Bimbingen Khotbah Minggu 22 Maret 2014

BIMBINGEN KHOTBAH MINGGU 22 MARET 2015

Pdt. Larena br. Sinuhadji (Nd. Reynard Tarigan)

Passion VI : Judika (Cidahken Kerajangku Bujur O Jahwe)

Invocatio:

“Kalak bujur ikawaliNa ibahanNa erkuasa desken raja-raja janah ibereNa kalak bujur asa lalap ipehaga” (Job 36:7)

Ogen:

Heber 5:5-10 (Tunggal)

Khotbah:

Masmur 119:9-16 (Responsoria)

Tema:

KATA DIBATA MPELIMBARUI PUSUHNDU

Keseluruhen Masmur 119 ngerana kerna undang-undang Tuhan. Khususna arah perikopta ibere judul “Kepatuhen nandangi undang-undang Tuhan.” Piga-piga poin si menarik i bas nats enda:

1. Kata Dibata ngenca mpengasup njagai geluhta gelah nggeluh la erpandangen. Penungkunen Pemasmur, “Dengan apa seorang muda mempertahankan kelakuannya bersih?” Kalak si nguda denga biasana murah terpengaruh, sabab sangana mencari identitas. Kepeken hanya Kata Dibata si mpengasup kalak si nguda denga (orang muda) njagai perbahanenna tetap bersih, seh maka aminna nguda denga tetap banci jadi teladan, subuk i bas pengerana, perbahanen, keleng ate, kesetiaan. Bagi nina Paulus man Timotius, “La ise pe banci mapas man bandu aminna pe kam nguda denga erkiteken mampu ia jadi usihen.”
2. Alu bulat ukur idaramina Dibata. Pemasmur fokus, tutus, konsentrasi penuh i bas ndarami Dibata. Sabab kadang si terjadi, rembak ras Dibata, nandai Dibata, ku gereja hanya sambilan, labo merupakan sada kebutuhen man banta. Ku gereja gelah jumpa ras teman-teman, ncidahken diri “nyetor muka” man pengurus gereja gelah ula lalap isungkuni, rsd. Tapi Pemasmur tuhu-tuhu bulat ukurna i bas ndarami Dibata, ertina lit pe tantangen labo e jadi sada kendala man bana, sebab ketedehen atena jumpa ras Dibata.
3. Undang-undang Tuhan ibunikenna ras ipekusur-kusurna i bas pusuhna ras ibelaskenna. Kata Dibata si enggo ialoken Pemasmur, labo saja sambil lalu ibegikenna, tapi tuhu-tuhu ipelajarina, ibunikenna ras ipekusur-kusur i bas pusuhna gelah jadi gelemen man bana i bas ndalani kegeluhen enda. Labo masuk kuping kanan jenari ndarat ka, la lit si tading. Sabab banci jadi mulih kenca gerejea, entah pe PJJ la nari lit si leket kai sipelajari kita i bas perpulungen. I bas si e memang sipindo gegeh kuasa Kesah si Badia, guna mereken pengangkan man banta i bas ngoge entah pe ngaloken Kata Dibata. Band. Perb. 16:14 i ja italangi Tuhan ukur Lidia, maka tutus kel atena megiken kai si ikataken Paulus. Jenari ipengasup Tuhan ka guna mperkataken, naksiken Firman Tuhan si enggo ialokenna bahkan enggo mpelimbarui kegeluhenna (bersaksi kerna gegeh Kata Dibata enggo nampati ras mpelimbarui).
4. I bas ndalanken Kata Dibata meriah kel ukurna riahen asangken ndatken erta-erta si melala. Labo berarti la akapna perlu erta, tapi i bas penggejapen Pemasmur meriah kel ukurna i bas ndalanken Kata Dibata. La nari akapna beban, tapi sukacita kel ia i bas banci nggeluh sue bagi si ngena ate Dibata.

Pengogen Heber 5:5-10, Yesus Kristus sebage Imam si Mbelin. I ja tugas imam sebage perantara antara perpulungen ras Dibata, secara khusus i bas dosa-dosa si ilakoken umat, la banci langsung umat si mindo pengalemi dosa, tapi ifasilitasi imam i bas perpulungen maba persembahen korban guna nasapken salah dosa umat. Tapi i jenda, Kristus sendiri sebage Imam si Mbelin ertina imam si jadi kelang-kelang Dibata ras manusia, tapi Ia sendiri jadi kurban si nasapken dosa manusia. Yesus jadi ulu keselamaten si rasa lalap, nandangi kerina kalak si erkemalangen man Dibata (cataten: ogen kurang pas ras bahan khotbah bage pe tema).

Tema: “Kata Dibata ngenca ngasup mpelimbarui geluhta.” Paulus ngatakenca “Kerina si tersurat i bas Pustaka si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah, dingen erguna i bas mereken pedah-pedah gelah nggeluh alu mehuli” (2 Tim. 3:16). Bage me peran Kata Dibata i bas kegeluhenta. Tapi kerina mulihken man banta pribadi-pribadi, apakah kita nggit ievaluasi, ipandang, ipekena alu kata Dibata? Gambaren si ibahan Yesus kerna batang anggur i bas Joh. 15, nina “Dahan-dahan si la erbuah itektekNa, janah dahan-dahan si erbuah ibersihkenNa alu mutiki tunas-tunas si la erguna. Kam enggo ibersihken alu kata si kukataken man bandu.” Dahan-dahan si la erbuah ras tunas-tunas si la erguna, gambaren kerna biak-biak (karekater) si la membangun (si la mehuli) i bas dirinta si erbahanca kita tetap jadi kerdil (la dewasa) i bas kiniteken.