Bimbingen Khotbah Minggu 28 Juni 2015

BIMBINGEN KHOTBAH MINGGU 28 JUNI 2015

MINGGU MERDANG

Pdt. Larena br. Sinuhadji (Nd. Reynard Tarigan)

Introitus :

“Bahanlah maka kalak si merdang dingenna tangis, banci rani alu ersurak” (Masmur 126:5)

Ogen :

Ulangen 33:13-17 (Tunggal)

Khotbah :

2 Korinti 9:6-15 (Tunggal)

Tema :

MERDANG I BAS GELAR TUHAN

Penjelasen Bahan Pustaka

Latar belakang si jadi renungenta i bas paksa enda e me kap kerna penjemba man perpulungen Korinti gelah ersuruh  ras meriah ukurna ikut muat bagin i bas nampati perpulungen Judea si sangana mengalami kesusahen (Rom. 15:25-27; 1 Kor. 16:1-4; 2 Kor. 8-9; Gal. 2:10). Perpulungen i Korinti (Propinsi Akaya) pernah nuriken ukurna guna nampati perpulungen i Judea ras ipujiken Paulus sikap perpulungen Korinti enda man perpulungen i Makedoni (ay. 2a-b). Janah kai si ikataken Paulus enda mpegegehi ras tole jemba perpulungen Makedoni guna akhirna ikut nampati (ay. 2c, “erkiteken ketutusenndu teremen i bas ia enggo keke ukurna”). E maka i jenda mulihi Paulus mpersingeti perpulungen Korinti guna merealisasiken sura-surana ndube. Sabab banci jadi mela kari iakap perpulungen Korinti dikenca reh Paulus ras perpulungen Makedoni, janah idapetina lenga sikap perpulungen Korinti. Je nari iutus Paulus Titus ras teman-temanna si deban leben ku Korinti guna mpersingeti ras nikapken perkuah ate (penampat) si enggo ipadankenna ndube. Persembahen si iberekenna bekas ukurna meriah dingen labo terpaksa. Labo soal nominal si penting, tapi ukur ersurah ras motivasi i bas nehken penampat.

Janah i jenda ipake Paulus gambaren kerna kalak nuan page (gandum) guna banci perpulungen e ersuruh ukurna ras sukarela i bas nehken persembahen rikut ras penampatna man kalak si sangana mengalami kesusahen. Maka kalak si sitik ngerdangken benih, sitik ka iperanina. Dingen kalak si melala ngerdangken benih, melala ka iperanina. Dingen Dibata si nikapken benih man kalak si merdang bage pe nakan si man pangan, dingen Dibata ka si nikapken benih si niperluken dingen IA ka si peturah benih e dingen mereken ulih erlipat ganda. Ilumbaken Paulus maka perpulungen e banci merdang, banci rani erkiteken perkuah ate Tuhan. Lit gegehna guna nampati erkiteken leben Tuhan si enggo masu-masu kegeluhen perpulungen. Janah i bas penampat si isehken perpulungen pe, labo e erbahanca kegeluhenna erkekurangen, sabab Dibata ngasup mereken man banta kasakai pemereNa alu sampur (ay. 8). Janah penampat si isehken perpulungen labo hanya ncukupi keperlun kalak Kristen si sangana lit i bas kekurangen, tapi pe mendorong perpulungen si enggo isampati gejapken perkuah ate Tuhan si erbahanca perpulugen pe ngataken bujur man Tuhan (ay. 13). Bahkan i jenda pe icidahken Paulus persadan si nteguh alu tetap saling tolong-menolong sebage kula ni Kristus subuk i tengah-tengah perpulungen kalak non-Jahudi (Makedoni, Korinti) ras kalak Jahudi (perpulungen i Judea). Bagi si ikateken Paulus i bas 1 Kor. 12:26, “Adi sada ringring suin, kerina ringring si deban pe ikut nggejapkenca. Janah adi sada ringring ipehaga, kerina ringring si deban ikut ermeriah”.

I bas ogenta, ngerana kerna pasu-pasu Musa man kerina suku Israel (12 suku), secara khusus man suku Jusuf.  I ja Tuhan si masu-masu taneh alu lau udan dingen alu lau si rehna i teruh taneh nari. Ipasu-pasu Tuhan peturah sinuan-sinuan e i bas kerina musim bekas isalsali matawari ras bulan. Bekas pemasu-masun Tuhan maka si enda kerina banci jadi.

Pengkenaina

Menaken tahun enda i tengah-tengah gerejanta enggo sibenaken erban sada minggu merdang (liturgi peteluken, liturgi 52 minggu). Kebaktin Minggu Merdang enda silakoken i bas minggu ke-4 kenca Trinitatis, e me i bas Minggu Biasa (ordinary time). Minggu-minggu biasa e me sada kesempaten man Gereja guna njawab kebutuhen si sue ras konteks i ja gerejanta nggeluh. Salah sada konteks GBKP e me teremen kegeluhen ngawan ni perpulungen gel-gel nari seh asa gundari si erkaiten ras nuan-nuan (agraris). Janah ndube i bas tradisi merdang, itenahken nge kalimbubu, sabab pasu-pasu kalimbubu (dibata ni idah), iarapken i bas kegeluhen enda, sabab kalimbubu sebage perwakilen dibata si idah. Kalimbubu me pemenana namaken page ku bas lebengen, e maka enggo banci page ierdangken. Enterem nge si pulung si itenahkan, e me kap kuh sangkep seh paksa ciger e maka man ras-ras.

Bage pe adi sikaitken ras pengogenta si pemena, maka Tuhan nge si masu-masu taneh alu udan dingen peturah sinuan-sinuan. I bas si e tetap kita nggejapken perbahanen Tuhan i bas kegeluhenta.

Adi sikaitken tradisi kalak Karo si ndekah ras kai si iteki kalak Jahudi i bas kinitekenna maka meramis buah sinuan-sinuan la tersirangken uga kehamatenna nandangi Dibata. Kehamaten e teridah arah kepatuhenna ndalanken pedah Dibata. Pasu-pasu Tuhan maler e me adi mehamat bangsaNa man alu ndalanken si ngena ateNa. Jiwa Minggu Merdang, e me kap ncidahken kehamaten man Dibata, si masu-masu seh maka banci merdang ras banci ka rani.

I bas tradisi kalak Karo ndube icidahken banta uga mehamatna nini-nininta man dibata si itekina, bage pe uga bangsaNa mehamat man Dibata ope ngerdangken benih. Enda me si iarapken tetap nggeluh i bas kegeluhenta, mehamat tetap man Tuhan i bas kerina dampar geluhta secara khusus menaken merdang, menaken erdahin rikutken dahinta si pelain-lain. Menaken erdahin, naik jabaten, sada kesempaten guna kita ngataken bujur man Dibata tandana kita mehamat man Tuhan. Janah i bas kita ndahiken dahinta tetap kita ndahikennca alu tutus ras bujur, tanda kehamatenta ka man Dibata.

I bas Tuhan enggo masu-masu kegeluhenta tetap kita ngasup ngataken bujur, terlebih i bas muat bagin nampati kalak si ngenanami kesusahen. Penampat sibereken kita alu ketulusen, labo erkiteken paksaan ras motivasi si benar. Arah bahan khotbahta, icidahken banta, maka i bas kita banci ikut nampati senina turangta, selain kita ncukupi keperlun geluhna, kita pe membangun kinitekenna guna tetap ia ngataken bujur man Tuhan, maka Dibata tetap mperdiateken kegeluhenna.