Bimbingen PJJ Tgl. 21 - 27 Juni 2015

BIMBINGEN PJJ TGL. 21 - 27 JUNI 2015

(Pdt. Larena br. Sinuhadji)

Ogen :

Jesaya 6:1-8

Tema :

ERTI RAS MAKNA LITURGI

Tujun :

Gelah perpulungen :

1) Ngeteh erti unsur-unsur liturgi

2) Ngangkai erti ras makna liturgi si ilakoken i bas tep-tep kebaktin

3) Ngasup ngikuti rangkaian liturgi i bas kebaktin GBKP

Penjelasen Bahan Pustaka

Icidahken man banta i bas sada pengenehenen Jesaya ngidah Tuhan i bas Rumah Pertoton. Ia sangana kundul i bas kursi kemulianNa, jubahNa ndemi kerina Rumah Pertoton. I sekelewetna lit tedis Malekat Serafim, si ernala-ernala bagi api, lit 6 kabengna (2 nutupi ayona, nahena 2 nari guna ia kabang). Sialon-alon  kerina Malekat Serafim e rende muji Tuhan, “Badia, badia, badia Tuhan si mada kuasa badia kap, doni enda dem alu kemulianNa”. Bagem bagi sora koor, merdu, seh makana palas Rumah Pertoton e mugur-ugur ibahan sorana janah Rumah Pertoton dem alu asap. I bas perjumpaanna ras Tuhan, sedar Jesaya kerna dirina, sedar ia kerna Dibata mada kuasa si enggo idahna, minter iungkapkenna, “Cilaka me aku”. Itandai Jesaya dirina kalak si perdosa, meluat, tiap ranan si mentas i bas biberna nari dosa kerina, bahkan tading bas lingkungen si perdosa ka. Penggejapen kerna dosana secara pribadi, kinilatunggungenna, janah dosa bangsana. Kenca idahna Tuhan, la nai iakapna ia metunggung, la layak. Kenca bage sada i bas Malekat Serafim ndai nari kabang ndahi Jesaya. Ibabana rara si ibuatna i bas batar-batar persembahen nari alu jepit-jepit. Ikuitna biber Jesaya alu rara ndai, jenari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi.” Api e me sada lambang penyucian, pembersihen. Jesaya isuciken alu api sebage lambang ia enggo ibersihken, ikudusken seh makana la nari seri ia ras situasi sekelewetna. Jesaya nggejapken, ia siawalna la metunggung, enggo ipetunggungken Tuhan, lit proses pendamaian arah pengalemi dosa i bas Dibata nari, si erbahanca gundari lit perbedaanna, lit gegeh si mbaru, semangat si mbaru. Jesaya ijadiken Tuhan Jesaya si mbaru, tampil beda ras kalak si deban.

E maka nina Tuhan, “Ise enda Ku suruh, ise si nggit maba berita i bas Aku nari?” E maka minter ialoi Jesaya, “Enda aku Tuhan, suruhlah aku”. Igejapi Jesaya, Tuhan si petunggungken ia, si melayakken ia, si mereken gegeh, makana pang ia ngatakenca, “I jenda aku Tuhan suruhlah aku”.

Pengkenaina

Kai kin erti “liturgi”? Sekitar tahun 400 SM, kata e enggo biasa ipake i bas kalangen Yunani - Romawi. Kata leitourgia (Yun. Laos : rakyat. Ergon : bakti, kerja) ertina kerja bakti si nilakoken penduduk kota. I bas jaman si e liturgi berarti kai si nibaktiken sesekalak jelma guna kepentingen bersama. Sekitar tahun 300 SM kata “liturgi” ndatken erti si deban, e me kap ibadah i kuil. Kenca bage, piga-piga ratus tahun kemudian, penulis i bas Padan si Mbaru memakai kata “liturgi” guna ibadah entah kebaktin man Tuhan (Perb. 13:2, “Sekali, asum kalak enda erbahan kebaktian [leitourgounton] man Tuhan  dingen erpuasa, ngerana Kesah si Badia man bana nina, “Peserap Barnabas ras Saul man bangKu, guna ndahiken dahin si enggo Kutetapken man bana”). Mulai je nari me sipake kata “liturgi” i bas ibadah si ilakoken kita.

Sedangken kata “ibadah” (Ibr. abodah) e me kap memberi diri entah pe mengabdiken diri. Dibata i bas Jesus Kristus si erinisiatif mereken diriNa guna manusia. Arah si e me, manusia merespon kekelengen Dibata jadiken dirina pe guna jadi berkat man doni enda.

Renungenta sekali enda, e me salah sada teks si menggambarken proses peribadaten entah pe erbakti man Tuhan. Janah banci ka siidah, unsur-unsur i bas i bas liturgi entah peribadaten e me:

1. Kesadaren diri kerna kehadiren Tuhan. Tuhan si hadir alu kuasa ras kedolatenNa. Kuasa Tuhan si luar biasa si erbahanca palas Rumah Pertoton mugur-ugur ibahan sora Malekat si rende. Tuhan hadir, si ierespon alu ende-enden kemulian, ende-enden pujin man Tuhan.
2. Kehadiren Dibata si mendorong manusia guna menyadari ise ia i lebe-lebe Dibata. Arah perjumpanna ras Dibata, minter isedarina kerna dosa-dosana, kesalahenna, kelepakenna i bas ndalani wari-wari kegeluhen si enggo ibentasina. Kata-kata Jesaya ndai, “Tep-tep ranan si mentas arah biberku nari erdosa kerina, janah aku ringan i tengah-tegah bangsa si erdosa. E maka i bas liturgi pe, lit i je bagin Pengakun Dosa. Aminna pe Jesus Kristus enggo ngalemi salah dosanta gelah kita banci terkelin, terkadang erkiteken kedagingenta banci kita ndabuh ku bas dosa ras 24 jam Iblis mengganggu kita (1 Pet. 5:8, “Iblis imbangndu e gawah-gawah ku jah ku je bagi sada singa si erngaung ndarami si man jerngemenna”). Janah dosa labo hanya dalam bentuk pelanggaran entah pe kesalahen, tapi penggejapen maka tuhu-tuhu kita la metunggung i adep-adepen Dibata. Enda banci siidah i bas Lukas 5:1-11, “Ija nina Petrus man Jesus, enggo latih ia sada berngi enda erdahin tapi la datna sada nurung pe. Adi sekali enda Jesus nuruhsa, banci iamburkenna jala e. Kenca iamburken Petrus ras teman-temanna jalana, melala kel idatsa nurung seh maka merigat atena jala ndai. Ngidah kai si jadi nina Petrus, “O Tuhan laweslah Kam i bas aku nari, sabab aku kalak perdosa”. Petrus labo ia ngelakoken dosa i bas konteks enda, tapi mindo ia pengalemi dosa i bas Dibata nari. Ertina, igejapina kemahakuasaan Tuhan, ras labo kai pe ia i lebe-lebe Tuhan. Jadi pengakun dosa labo saja kerna soal ngaku kita kerna dosa-dosa si enggo ilakoken kita, tapi pe soal ngaku kita maka labo kita metunggung (merendahkan diri) i adepen Tuhan. Alu dasar enda me maka i bas ibadahta, bahkan i bas pertotonta, sipindo pengalemi dosa i bas Dibata nari. Bahkan Jesus sendiri i bas ngajari murid-muridNa ertoto ikatakenNa, “Alemi salah kami, bagi nialemi kami salah kalak kempak kami”. E maka adi lit pengajaren si ngatakenca la perlu nari kita minta ampun man Tuhan i bas pertotonnta sabab enggo kita ialemi Dibata i bas Jesus Kristus, e tuhu-tuhu menciderai dasar kerna pengakun dosa enda ras menyesatkan. Logika berpikir ajaren enda, adi enggo ialemi dosanta i bas Jesus Kristus, e maka enggo sempurna kita bagi Kristus, e maka la nari perlu kita mindo pengalemi dosa. Penungkunenna, lit kin kita si enggo sempurna bagi Kristus?
3. Pengalemi dosa. I bas perikop siidah, reh Tuhan arah MalekatNa mbersihken Jesaya alu rara api. Pengalemi dosa e me kap tanda keleng ate Dibata. I bas pengalemi sialoken kita i bas Dibata nari, ibersihkenNa kita i bas kerina perbahanen si la payo nari ras iberekenNa tetap KesahNa si Badia erdahin i bas kegeluhenta. Pusuh ras perukurenta si enggo ipelimbarui Dibata mpengasup kita mulihi nggeluh jadi saksiNa guna nehken kuasa ras keleng ate Tuhan.
4. Dibata ngerana ras manusia arah kataNa. Sabab Firman Tuhan ngenca si banci mpengasup kita nerangi dalan si ibentasi kita. Kata Dibata erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli (2 Tim. 3:16).
5. Pengutusen ras pasu-pasu. I bas Tuhan enggo ngalemi salah dosanta, bahkan Dibata ngerana alu kataNa guna mpegegehi manusia, e maka Dibata mengutus anak-anakNa guna jadi terang ras sira i tengah-tengah doni enda. Bagi Dibata si berinisiatif guna mereken diriNa, maka manusia si enggo jumpa ras Dibata pe ersuruh ukurna guna bermisi, guna mereken dirina jadi berkat man doni enda. I bas tugas si enggo ibereken Tuhan, maka IA tetap mperlengkapi kita alu pasu-pasuNa, gelah tetap kita megegeh, ras nggeluh alu mejuah-juah sabab Dibata tetap serta ras kita.

E maka i bas liturginta, lit isusun unsur-unsur si encidahken bagi si lit bas perikopta ndai:

1. Votum ras Salam. Pernyataan kerna kehadiren Tuhan i bas kebaktin.
2. Irespon alu rende.
3. Pengakun ras pengalemi dosa.
4. Firman Tuhan.
5. Firman Tuhan si enggo sialoken sirespon alu: Pengakun Kiniteken; Persembahen; Pertoton Syafaat (solidaritasta i bas bentuk doa man gereja, pergumulen kalak si deban)
6. Pengutusen ras pasu-pasu.