Bimbingen Khotbah Minggu 7 Juni 2015

BIMBINGEN KHOTBAH MINGGU 7 JUNI 2015

MINGGU ETIKA KERJA

(Pdt. Larena Sinuhadji)

Invocatio :

“Kalak malas la pernah seh sura-surana, tapi kalak si erdahin alu tutus ndatken untung si mbelin” (Kuan-kuanen 12:27) 

Ogen :

Johanes 6:25-27 (Tunggal)

Khotbah :

Kuan-kuanen 6:6-11 (Anthiponal)

Tema :

TUHAN ERDAHIN ARAH PENDAHINTA

Bena Kata

Tuhanta nai-nai nari seh gundari terus erdahin, e maka kita pe sebage pengikutNa erdahin (bdk. Joh. 5:17). I bas turi-turin kerna penciptaan, subuk i bas Kej. 1 ras 2, icidahken man banta kerna Dibata si sibuk erdahin. Piga-piga kali igunaken kata “bara” (menciptakan sesuatu tanpa bahan), tapi tetap lit i je proses Dibata ndahiken ras mengolah. Bage pe i bas Kej. 2 lebih riil icidahken proses Dibata si erdahin, ay. 4 njadiken kerina sinasa lit, lenga ipesusur Dibata udan (ay. 5), ijadikenNa jelma, iembuskenNa kesah kegeluhen, ibahan Tuhan peken i Eden, ijadikenNa erbage-bage batang kayu si mehuli rsd. Ertina, icidahkenNa man banta maka Dibatanta e me kap Dibata si erdahin, si tetap aktif erdahin seh ngayak gundari. IpeliharaNa geluhta, isampatiNa kita, ibegikenNa pingko-pongkonta, iligasNa kita, ipepalemNa pinakitta ras melala denga si deban. Adi Dibatanta pe erdahin, enggo sepatutna kita sebagai anak-anakNa erdahin.

Penjelasen Bahan Pustaka Si Badia

Kitab Kuan-Kuanen e me kap isina kerna pepatah, nasehat, wejangan. Kitab Kuan-Kuanen enda bentukna ajaren praktis, pengajaren kerna cara nggeluh tep-tep wari guna kerina kategori usia, benaken anak-anak seh orang tua, si ipeseh kalak si berhikmat.

Bahan khotbahta jelas, persinget man banta gelah banci kita mperdiatken ras erlajar arah binatang si kitik e me kap perkis. La lit pemimpinna, la lit mandurna, la lit si njagasa, tapi erdahin ia pepulung nakan tupung paksa perlego guna pangan tupung paksa perudan. Si pemena, si banci siidah, perkis ia berinisiatif guna ncukupi kebutuhen geluhna ras mampu mengantisipasi masa depan. Sabab enggo ietehna, maka tupung masa perudan la banci ia erkai pe. Gelah ula sempat kelihen i bas masa perudan, maka i bas masa perlego tuhu-tuhu alu maksimal ia erdahin ncukupken kebutuhenna. Mekatep tutus kita erdahin erkiteken i je lit si mengawasi kita, tapi dikenca la nari je pemimpin si mengawasi kita, ate-ateta erdahin. Perkis ngajari kita uga mengatur ras memimpin diri sendiri. La pe lit si ngawasisa, tapi dahin e tetap alu mehuli sidahinken erkiteken sigejapken maka dahin e me kap anugerah si ibereken Dibata man banta guna kita banci ncukupi kebutuhen geluhta, guna kita mpermuliaken Dibata, ras guna kita ngataken bujur man Tuhan arah tenaga, pemeteh, kesehaten si ibereken Tuhan man banta.

Kebiasaan kalak perkisat rusur menunda-nunda pekerjaan, piah dungna enggo menumpuk dahin e. Prinsip si ijemak kalak enda, “Melala denga waktu, gundari santai saja lebe.” Kalak si perkisat menyia-nyiaken waktu si lit ras la pernah makeken kesempaten, piah reh kemusilen nindih ia. Sebab dekahen tunduh, bermalas-malasan, santai, asangken dahinken dahin si lit. Kemalasan mendatangkan kemiskinan, enda me si terjadi i bas konteks enda.

Arah ogenta jelas maka kalak si nterem ndaram-ndarami Jesus erkiteken tanda-tanda sengget (mujizat) si banci ilakoken Jesus labo erkiteken itandaina Jesus si Mada Kuasa. E maka itegur Jesus kalak si nterem e i ja idaramina Jesus perbahan labo iangkana tanda-tanda sengget si enggo ibahan Jesus tapi erkiteken enggo ipanna roti seh besur. E maka nina Jesus ola cariken pangan si banci melengas, tapi daramilah pangan si banci mereken kegeluhen si tuhu-tuhu si la erkeri-kerin. Adi sikaitken enda ku bas erdahin, melala jelma erdahin gelah pedas bayak, sukses tanpa ngukurken apakah si idahikenna e mpermuliaken gelar Tuhan entah lang. Alasen si usur ibelasken, “Darami sen haram saja enggo mesera, apaika sen halal.” Kinibayaken si idarami alu cara si la mehuli, hanya mereken kesenangen sesaat, tapi la maba kemalemen ate si tuhu-tuhu man banta (tidak bermakna). Selain dikejar-kejar rasa bersalah ras ketakutan menghantui, alu la gejap kinibayaken banci maba kehancuren man dirinta bage pe keluarganta (broken home, terlibat narkoba, rsd). Bdk. 1 Tim. 6:10, “Sabap merangap nandangi duit e me sumbul kerina kejahaten. Enggo lit piga-piga kalak si merangap nandangi duit la nai tetap i bas kiniteken janah gulut ukurna ibahan erbage-bage kecedan ate.” Dahin si ngena ate Tuhan si banci idahiken ulihna i doni enda bage pe i surga.

Perenungen

Kita erdahin erkiteken Dibatanta pe terus erdahin seh ngayak gundari (Joh 5:17). E maka tupung ibereken Tuhan kesempaten man banta nggeluh dingen sehat denga kita, alu semangat ras ertutus ate, erdahin kita rikutken dahin si enggo ibereken Dibata man banta. Rikutken Firman Tuhan si jadi renungenta, maka :

1. Kita arus semangat ras disiplin i bas erdahin, la pe lit i je si mengawasi kita.
2. Kita arus mejingkat erdahin, mpergunaken waktu si lit alu bijaksana, guna mengantisipasi masa depan.
3. Pedauh kerina biak-biak perkisat, santai, menunda-nunda pekerjaan.
4. Erdahinlah alu tetap mpermuliaken gelar Tuhan, labo hanya gelah ndatken kinibayaken ras kesuksesen. Gelah kinibayaken ras kesuksesen si idatken kita pe lit maknana, e me guna kemulian gelar Dibata (Soli Deo Gloria).
5. Erdahin alu tutus ras ertanggung jawab man Tuhan bage pe bas inganta erdahin mpedauh kita i bas kemusilen nari. Ibereken Tuhan kemalemen ate i doni ras i surga.

Tema : “Tuhan erdahin arah pendahinta.” Ertina, Tuhan memelihara, ncukupken geluhta, masu-masu kita arah kita ndahiken dahinta. E maka penting tetap i je, ertoto ras erdahin (Ora et Labora), i bas dahin si idahiken kita, ertoto kita man Tuhan gelah ipasu-pasuNa kai si enggo si idahiken kita, bage pe .