 10). Rita Kipp Smith si pernah ngelakoken penelitian i bas masyarakat Karo sekitar tahun 1980-an ngatakenca bagenda, “Ethnic consciousness, political dangers, state encouragement, and the quest for education explain why many Karo became Christian but not necessarily what being a Christian means to them,” (Journal American Ethnologist, Vol. 22 (4), American Anthropological Association, 1995, hlm. 868-882), ertina kurang lebih, melala kalak Karo nai jadi kalak Kristen (istilah si nai “agama GBKP”) entah pe bergabung ku GBKP labo erkiteken pertobaten tapi erkiteken alasen-alasen si deban. Penungkunenna, apakah seh asa gundari melala denga jemaatta si lenga nggeluh i bas pertobaten?

Tek kita maka Kesah si Badia erdahin i bas gerejanta seh makana enggo melala perkembangen si semakin mehuli i bas gerejanta labo hanya i bas hal pembangunen-pembangunen fisik gereja tapi pe arah pembangunen-pembangunen geluh erkiniteken. Semakin melala jemaat GBKP si tuhu-tuhu itehna kai ertina jadi kalak Kristen, geluhna semakin berobah ku arah si semakin baik i bas perukuren, pengerana, ras perbahanenna. Si paling ideal memang para pemimpin memberikan contoh yang baik i bas pertobaten enda entah pe geluh bagi tinepa si mbaru. Tapi bagi ikataken Mother Teresa, “Jangan tunggu para pemimpin, lakukanlah pribadi lepas pribadi”. Sebab nggeluh i bas pertobaten enda lebih pas adi silakoken labo terjeng ikataken saja. I bas Minggu Passion V enda, mari radu ras sitekadken nggeluh i bas kegeluhen si mbaru, nggeluh i bas pertobaten, nggeluh bagi tinepa si mbaru, gelah teridah (Letare : Teridahlah) ku sekelewetta bahwa kita e me kalak si enggo iselamatken Yesus Kristus.