Bimbingen Khotbah Jumat 3 April 2015

BIMBINGEN KHOTBAH JUMAT 3 APRIL 2015

Jumat Si Mbelin

Pdt. Larena br. Sinuhadji (Nd. Reynard Tarigan)

Invocatio :

“Lias ate Dibata rembak ras kerina kalak si erkeleng ate man Tuhanta Jesus Kristus alu keleng ate si la erkeri-kerin” (Epesus 6:24)

Ogen :

Jesaya 52:13-53:12 (Anthiponal)

Khotbah :

Masmur 116:1-2, 12-19

Tema :

SEHKENLAH PENGATAKEN BUJUR MAN TUHAN.

Penjelasen Bahan Alkitab

Masmur 116 eme kap pengataken bujur Pemasmur erkiteken igejapiNa pertolongan Tuhan. Ibegiken Tuhan pertotonna. Ibegiken Tuhan tep-tep kali Pemasmur erlebuh man baNa (“Sebab Ia menyendengkan telinga-Nya kepadaku, maka seumur hidupku aku akan berseru kepada-Nya”). Lit kerembaken antara Pemasmur ras Tuhan, peduli Tuhan man bana e maka segedang-gedang umur geluhna Tuhan saja inganna ernalem. Labo song-song (temporer) tapi setiap saat; subuk suka entah duka, sehat entah sakit, beruntung entah gagal, tetap Tuhan ingan penalemenna. E maka i bas ay. 12-14, i je Pemasmur nungkun man dirina sendiri, kai si banci ilakokenna tanda pengataken bujurna man Tuhan, “Kai banci kuulihken man Tuhan, kerna kerina kiniulinNa man bangku?” (“Bagaimana akan kubalas kepada TUHAN segala kebajikan-Nya kepadaku?”). Walau pe situhuna labo ngasup manusia ngulihken kerna kekelengen Tuhan si enggo isehkenNa mana banta, tapi lit respon Pemasmur. Nina, “Kupersembahken lau anggur, ku kataken bujur, kusingetken gelarNa, dingen kai si enggo ipadankenna (nazar) man Tuhan isehkenna man Tuhan.”

Pengogenta ngerana kerna suruh-suruhen Tuhan si ngenanami kiniseran. I bas konteks Jesaya e me kap mereken pengarapen kerna pembebesan si bakal ialami bangsaNa kenca ngenanami kiniseran bas pembuangen Babil. Janah perikop enda pe merupaken nubuaten kerna kerehen penampat (Mesias) si nebusi dosa-dosa manusia (ay. 5). Gambaran Mesias si igambarken Jesaya i jenda la bali ras gambaren mesias si luar biasa (hebat). Tapi i jenda igambarkenna maka la ia mehaga, rupana la mejile (bali ras sinuan-sinuan si turah i bas taneh tenggiring). Erkiteken si e labo ialoken kalak kerehenna malah kebalikenna, ia itulak dingen igombangi, ciga ate kalak ngenehen ia dingen la lit si mperdiatekenca. Seh kel kejamna perbahanen man bana, tapi sinik saja ia, bali ras anak biri-biri si nandangi igeleh, la sitik pe ia ersumekah (tergenapi i bas Matius 26:63; 27:12-24). Ia ikuburken sada lubang ras kalak jahat (Lukas 23:33-40). Kai sialami suruh-suruhen e erkiteken peraten Tuhan. Kai sialamina guna persembahen pengalemi dosa umatNa. Tantangna lit pengakap maka kiniseran sialamina erkiteken ukumen si ibereken Dibata man bana, tapi si e kerina erkiteken dosa-dosanta. Ia nggacihken kita, si kin aturna kita iukum (Roma 6:23).

Gambaren si enggo icidahken Jesaya i bas perikop enda mengarah ku kerehen Jesus Kristus sebage Juruslamat dunia (nubuaten kerehen Juruselamat). Jesus Kristus si ngenanami kiniseran, igudami, iligasi, igombang-gombangi, iperseri ras kalak jahat ras isalibken. Salib iperuntuken man penjahat, ras e ikenaken man Jesus.

Perenungen

Kai responta arah keselamaten si enggo ibereken Tuhan Jesus man banta? Enggo pasti Ia me jadi Tuhan ras juruselamatta, la lit si deban. I bas kerina dampar geluhta Tuhan ngenca si banci nampati. Adi geluhNa pe iberekenNa banta, pasti Ia tetap nampati kita i bas kerina perbeben geluhta. Bagi pengalamen Pemasmur, segedang-gedang umur geluhna Tuhan saja ingan penalemenna. Si peduaken, sikataken bujur arah keselamaten si enggo iberekenNa banta. Pengataken bujurta labo terjeng bas biber tapi pe arah kerina si lit bas kita: talenta, sikap hidup, tenaga, materi, rsd. Erberita kita kerna kuasa ras keleng ateNa si enggo nelamatken kita.

Tema i bas kita mperingeti wari kematen Tuhan Jesus (Jumat Si Mbelin) e me kap sehkenlah pengataken bujurndu man Tuhan. Adi sievaluasi kegeluhenta, apai nge buen kita ngataken bujur asangken berkeluh kesah, bersungut-sungut? Seharusna sipebue ngataken bujur gelah tetap semangat ras sukacita i bas ndalani kegeluhenta. Siusih Jesus, i bas IA ngenanami kiniseran erkiteken kita, la sekali pe IA ersumekah, alu taat idalaniNa kerina tapi kedungenna ibereken Dibata kemulian man baNa.