Bimbingen Khotbah Minggu 14 Juni 2015

BIMBINGEN KHOTBAH MINGGU 14 JUNI 2015

KERJA RANI

Pdt. Larena br. Sinuhadji (Nd. Reynard Tarigan)

Introitus :

“Pestakenlah Kerja Rani asum ibenakenndu rani buah pagendu. Pestakenlah Wari Raya Sapo-sapo i bas pengkeri-kerin tahun, asum iperanindu buah anggurndu ras si debanna” (Keluaren 23:16)

Ogen :

Kuan-kuanen 3:9-10

Khotbah :

Roma 12:1-2

Tema :

PERSEMBAHEN SI NGGELUH

Penjelasen Bahan Pustaka Si Badia

Surat man Perpulungen Roma, e me kap surat Paulus si seh kel gedangna ras paling teologis, e maka alu alasen si e, maka surat enda itempatken i bas bagian awal. Asum tuliskenna suratna enda, Paulus tading i rumah Gayus i Korinti (Rom. 16:23; 1 Kor. 1:14). Perikop enda ibere judul, “Lagu langkah kalak Kristen” (Bhs. Ind : “Persembahan yang benar”). Ibenaken Paulus alu sada palas i bas kita nehken persembahen man Tuhan, e me kap nginget perkuah ate Dibata si mbelin. Perkuah ate Tuhan si enggo nebusi dosa-dosanta, la nari kita i teruh undang-undang. Perkuah ate Tuhan si mabai kita i bas keterkelinen. Kita itebus Tuhan, labo alu barang fana: emas ras pirak, tapi alu dareh Kristus si meherga (1 Pet. 1:18,19). Bahkan seh paksa gundari Tuhan tetap masu-masu kegeluhenta. Perbahanen Tuhan e si tetap arus siinget dingen sirespon, alu ngendesken kulanta jadi persembahen si nggeluh rikut si ngena ateNa, e me si ipindoken Paulus. Engkai makana ngendesken kulanta? Lit ajaren si lepak si berkembang paksa si e, si la banci lang mpengaruhi perpulungen. Ajaran si lepak e, bagenda nina, manusia terdiri i bas kula, tendi, kesah (tubuh, jiwa dan roh). Kai si nilakoken daging kulanta, enda la lit hubungena ras la lit pengaruhna, man tendi bage pe kesah. Perban daging kulanta kenca kita mate lesap, e maka kai pe banci silakoken. Kai pe si berkaiten ras kula, banci sieksploitasi (ate-ate) demi kepuasan kula. Tapi Firman Tuhan ngatakenca sada kesatuan antara kula, tendi ras kesah. Payo memang, asum kita mate, kulanta enda lesap ipan cacing, tapi kai pe silakoken alu kulanta enda (tanta, mata, cuping, nahe, kerina anggota tubuhta enda, kerina) e bakal sipertanggungjawabken. E maka nasehat Paulus, “Endeskenlah kulandu jadi persembahen si nggeluh”.

Hal menarik si peduaken, maka tradisi Jahudi, erbage-bage bentuk persembahen (pengalemi dosa, persembahen tep-tep wari, persembahen wari Sabat, persembahen Kerja Rani, wari Raya Sapo-sapo -  Bil. 28-29), arus lit rubia-rubia si ipersembahken. Adi gelgel kenca itutung persembahen ianggeh Tuhan dingen merim iakapNa, genduari la nari bage. La perlu nari kita maba erbage-bage rubia guna ipersembahken man Tuhan, sabab Kristus Jesus enggo mpersembahken diriNa guna ngangkut dosa jelma si nterem sekali seh rasa lalap (Heber 9:28). Alu bage kita merespon perbahanen Tuhan banta alu kita mpersembahken geluhta (perukuren, pengerana, perbahanen, talenta, kinilitenta), kerina e merim i adepen Dibata desken persembahen tutungen.

Gelah geluhta banci jadi persembahen si nggeluh, e maka nasehat Paulus berikutna, ula seri ras doni enda ras bere perukurenta tetap ipelimbarui Dibata. Doni sada gambaren kegeluhen si gelap, si jahat, si banci bene kita ibahanna. Payo kita tading i doni, tapi selaku kalak si enggo ngaloken perkuah ate Tuhan, kita arus jadi sira ras terang doni (bdk. Mat 5:13-16). Kehadiren kalak si tek mpengaruhi ku bas hal-hal si membangun, si mehuli ku sekelewetna. E maka arus tetap kita ernalem man Tuhan, gelah KesahNa si Badia mpelimbarui kegeluhenta katawari paksa pe. Alu bage banci sidat kai si mehuli, kai si ngena ateNa, janah kai si sempurna.

Perenungen

Persembahenta man Tuhan labo sumbangen tapi pengataken bujurta man Tuhan, erkiteken perkuah ateNa si mbelin si enggo isehkenNa man banta, janah kerina si lit bas kita termasuk doni enda ras kerina isiNa Dibata kap empuna (Bdk. Mas. 50:10,11, “Sabap sikerajangenKu nge kap rubia-rubia i kerangen, bage pe asuh-asuhen i das deleng-deleng si meribu-ribu. Aku nge empuna kerina perik-perik i bas awang-awang, bage pe kerina si nggeluh i mbalmbal si mbelang”).

Bage pe i bas persembahen Kerja Raninta sekali enda, sigejapkenlah maka Dibata si masu-masu kegeluhenta, usahanta, pendahinta, profesinta (perjuma, perbinaga, pengusaha, buruh, pegawai, pdt., rsd.), e maka siendeskenlah rikutken pasu-pasu si enggo ibereken Dibata man banta sekalak-sekalak, alu dem keriahen ukur. Sabab terkadang, adi soal tambah-tambah, kali-kali, pelipatgandaan, senang kita ndatkenca. Tapi dikenca enggo bagi-bagi, terlebih ngataken bujur man Tuhan, bagi si enggo mberat sitik. Teridah megati mekarus denga i bas kita nehken persembahen man Tuhan. Bagi-bagi i jenda labo soal sen saja, tapi kerina si lit bas kita si banci sipersembahken man Tuhan (talenta, tenaga, perukuren, rsd.).

Siingetlah maka Dibata si tetap masu-masu kegeluhenta. Dibata si nikapken benih man kalak si merdang, bage pe nakan si man pangan. IA pe nikapken benih si iperlukenndu, IA ka nge si mpeturah benih e dingen mereken ulih si erlipat ganda i bas kiniulindu e nari (2 Kor. 9:10). E maka Kerja Rani arus silakoken alu dem keriahen, lebihen asa Kerja-kerja Kalak Karo, erkiteken Tuhan nge si erbahanca maka lit si man peraninta, entah arah juma, sabah, erbinaga, pegawai, pensiun, rsd. Ngataken bujurlah kita man Tuhan, amin sekali mbue perbeben ras tantangen si man alanken seh ngayak gundari Dibata tetap masu-masu kegeluhenta. Sipehagalah Tuhan alu mpersembahken ulih jumanta (pendahinta) si mehulina man Tuhan (ogen).