Bimbingen PJJ Tgl. 14 - 20 Juni 2015

BIMBINGEN PJJ TGL. 14 - 20 JUNI 2015

Pdt. Larena br. Sinuhadji

Ogen :

Matius 23:23

Tema :

NEHKEN PERSEPULUHEN ALU PUSUH SI BUJUR

Tujun :

Gelah ngawan ni perpulungen :

1) Ngangkai maka persepuluhen tanggungjawab kalak sierkiniteken

2) Ngasup ngendesken dirina jadi persembahen si nggeluh

Penjelasen Bahan Pustaka

Padan si ndekah melala ngerana kerna persepuluhen. Mulai ibenaken i bas Abram nehken persepulehen man Melkisedek, raja Salem, imam Dibata si meganjangna (Kej. 14:20), ras melala denga nats i bas Firman Tuhan si ngerana kerna persepuluhen (Im. 27:32, Ul. 14:28, 2 Taw. 31:5, Neh. 10:38, Mal. 3:10). I bas Ul. 14:22 - rst., i je ituriken maka persembahen persepuluhen banci berupa gandum, anggur, minak saitun ras biri-biri entah pe banci iduitken adi ndauhsa iakap bangsa enda mabasa i bas rumahna nari ku ingan ersembah. Persembahen e ibereken man kalak Lewi, kalak petandang, anak melumang, ras diberu mbalu-mbalu. Bage pe ipanna ras keluargana. I bas Maleakhi 3, persepuluhen ibereken ku Rumah Pertoton, guna kepentingen pelayanen i bas Rumah Pertoton.

I bas perikopta Jesus mengkritik perbahanen kalak Farisi (judul: “Ipandang Jesus kalak si pekulah-kulah”). I ja guru-guru agama enda ras kalak Parisi, ipersembahkenna sepersepuluh i bas ulihna nuan-nuan nari, sampai hal si kitik-kitik jera, lenga ras serei pe ipersembahken. Tapi hal si penting i bas undang-undang ibaikenna, e me kap: keadilen, keleng ate ras kinibujuren. E maka nina Jesus, si enda arus idalankenndu alu la ngelupaken si debanna. I bas bagin si deban pe banci siidah alasen kalak Parisi la mperdiateken (nehken kekelengen) man orang tuana, sabab kai si banci ilakokenna guna orang tuana enggo ipersembahkenna man Dibata. I je pe ikataken Jesus, maka kalak Parisi pekulah-kulah (munafik). Ku darat mejile, tapi si kubas sama sekali la iperdiatekenna. Jelas motivasi si lit e me kap ndarami pujian manusia. Ertina, arah kritik Jesus enda maka persembahen persepuluhen tetap idalanken alu la mengabaiken kekelengen, keadilen, ras kebujuren. Bahkan si e me si pentingna. Sibereken pe persepuluhenta, tapi la lit kekelengenta entah la kita bujur la lit ertina persembahen si enggo sipersembahken man Tuhan.

Perenungen

Salah sada sumber keuangen GBKP e me kap i bas persepuluhen nari (Tata Gereja GBKP: Peraturan Penatalayan Keuangan dan Harta Benda). Janah persepuluhen enggo kurang lebih 15 tahun iberlakuken i GBKP. Banci ikataken ope si e kurang denga kesadaren perpulungen mere man Tuhan bage pe kurang kepate guna mendukung pelayanen i bas Runggun-runggun si deban erkiteken wilayah pelayanen GBKP si cukup luas ras la bali kondisi finansial perpulungenna (si erbahanca melala Klasis si defisit). Tapi kenca enggo ibenaken persepuluhen, maka kondisi keuangennta i bas GBKP enda mulai membaik bahkan reh urakna Klasis-klasis si defisit. Sabab 50% persepuluhen bas Runggun isetor ku Moderamen guna tetap mendukung pelayanen GBKP, salah sadana guna mendukung pelayanen i bas Runggun-runggun si lenga megegeh kondisi finansialna. Si penting, mulai je nari enggo mulai lit kesadaren i bas perpulungen guna nehken persembahen termasuk persepuluhen. E kang dalan-dalanna maka GBKP enggo banci njayo, la nai bergantung arah gereja-gereja entah pe donatur-donatur luar negeri nari.

Rikutken Firman Tuhan si jadi renungenta, maka persepuluhen tetap idalanken, tapi ula sempat kita mengabaiken aspek si penting i bas kita nehken persembahen e me: kekelengen, keadilen ras kebujuren. Sabab memang palas i bas kita nehken persembahen termasuk persepuluhen e me sebage pengataken bujurta man Tuhan, responta i bas kekelengen si enggo ibereken Tuhan banta. Bahkan Roma 12:1-2, Firman Tuhan mpersingeti kita, maka kita arus mempersembahken geluhta jadi persembahen si nggeluh man Tuhan. Ertina, arah kerina dampar geluhta, termasuk kekelengen, kebujuren ras keadilen si tetap arus setia sidalanken e me persembahenta man Tuhan.

Melala diskusi-diskusi si la pernah putus i bas ngerana kerna persepuluhen enda, subuk kerna nominal ras kejujurenta i bas nehken persembahen e. Berekenlah rikut pasu-pasu si enggo ibereken Dibata man banta. Jadi “nilai” persepuluh situhuna lit i bas pusuhta pribadi lepas pribadi. Penggejapennta maka Dibata si tetap masu-masu geluhta, jemba kita guna nehken persepuluhenta tanpa perdebaten asakai buena, ras ja nari sibuat. Paling tidak, arah persepuluhen nampati kita guna secara disiplin (teratur) nehken persembahenta man Tuhan. Adi lebih asa sepersepuluh sibereken pe man Tuhan e pe la ilarang, sabab keriahen ukurna ras ketulusenna guna ersembah rikut ngataken bujur man Tuhan. Janah adina la banci sepersepuluh la ka perlu sipaksaken. Ieteh Tuhan kai si bas paksa genduari sialami kita. Si penting, persembahen sibereken man Tuhan termasuk persepuluhenta merupaken pengataken bujurta ras responta i bas pemasu-masun Tuhan i bas kegeluhenta. Kai pe silakoken kita dalam rangka mpehaga Tuhan ras siimani maka kai sidalanken kita tetap ipasu-pasu Tuhan.

Erkiteken lit kesan negatif i bas persepuluhen i ja lit kasus bas piga-piga gereja si menyalahgunaken persepuluhen enda guna kepentingen pribadi entah pe kelompok. E maka tujun ras pemakenna pe arus transparan ras banci ka sipertanggungjawabken man Tuhan ras man perpulungen.