Bimbingen Khotbah Minggu 5 Juli 2015

BIMBINGEN KHOTBAH MINGGU 5 JULI 2015

MINGGU PENINGKATEN EKONOMI JEMAAT

(Pdt. Larena Sinuhadji)

Invocatio  :

“Aku ngenca meteh sura-surangKu nandangi kam, e me gelah kam senang labo gelah cilaka. RencanangKu e me mereken wari si pepagi bagi si iarapkenndu.” (Jeremia 29:11)

Ogen :

Kejadin 3:17-20 (Tunggal)

Khotbah :

2 Tesalonika 3:6-12 (Tunggal)

Tema :

TUTUS ERDAHIN BIAK ANAK DIBATA

KATA PERLEBE

Penyair Kristen legendaris Libanon nari si tergelar Kahlil Gibran, pernah nuliskenca bagenda, “Work is love made visible. And if you cannot work with love but only with distaste, it is better that you should leave your work and sit at the gate of the temple and take alms of those who work with joy.” Ertina bas bahasa Indonesia kurang lebih bagenda, “Bekerja adalah wujud nyata cinta kasih. Dan jika kamu tidak suka bekerja dengan sepenuh hati, maka lebih baik kamu tidak usah bekerja dan jadilah pengemis yang meminta-minta dari orang-orang yang bekerja dengan sukacita.” Maknana e me kap, erdahin adi la ibarengi alu ketutusen ras keriahen ukur, maka ulihna kesia-sian, si la mperehken pasu-pasu man kalak si ndahikenca (bdk. Kuan-kuanen 24:30-31; Pengerana 3:22).

I bas minggu Peningkaten Ekonomi Jemaat enda, ipersingeti mulihi kita gelah erdahin alu ketutusen sue bagi si nikataken Firman Tuhan.

PENJELASEN BAHAN PUSTAKA SI BADIA

a.       Erdahin e me kap perentah Dibata

Bahan ogenta banci igolongken ku bas cerita asal-usul (etiological tale) kerna tantangna lit pendahin i doni enda. Turi-turin enda banci ikaitken ras akibat dosa si nilakoken manusia si pemena (Kej. 3:17), tapi lebih tepat adi iertiken sebage perentah Dibata guna manusia erdahin alu reh latihna, sabab perentah guna erdahin enggo ibereken manusia ope manusia ndabuh ku bas dosa (Kej. 2:15). Hal si menarik i bas Kej. 2:15, maka kata si ipake guna “ngusahai” (Ibr. abad), e me kap: erdahin, ersembah ras erbakti. Ertina, perentah Dibata guna erdahin ndatken nilai ndauh beliden asangken erdahin saja, erkiteken erdahin salah sada bentuk ibadah si nyata (kongkrit) sebage tanda pengataken bujur man Tuhan. Hal si menarik si deban, erdahin labo kutuken, erkiteken i bas ogenta enda si nikutuk labo pendahinna, tapi taneh si niusahaken manusia (Kej. 3:17), i je me si erbanca reh latihna manusia ngusahakenca erkiteken taneh e enggo ikutuk Dibata. I bas Kej. 2:1-2, Dibata mereken usihen, maka IA pe erdahin, bahkan Tuhan Jesus pe ngatakenca, maka Dibata tetap erdahin seh ngayak wari si sendah (Joh. 5:17). Alu bage, banci isimpulken i bas bahan pengogenta, maka erdahin e me kap perentah Dibata.

b.       Erdahin mperehken pasu-pasu (mendatangkan kesejahteraan)

Jer. 29:11, la banci ilepasken i bas Jer. ps. 29 secara keseluruhen. Nabi Jeremia nulisken surat  man kalak Israel i bas situasi pembuangen i Babilonia (th. 259 SM). Salah sada surat si nikirimken Jeremia man kalak Israel i bas pembuangen isina e me kap pendilo guna erdahin, e me kap erdahin guna nuhi kebutuhen kegeluhen (ay. 5) ras guna ndatken kesejahateraan man kalak si deban ras dirina sendiri (“sikap bangsa enda, kam pe ikut nge sikap,” ay. 7). Kai si nikataken Jeremia, situhuna dalam rangka makeken waktu alu mehuli ras produktif iherken nimai Dibata mbebasken bangsa enda i bas Babilon nari. Alu bage Jer. 29:11 banci ipahami sebage bagin si la banci terpisahken i bas pendilo guna erdahin, sebage palas kiniteken i bas erdahin. Sura-sura Dibata nandangi bangsa Israel e me kap guna mperehken pasu-pasu ras masa depan si ndauh terulin asangken si enggona. Alu palas kiniteken enda me maka bangsa Israel arus jadi pasu-pasu arah dahin si nidahinkenna, i ja pa pe ras i bas kondisi si uga pa pe, guna dirina sendiri ras kalak sekelewetna.

c.       Erdahin alu tutus arus jadi karakter (gaya hidup) kalak si tek

I bas bahan renungenta, 2 Tes. 3:6-12, i ja Rasul Paulus njemba perpulungen Tesalonika guna erdahin alu tutus bagi si enggo iteladanken Paulus ras teman-temanna rasul si deban i bas dahin pelayanenna. Kai si ipindoken Paulus enda, ilatarbelakangi alu litna perpulungen si kisat ras la nggit erdahin seh makana enggo jadi beban man perpulungen si deban. Engkai lit perpulungen si kisat erdahin? Lit telu sebabna. Si pemena lebe, lit sebagin perpulungen erpengakap kerehen Tuhan Jesus peduakaliken enggo ndeher e maka la perlu nari erdahin. Si peduaken, pengaruh gaya hidup jemaat mula-mula, i ja paksa si e kegeluhen perpulungen khususna kalak si lit nggit ndayaken si lit bas ia, e maka ibagikenna man kalak si musil (Perb. Rasul 2:44-45), e maka turah budaya “aji mumpung” si erbahanca kalak kisat erdahin, erkiteken enggo melala kalak bayak si mbagi-bagiken kerina kebutuhen. Si peteluken, lit ka perpulungen si karakterna lenga ipelimbarui walaupe enggo jadi kalak si tek, seh makana mbuen waktuna ipakena guna cikurak, mandangi kalak, rsd.-na, asangken ndahiken dahinna. Kata “arus” i bas ay. 7, nuduhken urgensitas kai si ipindoken Paulus nandangi perpulungen Tesalonika, ertina, erdahin alu tutus enggo arus jadi gaya hidup, biak, karakter  perpulungen kalak si tek man Kristus. Kai dasar Paulus maka bagem si iajarkenna?

Si pemena lebe, Rasul Paulus sendiri tek maka dahinna sebage rasul sekaligus tukang tenda (Perb. Rasul 18:2-3), e me kap pemere i bas Dibata nari (1 Kor. 15:10). Walaupe situhuna lit hakna guna ndatken penampat arah perpulungen labo e iandalkenna. Si peduaken, Paulus tek maka Dibata tetap denga erdahin guna kiniulin man kalak si erkeleng ate man baNa (Roma 8:23). Alu bage jelas, maka e me si ijemba Paulus erdahin alu tutus arah dahin si enggo ibereken Dibata man bana. Seh makana, dahin sebage tukang tenda ras bage pe sebage rasul idahikenna alu misi si jelas, e me kap: guna kemulian Tuhan (Kol. 3:17), sebage bukti i bas keleng ate (1 Kor. 16:14), guna keriahen perpulungen (2 Kor. 1:24), guna berbagi (Ef. 4:28), rsd.

PENGKENAINA

Lit sada semboyan “Ora et Labora” e me ertoto ras erdahin, lit ka sada kutipen si ngatakenca, “Bekerja tanpa berdoa sama dengan sombong, berdoa tanpa bekerja sama dengan kosong,” ertina, erdahinlah alu kesadaren maka dahin si nidahinken kita e me kap anugerah i bas Dibata nari. E maka, si pemena lebe, semakin jelas arah penjelasen kerna ogenta i datas, erdahin e labo terpisah ras ibadahta, erkiteken erdahin e perentah Dibata si arus ilakoken bagi kita erbakti man baNa. Adi sekalak erbakti ma biasana tutus ia, bage ka pe si arus ibahanna i bas pendahinna, kai pe pendahin si enggo ipercayaken Dibata man bana. Si peduaken, erkiteken pendahin e Dibata si merekenca, e maka erdahinlah alu bersukacita, seh makana tutus kita dahinken kai pe pendahinta, si kedungenna enggo pasti mperehken kiniulin, pasu-pasu (kesejahteraan) man keluarganta bage pe man sekelewetta. Si peteluken, mari si usih kai si enggo ilakoken Rasul Paulus seh makana jelas misi-nta erdahin.

Tema ngatakenca “Tutus erdahin e me biak anak Dibata,” payo kel tema-nta enda. Arah kerina penjelasen kerna bahan Pustaka si Badia i datas, tutus erdahin arus jadi biak (karakter, gaya hidup) anak Dibata, sabab Dibata sendiri pe seh ngayak gundari terus erdahin guna kiniulin kerina kalak si erkeleng ate man baNa. E maka, mari radu ras silumbaken kerina budaya si mendukung tema i bas wari si sendah, misalna : budaya mejingkat, budaya disiplin, budaya tutus, budaya bujur, rsd., segelah makana gelar Dibata ipermuliaken arah pendahinta.

Tahun enda, kita berjuang ningkatken kegeluhen sosial, budaya ras ekonomi. Si jelas, ekonomi labo banci meningkat adi la kin lebe ipekena budaya kerja. Adi kin tutus ateta, mbue kel peluang si banci sipakeken guna meningkatken ekonominta, tapi tetap alu palas si bujur, labo guna ndarami materi saja tanpa ibarengi mbiar man Dibata (misalna: bisnis online, UKM - Usaha Kecil Menengah, alu menciptaken souvenir khas Karo, wisata kuliner khas Karo, tambar tradisional Karo, rsd.). Gejapkenlah maka dahin e me kap perentah i bas Tuhan nari, anugerah i bas Tuhan, ras perehken pasu-pasu, alu bage tetap tutus kita erdahin.