Bimbingen Khotbah Minggu 29 Maret 2015

BIMBINGEN KHOTBAH MINGGU 29 MARET 2015

Pdt. Larena br. Sinuhadji (Nd. Reynard Tarigan)

Invocatio :

“Meteruk ukurNa, janah erkemalangen Ia man Dibata seh mateNa pe; e me mate i kayu persilang.” (Pilipi 2:8)

Ogen :

Masmur 69:1-20 (Responsoria)

Khotbah :

Markus 11:11 (Tunggal)

Tema : ALO-ALOLAH IA I BAS PUSUHNDU

Pembahasen Bahan Alkitab

Judul perikopta e me kap “Surak-surak si meriah i bas pintu gerbang kuta Jerusalem,” sada peristiwa i ja Yesus imuliaken jelma si nterem asum IA bengket ku bas kuta Jerusalem. Peristiwa enda ilatarbelakangi litna misi si la sedalanen (berbeda) antara Yesus ras jelma si nterem termasuk ajar-ajarNa. Sura-sura jelma si nterem bage pe ajar-ajarNa, Yesus menjadi raja doni, si banci menggulingken pemerentahen Romawi si paksa si e menjajah Israel. Sedangken misi Yesus i bas BapaNa nari e me kap IA jadi Juruselamat si nebusi dosa-dosa manusia. Jadi labo hanya pembebasen (kemerdekaan) secara fisik tapi pe pertendin. E maka piga-piga kali pe Yesus ngerana kerna kiniseran si bakal ialamiNa, la pernah iantusi ajar-ajarNa, bahkan itulakna (Iawin Petrus).

Enda me perdalanen Yesus si terakhir ku Jerusalem, i ja umur 12 tahun pe pernah IA ku Jerusalem. Jerusalem sebage pusat pemerintahen, sekaligus pusat keagamaan. E maka banci kataken, tupung wari raya agama, enterem kalak pulung i Jerusalem, ja pa nari pe gia, reh ku je. Enggo ieteh Yesus maka IA bakal ngenanami kiniseran ras mate. Ieteh Yerus maka kematenNa la banci itawar-tawar. Sementara kalak si nterem ersura-sura maka Yesus ku Jerusalem guna merayaken Paskah sekaligus jadi raja.

La nari ndauhsa Jerusalem nari, e me kap i uruk Seton deherken Betpage ras Betanin (kurang lebih 3 km nari ku Jerusalem), isuruh Yesus dua kalak ajar-ajarNa mpersiapken kendaraan, e me kap kelde si bakal iersak Yesus. Kelde si lenga pernah iersak kalak. Kelde kalak si deban ibutuhken Yesus sebage alat transportasi bengket ku Jerusalem. “To lawes, leben kam ku kuta si arah lebendu ah. Seh kenca kam ku bas kuta e, idapetindu kari sada kelede tambat, si langa pernah iersak kalak. Osari nalina je nari baba kelede e ku jenda. Adi lit kari kalak nungkun man bandu, “Engkai maka itangtangindu?” katakenlah, “Perlu Tuhan, minter ka kari iulihkenNa ku jenda.” Kai si iperentahkan Jesus idalankenna ajar-ajarNa alu patuh.

Engkai makana kelede la kuda (sabab biasa kalak make kuda)?

• Hal enda situhuna penggenapen nubuaten Nabi Sakaria (Sakaria 9:9-10, “Ersuraklah, ersuraklah, o anak kuta Sion! Ersuraklah meriah, o kalak Jerusalem! Nehenlah, rajandu reh ndahi kam! Ia dem kemulian, dem kemenangen. Tapi meteruk ukurna, Ia reh ngersak kelede; kelede si nguda denga e me anak indung kelede. Nina TUHAN man bangsaNa, “Kusasapken me gereta perang i Israel nari bage ka pe kerina kuda i Jerusalem nari; panah si ipake i bas perang, Kukernepken seh keri. Rajandu e mperdameken bangsa-bangsa; i lawit nari seh ku lawit iperentahna kerina, mulai i Lau Eprat nari, se ku tampuk doni enda”).  Ertina Yesus reh maba dame, maba perdamen man Jerusalem ras bangsa-bangsa si deban.
• IersakNa kelede, enda merupaken simbol kiniteruken ukur. Kerendahan hati si tetap icidahken Yesus i bas pelayanenNa seh ngayak IA ndungi karya keselamaten si ibabaNa.

Dua hal lebe si menarik si banci jadi refleksinta :

1. Si empu kelde. Perlu kita ngusih si empu kelde sebab ia tulus mereken kelde si lenga pernah ipake. La lit penolaken, la lit jungut-jungut sebab ietehna enda guna Tuhan. “Perlu Tuhan,” ertina, bersykurlah, ngataken bujurlah adi ipake Tuhan denga tenaganta, pikirenta, dirinta, materinta, rsd. Sabab perlu Tuhan, ipakeNa kita jadi perpanjangen tanNa. Banci jadi la tulus kita melayani, mbue siban perhitungenna, mbue siban alasenna guna kita ipake Tuhan.
2. Termasuk kelede. Kelde usur ipake sebage gambaren rubia-rubia si bodoh. Sabab kelde banci dua kali ndabuh ku bas lubang si seri. Sada kelebihenna, adi enggo maju la ia nggit surut. Tapi si luar biasa Tuhan Yesus nggit make kelede enda. Kelede si sederhana enda ipake Tuhan Yesus guna naruhken IA seh ku Jerusalem guna mate ku kayu persilang guna nebusi dosa-dosa manusia. Adi kelede ndai banci ngerana bagi kita, mungkin  katakenna man Tuhan, “Ih aku si la lit pemetehku, kepeken ipake Tuhan aku, ipercayaken Tuhan aku guna naruhken IA seh ku Jerusalem.” Tuhu-tuhu bujur kel katakenna man Tuhan. Jadi luar bisa ise pe banci ipake Tuhan, si kurang pemetehna, si kurang buatena, si kurang gegehna (entah enggo sakit-sakiten), si lansia, banci ipake Tuhan. Bersykurlah. Kadang kita kang si pekitik banta, “Iyaa aku kadeku pe la lit, pemetehku pe la lit.” Percaya saja adi enggo ipake Tuhan kita berarti iperlengkapi Tuhan ras icukupi Tuhan. Musa, Jeremia (la beluh ngerana), Paulus (lit duri bas dagingna/sakit), diberu mbalu-mbalu Sarfat nari. Adi kita nggit pasti Tuhan mperlengkapi kita.

Kerina jelma ersurak-surak i bas ngalo-ngalo Yesus. Lit arah pudi Yesus, lit arah lebeNa. Lit deba ngkimbangken uisna i pasar. Lit ka deba tektekna lambe i jumana. “Pujilah Dibata! Ipasu-pasu Dibata gelah Ia si reh i bas gelar Tuhan. Dibatalah si masu-masu Kinirajan si mulihi ipanteki, e me Kinirajan bapanta Daud; Pujilah Dibata i bas ingan Simeganjangna!” Surak-surak si meriah i bas ngalo-ngalo raja si bakal itangkuhken secara politis. Ras mindo keselamaten i bas Dibata nari (Mas 118:25, “Hosana, kelini kami Tuhan”).

Ogen Masmur 69. Pertoton Pemasmur tupung kiniseran ngkenai kegeluhenna (gedap terjeng kerahungku, latih kuakap, nembeh kalak man bana alu la ersabab, igombangi, kade-kadena sendiri enggo menyingkirken ia, rsd). Tapi i bas kiniseran si alamina, tetap Pemasmur erpengendes man Tuhan. Sabab Tuhan ngenca pengarapenna. Alu ia erpengendes man Tuhan maka idatna serpang pulah.

Refleksi

I bas Minggu Passion si pe-7-ken enda kita mulihi ipersingeti gelah nandai Yesus la rikutken pemikirenta ras sura-suranta. Penandainta kerna Yesus arusna bagi si isuraken Tuhan, labo rikutken sura-suranta. Sialoken Tuhan Yesus jadi Tuhan ras Juruselamatta. Sialo-alo IA i bas pusuhta, labo terjeng bas biber ngenca. Sabab adi terjeng bibir, banci berubah-rubah, la tulus, erkiteken lit sura-suranta. Tapi sialo-alo IA i bas pusuh ras ukurta. Ertina, lit pengakun maka Yesus ngenca Tuhan ras Juruselamatta la lit si deban. Senang, susah, sehat, sakit tetap simuliaken Yesus. Tetap kita erpengendes man Tuhan i bas kerina dampar geluhta, bagi si ilakoken Pemasmur. Je nari, alu gegeh Tuhan, sipindo gelah ngasup kita ngusih perbahanen Yesus, i ja tetap taat ia man BapaNa seh mate pe, meteruk ukurna.