Bimbingen Khotbah Minggu 21 Juni 2015

BIMBINGEN KHOTBAH MINGGU 21 JUNI 2015

Pdt. Larena br. Sinuhadji (Nd. Reynard Tarigan)

Invocatio:

“Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN . Kalak lenge la nggit mperdiateken kepentaren dingen la ia nggit erlajar” (Kuan-Kuanen 1:7)

Ogen :

2 Tim. 3:15-17 (Tunggal)

Khotbah :

Kuan-kuanen 4:1-9 (Responsoria)

Tema :

JADILAH PENTAR

Penjelasen Bahan Pustaka

Kitab Kuan-kuanen berisi kerna nasehat, pedah gelah manusia banci nggeluh alu mehuli. Bentukna ajaren praktis man segala umur, mulai anak-anak nari she orang tua, si ipeseh kalak si berhikmat. Secara khusus i bas perikopta, ngerana kerna pengajaren orang tua man anak, janah uga ketutusen anak e i bas megiken ajar orang tua. Banci jadi enda pengalamen raja Salomo.

Rikutken perikop si arus idalanken sekalak anak e me kap begiken ajaren orang tua dingen megermet, gelah banci tambah-tambah pengertianta. Pengajaren orang tua ula hanya sambil lalu ibegiken (masuk kuping kanan ras keluar kuping kiri), tapi lit ketutusen megikennca, gelah banci siinget janah sipakeken guna jadi gelementa i bas kegeluhen. Sabab ajaren orang tua mehuli nandangi anakna. Walaupe lit nge orang tua si la ndalanken tanggung jawabna alu mehuli (contoh, kasus orang tua si menelantarken 5 kalak anakna, si terakhir kasus Angeline si mengalami kekerasan sampai akhirna ibunuh).

Pengajaren bapana, maka kai si enggo iajarken orang tua, arus iinget ras ipakeken gelah banci nggeluh alu pentar. Janah i jenda pe ituriken uga pentingna kepentaren. Kepentaren nge si banci ngkawali ras njagai kita. Ertina, arah kepentaren si lit bas kita mpengasup kita ndalani geluh enda alu bijaksana ras megegeh walau pe melala tantangen. Sabab bena-benana kepentaren e me kap erkemalangen man Dibata ras nggit erlajar. Alu nggitna kita terus erlajar ras tetap malang man Dibata maka ibabaina kita gelah lebih bijaksana i bas rukur, ngerana ras erbahan tindaken. Mbages siukurken baik-burukna resiko si bakal sialami entah ras kalak si deban ope kita ngelakoken sada-sada hal. E maka jelas maka kepentaren nge si banci ngkawali ras njagai kita. Kebalikenna adi kurang bijaksana entah erbahanca tondel ukur kalak arah pengerana entah pe perbahanenta, banci jadi lit sura-surana si la mehuli guna ncelakai kita, erkiteken segat atena. Enggo pasti kegeluhenta terancam. Kita sendiri si rugi akibat pengelakonta si kurang entah pe la bijaksana.

Penting i jenda guna ndatken kepentaren ras pengertin. Ulihna man banta i bas kita tuhu-tuhu makeken kepentaren i bas kegeluhenta maka kegeluhenta iangkatna ras ipehagana, iberekenna man banta rudang-rudang si mejile janah itamakenna mahkota si mehaga.

I bas pengogen si pemena pe jelas kerna pedah Paulus man anak rohanina Timotius. Ipersingeti Paulus maka benaken kitik-kitik nari Timotius enggo meteh kerna Pustaka si Badia. Nandena Enike ras ninina Lois mabai Timotius guna nggeluh erkiniteken man Tuhan benaken kitik-kitik nari (2 Tim. 1:5). Pustaka si Badia si ngasup mereken kepentaren ras mabai Timotius ku bas keselamaten arah kiniteken man Jesus Kristus. Sabab kerina si tersurat i bas Pustaka si Badia erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli. Janah sebagai pelayan Tuhan, aminna pe Timotius nguda denga tetap iperlengkapi guna erbahan si mehuli. Ertina, geluhna la jadi batu antuken man perpulungen sabab nggeluh ia i bas kepentaren Dibata.

Perenungen

Kalak si pentar beluh ertimbang kerna kai si bakal ikatakenna ras ilakokenna. Iukurkenna lebe alu mbages kai dampakna, positif entah negatif. Adi memang mbuen si la mehuli la idalankenna, sabab banci encedai ia ras kalak si deban. Kepentaren si lit bas ia labo saja secara kecerdasen otak (inteligensia), tapi pe secara pusuh perukuren (kecerdasen emosi) ras kecerdasen spiritual. Kepentaren e idatken arah kita nggit erlajar ras erkemalangen man Tuhan. Melala kalak ndabuh ku bas perbahanen si la payo erkiteken kurangna pengertian bas ia dingen kurang pengendesen geluhna man Tuhan. Tapi kalak pentar ngasup njagai kegeluhenna erkiteken iusahakenna tetap erdalan i bas si ngena ate Dibata.

Tanggung jawab sebage orang tua, bagi si enggo icontohken bas perikop enda, e me mereken pengajaren si mehuli man anak-anak benaken kitik-kitik nari bahkan benaken bas bertin nari. Ul. 6:4-9 i je ilumbakenna banta sebage orang tua gelah katawari paksa pe, mereken pengajaren alu la ermedu-medu. Persingeti rusur subuk sangana i rumah, i bas perdalanen, sangana ngadi-ngadi entah pe sangana erdahin. Setiap saat ras i japa pe banci kita mereken pengajaren man anakta alu cara si tepat rikutken kategori umur. Enggo pasti adi anakta enggo remaja, kita orang tuana sekaligus sahabat (lit kedekaten), seh makana adi lit pergumulenna nggit ia terbuka man banta. Janah labo hanya kata-kata pedah sibereken man anakta, sekaligus kita mereken contoh/teladan si mehuli nandangi anakta. Melala anak-anakta kenca enggo remaja lebih dekat ia ras teman-temanna asangken kita, perban memang benaken kitik-kitik nari pe kurang perhatian ras kekelengenta orang tua man bana. Piah dungna kenca enggo remaja pe, merasa ia kurang dekat ras kita. Tapi adi enggo sibiasaken, benaken kitik-kitik nari kita dekat ras anakta, kekelengenta irasakenna, simamahi Kata Dibata bage pe siban kebaktin keluarga, pasti mabai anak-anakta ngergai kekelengenta man banta alu ia tetap erbahan si ngena ate Dibata. Walaupe tetap lit kemungkinen pengaruh lingkungen banci mabai anakta ndabuh ka.

Jadilah Pentar. Kepentaren e sidatken kita arah kita nggit erlajar ras erkemalangen man Tuhan Dibata. Janah proses erlajar e segedang geluh (long life education), la pernah lit kata tamat, walaupe secara pendidiken formal enggo tamat. Sabab erlajar banci sidatken kita arah erbage-bage hal, subuk pendidiken formal, non-formal, pengalamen geluhta, pengalamen geluh kalak, rsd.