Bimbingen PJJ Tgl. 22 - 28 Maret 2015

BIMBINGEN PJJ TGL. 22 - 28 MARET 2015

Pdt. Larena br. Sinuhadji (Nd. Reynard Tarigan)

Ogen :

Epesus 2:1-10

Tema :

KESELAMATEN SI TUHU-TUHU

Tujun :

Gelah ngawan ni perpulungen

1) Ngangkai erti keselamaten si tuhu-tuhu

2) Ncidahken tanda-tanda kegeluhen kalak si enggo iselamatken

Penjelasan Bahan Alkitab

I bas surat penggembalaanna i bas penjara nari, Paulus mulihi persingeti Perpulungen Epesus maka perpulungen enggo iselamatken Tuhan, erkiteken perkuah ate Dibata (Sola Gratia). Janah arus lit bedana kalak si lenga iselamatken ras si enggo iselamatken. Jelas ibahan Paulus perbandingenna, sope perpulungen enda lenga iselamatken :

• Mate pertendinna erkiteken salah ras dosana
• Iikutken perpulungen e kebiasaan doni si jahat. Iikutkenna pemimpin penguasa-penguasa si lit i bas awang-awang
• La nggit erkemalangen man Dibata
• Nggeluh rikutken sura-sura manusia.

Ertina, erkiteken dosa la lit nari sura-sura manusia guna erbahan si mehuli. Manusia iperbudak Iblis, sura-sura kedagingenna (band. Roma 3:23, “Kerina manusia enggo erdosa, janah enggo ndauh sirang ras sura-sura Dibata si mejile”).

Arah perbahanenna si e kerina patut nge perpulungen e ngenanami pernembeh ate Dibata (ukumen i bas Dibata nari. Band. Roma 6:23, “Upah dosa e me kematen”). Tapi puji Tuhan beliden perkuah ate Dibata asangken ukumen si ateNa isehkenNa erkiteken kesalahen ras dosa-dosa manusia. Pertendin manusia si ndube mate, ipegeluh Dibata mulihi raduken ras kekeken Kristus. Kata-kata “erkiteken lias ate Dibata”  (“perkuah ate Dibata”) kurang lebih lit 6 kali iulih-ulihi i bas perikop enda. Enda nuduhken maka, labo lit i je peran (usaha) manusia guna banci selamat, pelin-pelin perkuah ate Tuhan, pemere Dibata man manusia. E maka labo lit dalanna ise pe muji bana. I bas persadanta tetap ras Kristus, i bas kita tek man Kristus mereken sada jaminen maka icidahken Dibata Bapa man banta kekelengenNa si lanai lang-lang belinna rasa lalap seh rasa lalap.

Arah Tuhan nepa kita ras berekenNa keselamaten man banta maka ateNa tetap kita mpermuliaken Ia (Soli Deo Gloria). IjadikenNa kita guna ndahiken dahin-dahin si mehuli si enggo leben irencanakenNa, gelah sidahiken. Ertina, mbelin sura-sura Dibata man banta, asum kita itepaNa gelah kita jadi perpanjangen tan Tuhan nehi sura-suraNa. Erkiteken dosa, terhambat sura-sura Dibata. Tapi perkuah ate Dibata enggo nelamatken manusia mahanca sura-sura Dibata ndube banci silakoken alu dem sukacita. Silakoken si mehuli, silakoken si ngena ate Dibta, arah perukuren, pengerana ras perbahanenna, labo gelah selamat tapi sebage tanda pengataken bujurta man baNa si enggo nelamatken kita.

Refleksi

Lawan kata selamat, bene rasa lalap, mate rasa lalap. Tapi kita enggo selamat erkiteken perkuah  Dibata. La ise pe dingen la kai pe banci mereken keselamaten banta, seakatan Dibata. Mbue pe kinibayakenta, meganjang pangkatta, la banci  mereken keselamaten banta. Bahkan arah perbahanenta si mehuli, kesalehanta labo banci mereken keselamaten banta. Keselamatenta erkiteken perkuah ate ras kinitekenta man  Dibata. Keselamaten si enggo ibereken Dibata arus mpeturah sada kesadaren si mbaru, maka kita la nai si gel-gel tapi kita enggo nggeluh i bas kegeluhen si mbaru. Kegeluhen si mbaru (sura-suranta, perukurenta, pola pikirta, perbahanenta) tetap ateta si mehuli, si erbahanca ngena ate Dibata, tetap banci silakoken erkiteken persadanta ras Dibata.