Bimbingen Khotbah Minggu 5 April 2015

BIMBINGEN KHOTBAH MINGGU 5 APRIL 2015

PASKAH I

Pdt. Larena br. Sinuhadji

Invocatio :

“Sabab bagi kematen reh arah sekalak manusia bage me pe kekeken i bas si mate nari reh arah sekalak manusia” (1 Kor. 15:21)

Ogen :

Jesaya 12:1-6 (Responsoria)

Khotbah :

Roma 6:3-11 (Tunggal)

Tema :

ERSADA I BAS KEKEKEN JESUS

Kata Penaruh

Paskah (Ibr. : pesakh. Yun.: to paskha) entah pe pasca ertina sudah lewat, sudah berlalu. Adi ndai dalen, enggo ibentasi, adi ndai deleng, enggo idaki, adi penghalang (hambaten) enggo ialaken. E maka wajar kel, Paskah e me perayaan si seh kel mbelinna i bas kalak Jahudi, sabab mperingeti ndaratna bangsa Israel i bas Mesir nari, lepas i bas maut. Iperingeti alu man roti la tama ragi ras gulai pait, si melambangken pengalamen pahit si pernah ialami. Paskah terjadi erkiteken campur tan Tuhan nandangi bangsa Israel si erbahanca banci pulah i bas Mesir nari. Lawit Merah terbelah dua erkiteken intervensi Dibata.

Bage pe man banta kalak Kristen, Paskah e me perayaan si seh kel pentingna, sentral man banta. La nari kita iteruh kuasa dosa ras kegelapen sabab enggo italuken Yesus i bas kematen ras kekekenNa. KekekenNa nandakenca maka Yesus nggeluh,Yesus menang sabab enggo talukenNa kematenNa. Si sembah Tuhan si nggeluh si enggo mereken kemenangen banta. Sebage pengikut Yesus kuasa kemenangen, kuasa paskah arus tetap silumbaken i bas kegeluhenta.

Penjelasen Bahan Alkitab

Jesaya 12:1-6. Judul i bas pengogen I e me “Ende-enden Pengataken Bujur” (Nyanyian Syukur atas keselamatan). Pengogenta si pemena merupaken ende-enden pengataken bujur umat Tuhan erkiteken enggo surut rawa Tuhan, Tuhan la nari ernembeh ate. Enggo ipulahi Tuhan bangsaNa i bas kiniseranna nari. Perpulungen ngenanami kiniseran erkiteken kesalahen si ibahanna sendiri. Kiniseran umat igambarken desken kalak si muas. Tapi i jenda enggo ipuasken Tuhan bangsaNa, desken lau malem si mereken keriahen man kalak si muas.

Erkiteken perbahanen Tuhan, maka umat ngataken bujur man Tuhan. Ras tugas umat guna ermomo, meritaken man bangsa-bangsa kerna perbahanen Tuhan si luar biasa, si tetap ngkelengi umatNa. Respon si deban si arus ilakoken umat e me kap ersurak ras rende muji Tuhan.

Roma 6:3-11. Kita enggo mate i bas dosa-dosanta erkiteken kematen ras kekeken Yesus Kristus ras nggeluh guna Kristus saja. Enda me si ilumbaken Paulus man perpulungen i Roma. Lit pemahamen si turah i bas perpulungen, erkiteken perkuah ate Dibata si mbelin si enggo ibereken arah kematen Yesus e maka iusur-usur guna erbahan dosa. Alu tangkas Paulus ngatakenca lang. Sebab erkiteken perkuah ate Tuhan Yesus kita enggo mate nandangi dosa ras la nari banci kita terus-menerus nggeluh i bas dosa.

Asum kita iperidiken (ipirpiri/igedapken), enggo kita mate  dingen ikuburken ras Kristus, ras i bas kekeken Kristus, kita nggeluh i bas kegeluhen si mbaru. Ertina, i bas kematen Kristus ke-“aku”-annta (kedagingenta) enggo ikut mate i kayu persilang, la nari kita jadi budak dosa. Kristus enggo mate ras keke i bas si mate nari, janah e terjadi sekali seh rasa lalap. Kematen la nari erkuasa man Yesus. Alu bage, umat Kristen  arus nganggap dirina enggo mate janah ndarat i bas lingkungen dosa nari.

Perenungen

Penyelamaten si ilakoken Yesus Kristus i bas kematen ras kekekenNa, maka lit dua hal si arus jelas man banta. Si pemena, maka kita la nari budak dosa, bebas kita i bas kuasa dosa nari. Ngasup kita naluken kuasa dosa erkiteken persadannta ras Tuhan. E maka salah, adi kita ngatakenca, “Gelarna pe manusia, dem i bas kelemahen, wajarlah ...,” teridah mencoba kita membenarken dosa silakoken kita. Padahal ngasup nge kita naluken kuasa dosa e, tapi enggo leben sicidahken kelemahenta. Ngasup kita ngelawan dosa erkiteken perkuah ate Dibata. Biak-biak dosa: elem-elem, egois, sombong, biak-biak kegelapen tadingkenlah. Si peduaken, perubahen arah hidup. Kalak si enggo ngaloken  keselamaten i bas Kristus nari, la nari ia nggeluh untuk dirina jine tapi Kristus. Arah kai pe si nilakokenna kemulian man Tuhan (Soli Deo Gloria).

Tema ngatakenca ersada i bas kekeken Yesus, ertina, ersada i bas kemenangen Tuhan, bangkit kita i bas erbage-bage hal si erbahanca kita terpuruk. Thomas Alfa Edison, penemu lampu pijar, termasuk siswa si rusur gagal. Tapi terus ia mencoba bahkan idaramina i ja kelemahenna sedekah enda, ievaluasina dirina. Kedungenna, berhasil ia sebage penemu lampu pijar. Banci jadi, masa lalu, kesalahen-kesalahen si pernah silakoken membelenggu kita seh makana la nari banci alu sukacita ndalani kegeluhenta. Yesus enggo ngalemi salah dosanta. La nari iinget-ingetNa. Bangkit, nggeluhken geluh si mbaru alu perukuren ras pusuh si mbaru si tetap ipelimbarui Dibata. Ndalanken si ngena ate Tuhan, jadi berkat man kalak si deban. E me pengataken bujurta selaku kalak si enggo iselamatken Dibata. Selamat Paskah man banta kerina. Soli Deo Gloria.