Bimbingen Khotbah Minggu 8 Maret 2015

BIMBINGEN KHOTBAH MINGGU 8 MARET 2015

Pdt. Larena br. Sinuhadji (Nd. Reynard Tarigan)

Invocatio :

“Kerina si tersurat i bas Pustaka Si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli” (2 Timotius 3:16)

Ogen :

1 Korinti 1:3-7 (Tunggal)

Khotbah :

Keluaren 20:1-17 ( Responsoria)

Tema :

IKUTKENLAH PEDAH DIBATA

Penjelasan Bahan Alkitab

Bahan Khotbah Kel. 20 :1-17 e me kap kerna 10 Pedah Dibata (10 Firman) si nibereken Tuhan man Musa i deleng Sinai guna jadi gelemen/ikutenken bangsa Israel kenca enggo ibebasken Tuhan i bas perbudaken Mesir nari. Mulihi ipeteguhi Tuhan perpadanenNa ras bangsaNa si enggo ibelasken Tuhan man Abraham (Kej. 15:16,18; 17:7), maka Dibata ersura-sura njadiken bangsa Israel bangsa istimewa, badia, sada bangsa si nggeluh guna Tuhan saja (Kel. 19:5,6). Bangsa enda arus merespon kekelengen Tuhan si enggo mbebasken bangsa e i bas perbudaken nari alu nggeluh setia, dem pengataken bujur ras gelah nggeluh rikutken peratenNa saja. Ay. 1-2, jelas ipetandaken Dibata ise ia man bangsaNa, maka Dibata si enggo mbebasken bangsaNa i bas Mesir nari. Si e kerina ilakokenNa erkiteken kekelengen Tuhan man umatNa. Bimbingen Khotbah, ibenai alu perkuah ate labo alu pedah (perentah).

10 Pedah Dibata enda ibagi menjadi dua bagin, i ja ay. 3-11 (hukum 1-4)  ngerana kerna hubungen bangsaNa ras Dibata. Dibata si mindo bangsaNa gelah nembah man baNa saja, ula sembah dibata-dibata si deban. Kebiasaan nini-nini bangsa enda ras bangsa sekelewet (pepagin i Kanaan) banci jadi mpengaruhi kebulaten ukur bangsa enda ersembah man Tuhan. Kesetian nembah man Dibata icidahken alu la nembah man gana-gana, sabab Dibatanta, e me Dibata si percimburu. Gelar Tuhan e badia, e maka ula sia-siaken entah salah gunaken guna tujun si la mehuli. Inget ras pebadiaken wari Sabat. Enam wari enggo ibereken Tuhan kesempaten guna erdahin, janah wari pepituken e me wari pengadi-ngadin si man persembahenken man Tuhan saja. Maknana labo hanya membangun hubungen ras Tuhan, tapi pe pekesahken kenca enggo latih erdahin sekaligus membangun relasi ras keluarga.

Ay. 12-17 (hukum 5-10) ngerana kerna hubungen manusia ras manusia. Ibenaken alu ngehamati orang tua, ngkelengi ras ngergai kegeluhen sesama manusia alu meneken kesah kalak si deban, la erlua-lua, la mbuat sikerajangen kalak, la erkata guak ras la mengga ateta si kerajangen kalak.

10 Perentah Tuhan si nibereken Tuhan man bangsa Israel arah Musa i deleng Sinai iangkat Tuhan Jesus jadi perentah si pentingna kel i bas kerina UU Dibata. Penungkunen sekalak guru Agama Jahudi dalam rangka ncubai Jesus alu penungkunen, “Perentah si apai kin si pentingna kal i bas kerina UU agama? Nina Tuhan Jesus, “Kelengilah Tuhan Dibatandu asa ukurndu, asa tendindu, dingen asa gegehndu. Enda me perentah si mbelinna ras si pentingna. Si peduaken si bali ras si ndai e me kap kelengilah temanndu manusia bagi kam ngkelengi dirindu. Nina Tuhan Jesus, maka kerina undang-undang agama si nibereken Musa ras nabi-nabi erpalasken dua perentah ndai.”

Ogen 1 Kor. 1:3-7, e me pengataken bujur Paulus man Tuhan Dibata erkiteken persadan perpulungen ras Kristus maka perpulungen enggo ipebayak i bas kai pe, subuk i bas pengerana ras pemetehna. Berita si meriah kerna Yesus Kristus enggo enteguh i tengah-tengah perpulungen seh makana tetap ukur perpulungen e i bas ndalani kegeluhenna seh Tuhan Jesus reh peduakaliken.

Aplikasi

Perentah Dibata enda sipakeken, sidalanken i bas kegeluhenta guna jadi ciken, gelemen i bas kita ndalani wari-wari kegeluhenta. Palasna enggo pasti kekelengen man Tuhan si enggo leben ngkelengi kita, seh makana la nari siakap mberat kita ndalankenca. Siinget perkuah ate Tuhan si enggo nelamatken kita, janah arah kita taat nandangi perentahNa tujunna pe guna kegeluhnta ka. Paulus mpersingeti Timotius kerna pentingna Firman Tuhan e me ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli (2 Tim. 3:16).

Pedah Dibata e erguna gelah banci kita nggeluh bagi si ngena ateNa. Inti pedah Dibata e e me ngkelengi Tuhan Dibatanta alu bulat ukur ras ngkelengi teman manusia. Tuhan mindo kesetian ras ketaatanta man baNa, la ise pe dingen la kai pe banci menggantiken posisi Tuhan i bas kegeluhenta. Gana-gana/berhala banci jadi enggo merakrak i bas kegeluhenta paksa gundari, tapi erta doni, kekuasan, banci menggantiken keduduken Dibata i bas kegeluhenta. Ergan duit, jabaten asa kiniteken, seh makana la akapna dalih nggatiken kinitekenna guna jabaten ndai. Sibuk waktuna ngurusi berkat-berkat jasmani si enggo si lit piah dungna lupa ngataken bujur man si mbereken berkat e, makana wari Minggu pe la sempat ku gereja.

Kekelengen man Tuhan secara vertikal arus ka ibarengi alu kekelengen man manusia (horisontal). Saling menghargai, sisampat-sampaten, bekerja sama, saling memaafkan rsd. La mungkin ninta keleng ateta Dibata tapi nembeh ateta man seninanta. Jelas kalak si bage perguak. Johanes ngatakenca kalak si la ngkelengi senina si idahna, labo tuhu ia ngkelengi Dibata si la idahna.

Ngikutken pedah Dibata pelin-pelin erguna man banta, gelah banci kita nggeluh rikutken si ngena ateNa. Sabab sura-sura Dibata tepaNa ras selamatkenNa kita gelah kita nggeluh guna mpermuliaken Ia (Soli Deo Gloria). I bas kita ngikutken pedah Dibata, sieteh apai si lepak, apai si benar, mereken pemeteh ras kepentaren man banta guna ndalani geluh enda (ogen). Kata Dibata jadi pengapul banta i bas ngalaken erbage-bage perbeben. Kata Dibata jadi senjata i bas ngelawan kuasa-kuasa kejahaten. Marilah alu dem sukacita sidalanken pedah Dibata, sipindo Kesah si Badia mpengasup kita ndalanken pedah Dibata e.

Dibata si berinisiatif ngkelengi ras mpetandaken diriNa man umatNa. Hukum kasih : aktif i bas kita ngkelengi, la pasif.