Bimbingen Khotbah Minggu 15 Maret 2015

BIMBINGEN KHOTBAH MINGGU 15 MARET 2015

Passion V Letare (Teridahlah)

Pdt. Larena br. Sinuhadji (Nd. Reynard Tarigan)

Invocatio :

“Ernalemlah man TUHAN, dingen lakokenlah si mehuli, gelah kam la biar-biaren nggeluh i bas negeri e” (Masmur 37:3)

Ogen :

Bilangen 21:4-9 (Tunggal)

Khotbah :

Heber 12:18-29 (Responsoria)

Tema :

ERNALEMLAH MAN TUHAN

Penjelasen Bahan

Bahan Ogen (Bilangen 21:2-9). Ituriken kerna perdalanen bangsa Israel i Mesir nari ku Kanaan. I bas perdalanen bangsa Israel deleng Hor nari arah dalan ku teluk Akaba (laut Teberau), guna nilahi daerah Edom, la nari saber bangsa Israel e maka enggo merawa, jungut-jungut man Tuhan ras Musa. Kedungenna merawa Tuhan, isuruhNa nipe si erbisa naguti bangsa Isarel, e maka enterem si mate paksa si e. Kenca si e, sedar bangsa enda e maka reh bangsa e ndahi Musa ngatakenca enggo erdosa bangsa enda i bas nimbak Tuhan bage pe nimbak Musa. E maka ipindokenna gelah ertoto Musa gelah ipedauh Tuhan nipe enda i bas bangsa e nari. Ertoto Musa ras isuruh Tuhan gelah ibahan Tuhan sada nipe i bas tembaga nari ras itamaken bas sada galah, gelah ise pe si enggo itagut nipe, adi ipernehenna ku je, maka malem ia. I bas sebagian tradisi kebudayaan kuno, maka gegeh mahluk si berbahaya banci ikontrol alu erbahan patungna. E maka i bas jaman raja Hiskia, nipe tembaga imusnahken, erkiteken enggo ka rayat si mengkultusken ras isembahna nipe tembaga ndai (2 Raja 18:4).

Janah peristiwa enda ipake Jesus sebage gambaren kerna kalak si tek man baNa (dialog ras Nikodemus) “Bagi ipeganjangken Musa nipe tembaga i gurun pasir, bage pe Anak Manusia si isuruh Dibata ipeganjangken, gelah kerina kalak si tek man baNa ngaloken kegeluhen si tuhu-tuhu si la erkeri-kerin” (Joh 3:14-15).

Bahan Khotbah (Heber 12:18-29). Rikutken penulis surat Heber maka lit perbedaan si tajam antara Padan si Ndekah (PL) ras Padan si Mbaru (PB), khususna kerna Dibata. I bas ay. 18-21, kerna gambaren singkat i ja Tuhan mereken pedahNa i deleng Sinai. Erkiteken seh kel badiana Tuhan e, maka la ise pe banci ndeheri Ia, ise saja si ndeher ras Ia, pasti mate, terkecuali Musa. Sora terompet, sora Dibata si ngerana tuhu-tuhu erbahanca mbiar bangsa Israel (band. Kel. 20:18-19), janah mindo bangsa e alu mesangat gelah ola nai min ibegina. Kai siteridah i bas deleng Sinai, tuhu-tuhu seh kel mejinna bahkan Musa sendiri pe ngatakenca mbiar dingen nggir-nggir kel ia. Banci kataken, Dibata si igambarken i jenda, Dibata si erjarak ras manusia. Lit jarak si lebar antara Dibata ras manusia. Dibata la banci terdeheri manusia, erkiteken icidahkenNa diriNa alu kilat, guntur, api sigurlah, sora terompet si tuhu-tuhu erbahanca manusia mbiar. Malang man Dibata si iliputi kebiaren si mesangat.

Suasana si berbeda icidahken i bas Padan si Mbaru, maka Deleng Sion, Kuta Dibata si nggeluh merupaken gambaren Dibata i bas Jesus Kristus si ndeher ras enterem kalak. Deleng Sion i jenda merupaken kiasan si nuduhken ingan si badia surgawi si berbeda ras deleng Sinai (Tafs. LAI: keadaan ideal yang dinanti-nantikan dengan penuh harap oleh umat percaya). I bas ingan e lit perjumpaan ras meribu-ribu malekat alu dem keriahen ukur. Janah kalak enda pe pulung ras kerina kalak si enggo ngaloken tading-tadingen si rasa lalap sebage anak sulung/sintua Dibata. Adi ikataken kalak Kristen bengket ku bas persekutuan anak-anak sulung/situa, ertina terdaftar i bas kiniersadan perpulungen si ngaloken hak warisen i bas Dibata nari, adi tetap kinitekenna man Jesus Kristus. Gelarna tersurat i Surga. Dibata sebage hakim. Ertina, i bas waktuna, kerina kalak si tek arus berhadapen ras Dibata guna iadili. Tapi Dibatanta i bas Jesus Kristus labo hanya sebage hakim sekaligus Ia pembelanta, kalak si tek baNa.

Aminna berbeda, Dibata si igambarken i bas PL ras PB, tapi Dibata tetap Dibata si erdolat ras mada kuasa, si terbuka guna ngalo-ngalo kerina manusia terlebih adi sedarina kerna dosana (band. Ogen 1). Secara khusus Surat Heber ncidahken seh kel senangna erkiniteken i bas Padan si Mbaru. Tapi labo berarti banci ate-ateta. Tetap kita arus mereken si tebaik man Tuhan. Ay. 25, “E maka jaga gelah ola la ibegikenndu Si Ngerana e. Adi kalak si la megiken Ia Si Ngerana i Deleng Sinai mbarenda pe la pulah, apai denga ka kita si la megiken Ia si ngerana i Surga nari, tentu la banci pulah i bas Ia nari!”

Isingetken Penulis Surat Heber, maka nai meger doni enda ibahan sora Tuhan. Tapi gundari Tuhan erpadan, “Sekali nari ngenca pagi Kuugur, labo saja doni enda, tapi Surga pe. Kerina si nasa lit si enggo ijadiken Dibata si banci iugur nandangi isambari, gelah tading kai si la banci terugur. Dingen adi sialoken kerajan si la banci terugur erkiteken perkuah ateNa arus tetap kita ngataken bujur man Tuhan. Kita arus ngataken bujur man baNa alu tetap ersembah man Dibata bagi singena ateNa, alu mehamat dingen mbiar.” Ertina, jadi kalak Kristen berarti ngaloken perkuah ate sekaligus tanggung jawab. Asum ibereken Tuhan denga kesempaten, sipergunaken kesempaten e guna ernalem man baNa. Sabab adi la bage, Dibatana e me api si ngkernepken. Ertina, Dibata si igambarken i bas PL berlaku ka man kalak si tek i bas PB.

Aplikasi

Tema : ERNALEMLAH MAN TUHAN. Mulihi i bas Minggu Passion V enda Dibata mindo kesetian man banta kalak si tek man baNa. Dibata si i bas jaman PL la banci terdeheri (lit jarak). Tapi erkiteken perkuah ras keleng ateNa man manusia, maka lit kedekaten antara Dibata ras manusia. Enggo ipadankenNa man banta Kinirajan Surga man kalak si tetap ncikep kiniteken i bas Jesus e. Perkuah ate Dibata ola sisia-siaken. Rikutken perikop maka kita arus megiken sora Tuhan ras tetap ersembah man baNa alu mehamat dingen mbiar.

Perenungen banta, sora ise si lebih sibegiken dingen empengaruhi kita i bas kegeluhenta? Sora Tuhan entah sora doni enda? Uga nge penembahenta sedekah enda man baNa? Meros, entah tuhu-tuhu sipersiapken pusuh ukurta guna tetap mpermuliaken Ia?

Kai pe si terjadi ernalemlah tetap kita man Tuhan. Lit kalak ernalem man kalak si erpangkat. Selesai tugasna, pensiun, keri pengarapenna. Lit ka ernalem man kalak bayak, tangkap kalak bayak ndai erkiteken korupsi maka keri ka pengarapenna. Dibata ngenca la keri-kerin kuasa ras keleng ateNa, maka man baNa ngenca patut kita ernalem.

Tambahen Arah Pt./Dk. nari :

Pt. Bp. Abel Surbakti : Ernalem manTuhan lakokenlah si mehuli. Kesalahan erbahanca kita mbiar jumpa ras Dibata.