Bimbingen PJJ Tgl. 7 - 13 Juni 2015

BIMBINGEN PJJ TGL. 7 - 13 JUNI 2015

(Pdt. Larena br. Sinuhadji)

Ogen :

Roma 12:14-18

Tema :

MERIAHLAH RAS KERINA JELMA (PLURALISME)

Tujun:

Gelah ngawan ni perpulungen

1. Meteh maka ia nggeluh i bas kinierbagen

2. Ngasup nggeluh ibas kinierbagen

Manusia e me mahluk sosial, la banci ia nggeluh sekalak-sekalak, janah la banci orang-orang tertentu saja si itemanina, sabab kita nggeluh i bas kinierbagen (suku, tingkat sosial, pendidiken, agama, rsd.). Tentu iarapken ras ise pe banci kita bergaul la sibeda-bedaken. Dingen ras ise pe banci kita mehuli. Sabab Dibatanta pe mehuli man kerina manusia (Bdk. Mat. 5:45, “Sabap labo saja man kalak si mehuli ibereken Dibata matawariNa, tapi pe man kalak si jahat. Bage pe labo saja man kalak si bujur ibereken Dibata udan, tapi pe man kalak si la bujur”). Ajaren Jesus enggo jelas, maka imbang-imbang (kalak si erbahanca kita ngenanami kiniseran), kalak si e pe arus ikelengi ras itotoken. Ertina, arah pihak kita siusahken meriah kita ras kerina kalak. Perbahen Jesus e si arus siusih.

Ajaren  Paulus i bas perikopta pe jelas:

• Pasu-pasu kalak si pesega-sega kam.
• Nggeluh sepenggejapen; meriah ukurndu ras kalak si ermeriah ukur, tangis kam ras kalak si tangis. Ertina, sirangilah biak SMS (Senang Melihat orang  Susah. Susah Melihat orang Senang).
• Sekalak-sekalak kam arus mperdiateken keperlun kalak si deban, ula egois.
• Ula meganjang ukur (sepele) man kalak.
• Ula beluh siakap banta; sikap enda erbahanca kita erjarak (erbatas) antara kita ras kalak si deban. Kita siakap beluh, kalak si deban sama sekali la lit pemetehna. Piah dungna la pernah terjalin komunikasi si mehuli, si saling menghargai ras mengisi. Enggo kita tertutup man kalak si deban.
• Asa ngasupndu usahakenlah meriah ras kerina kalak.

Ngasup nggeluh i bas kinierbagen, aminna pe kita kalak Kristen sebage minoritas arus ibenaken alu sikap si terbuka tapi jelas identitasta. Sebage kalak si tek, pengikut Kristus si arus jadi terang ras geluhta ernanam man kalak si deban. Sikap terbuka, ertina, mau menerima kalak si deban; walau pe beda suku, agama, pendidiken, ekonomi, rsd. Seh makana lambat laun (i bas proses) banci kita bekerjasama guna sisampat-sampaten sada ras si debanna. Sebage contoh, walau pe kita ngenca sekalak sebage kalak Kristen bas lingkungenta, tetap kita nggit bekerjasama i bas gotong royong, menjaga keamaan, lit acara-acara bas lingkungenta kita hadir ras mereken kontribusi. Pasti masyarakat bas lingkungenta pe perlahan-lahan senang ngaloken kita. Sikap terbuka, saling menghargai arus ibenaken i bas kita nari.

Mahatma Gandhi, walau pe ia sebage kalak Hindu tapi ia nggeluh sebage pengikut Kristus. Bas dinding kamarna lit gambar Jesus alu teks : “Christ is our peace.” Tiap wari Gandhi ngerenungken ucapan Khotbah Jesus i datas uruk (Mat. 5-7). Diri Jesus jadi penjemba man bana guna nciptaken perdamen i India, sabab terjadi kerusuhen antara kelompok Hindu ras Islam. Tahun 1947 negara enda terpaksa ibagi jadi dua: India ras Pakistan. Kelompok Hindu pindah ku wilayah si menjadi India, ras kalak Islam pindah ku wilayah si menjadi Pakistan. Tapi pembagian wilayah la menyelesaiken persoalen, pertikaian tetap terjadi. Nina, “Akar kerusuhan ini adalah fanatisme agama” (fanatik: “fanum” ertina: fana, kosong). Ertina, ipertahankenna ajaren si sama sekali kurang ietehna. Beragama tanpa perbuatan ras toleransi ipeseri Gandhi ras dosa si mematikan (deadly sin). Ajarenna kerna Ahimsa (pedoman memperjuangkan kebaikan, kebenaran, keadilan, tanpa kekerasan, kebencian dan pemaksaan), sangat ipengaruhi ajaren Jesus. I bas pertemuan Pemuda Kristen i Colombo Gandhi menjawab penungkunen kalak engkai makana la kam jadi kalak Kristen? Bagenda nina Gandhi, “Seandainya yang saya lihat hanya Khotbah di Bukit, tanpa ragu-ragu saya mengaku diri Kristen. Tapi sungguh sayang apa yang saya lihat dalam agama Kristen justru sering merupakan pengingkaran dari Khotbah di Bukit”.

Ajaran Kristus, teologi Paulus i bas perikopta nampati kita i bas membangun relasi ras kalak si deban si dem alu kinierbagen. Sada musuh mbuesa, 1000 teman kurangsa denga. Mari siusahaken meriah kita ras kerina jelma termasuk kalak si pernah nakiti ukurta. Sitotoken, sipindo Kesah si Badia erdahin bas kita guna kita banci mehuli tetap ras ia.