Bimbingen PJJ Tgl. 8 - 14 Maret 2015

BIMBINGEN PJJ TGL 08 - 14 MARET 2015

Kerjasama Ngawan ni Perpulungen ras Serayan Tuhan

Pdt. Larena br. Sinuhadji

Ogen :

1 Korinti 12:14-26

Tema :

Kinierbagen kap kebayaken

Tujun :

Gelah ngawan ni perpulungen :

1) meteh maka kinierbagen kap kebayaken sue ras ogen

2) meteh maka kinierbagen e jadi ‘potensi’ majeken kula ni Kristus

3) ngasup tetap kerja sama ras Serayan Tuhan bas Perpulungen

Penjelasen Bahan

Judul perikop enda “Melala ringring tapi kula sada nge.” Bagi kula si melala ringringna, bage me Kristus, aminna melala ringring e, tapi sada kula nge. Kinierbagen e, banci erkiteken suku bangsa, kalak bebas, budak, bayak, musil, kalak Yunani, kalak Jahudi, rsd. Kiniersadan banci terjadi adi sipelain-lain e tetap bergantung man Kristus si mpersadakennca.

Lit piga-piga hal si arus ijaga i bas membangun kiniersadan :

1. Sedar kerna kinierbagen ras saling ketergantungen sada ras si debanna. Sebab kula e jadina labo i bas sada ringring tapi i bas melala ringring. Tan, nahe, cuping, babah, mata, si merupaken bagian i bas kula ras kerina saling tergantung. E me gambaren i bas kita sebage kula ni Kristus. Lit kalak bayak, sederhana, bahkan si kurang mampu, berpendidiken, kurang berpendidiken, beda kuta, berbeda profesi, rsd. Nterem kasus si ncidahken, maka la mungkin sekalak Kristen banci ‘survive’ tanpa relasi ras kalak si deban. La hanya ‘kalak kitik/musil’ bergantung man ‘kalak bayak’ tapi pe i bas perpulungen, ‘kalak bayak,’ erpendidiken, lit jabatenna bergantung ka man ‘kalak kitik’.
2. Ndahiken tugas masing-masing ras tetap membangun kerjasama. Gambaren si ibahan Paulus, adi kerina kula e mata, kuga nge nina megi? Bage pe sebalikna. Dibata namaken ringring e sada-sadai i bas kula sue ras si mehuli iakap Dibata. Lit fungsina ras dalankenna fungsina masing-masing. Labo banci nina mate man tan “aku la perlu kam!” Bage pe nina takal man nahe “aku la perlu kam!” Emaka si arus ibangun e me saling menghargai ras saling memperhatiken sada ras si debanna. Ula sempat sepele, kurang siergai (mencela, merendahkan, mentertawakan) nandangi kalak si deban. Bahkan ringring si tempa la menonjol la banci ipandang rendah, sabab ia ikut menopang kula. Si kurang meherga arus lebih iergaken. E maka nina Paulus i bas ay. 25, gelah kula e la erbelah-belah, tapi sada-sadai ringring e radu seri mperdiateken ringring si deban. Arus lit i je kepekaan nandangi kalak si deban ras pedauh biak egois, hanya memikirkan diri sendiri.
3. Mpegegehi kiniersadan sada ras sidebanna alu tetap lit ketergantungen ras Kristus.

Aplikasi

Patut sikataken bujur man Tuhan sabab itepaNa kita la seri, pelain-lain, erbage-bage. Tujunna enggo jelas gelah kita banci saling melengkapi, saling menopang, bersinergi sada ras si debanna ras enda merupakan sada potensi/kinibayaken guna membangun kula Kristus i doni enda, guna membangun perpulungen ras kemulian man Tuhanta. Tapi banci ka kinierbagen e erbahanca turah perpecahen adi masing-masing pihak saling menonjolkan diri, merasa diri paling benar ras hebat, merendahken si deban.

Kerjasama antara Serayan Tuhan ras Perpulungen arus lebe ibenai kerjasama si mehuli i bas Serayan Tuhan. Serayan Tuhan solid, paguh kiniersadanna maka banci murah kerjasama ras perpulungen. Adi bas kita pe sidalih-dalihen i bas ndalanken tugas bage pe teridah la siergan sada ras si deban, tentu sulit kerjasama si mehuli idalanken ras perpulungen. Kegiaten pelayanen (Diakonia), membangun fasilitas gerejanta si idah tetap lit dukungen arah perpulungen, ras si enda me si arus sijaga bahkan sitingkatken i bas wari-wari si reh enda.

Tambahen Arah Pt./Dk. nari :

Dk. Bp. Louise Sinukaban : Yang melihat tidak mengambil, yang mengambil tidak makan, yang makan tidak kenyang … apakah itu? Tubuh.

Pt. Bp. Patricia Peranginangin : Manusia hidup tidak bisa sendiri. Rikutken pengamaten, soliden Gereja Non-Suku ibandingken Gereja Suku. Lit sifat-sifat i bas budayanta si banci mpengaruhi kurang banci mpeteguhi kiniersadan.