Bimbingen PJJ Tgl. 31 Mei - 6 Juni 2015

BIMBINGEN PJJ TGL. 31 MEI - 6 JUNI 2015

KERJA RANI

(PJJ KEPKEPEN I BAS GBKP RG. BATAM CENTRE)

(Pdt. Larena br. Sinuhadji)

Ogen :

Ulangen 16:9-12; 2 Korinti 9:6-9

Tema :

BABALAH PERSEMBAHEN KERJA RANINDU SI MEHULINA MAN TUHAN GUNA PEHAGA TUHAN DIBATANDU

Tujun :

Gelah ngawan ni perpulungen :

1. Nggejap maka pendahin ras kegeluhenna enggo ipasu-pasu Dibata

2. Meteh dingen ngangkai maka ulih kerja rani e ipakeken guna nampati dahin pelayanen i bas GBKP

Bena Kata

Adi ngerana kita kerna persembahen, subuk e persembahen persepuluhen, persembahen i bas tep-tep kebaktin, persembahen guna diakonia, rsd., kerinana persembahen arus ipersembahken si mehulina, erkiteken Dibatanta pe enggo leben mereken si mehulina man banta. Ras memang kerina si lit bas kita rehna i bas Dibatanta nari kita tading ngulihkenca sebage tanda pengataken bujurta man Tuhan.

I bas pelaksanan tahun 2014 terus ku pudi, maka Kerja Rani ilakoken i bas bulan Maret, alu alasen maka nai kalak Karo si mayoritas dahinna ku juma, radu ras nuan ras radu ka rani. Rani page biasana i bas bulan Pebruari, e maka gereja GBKP ngelakokenca kenca dung peranin i bas bulan Maret. Tahun enda iagendaken i bas bulan Juni, e me kap i bas Minggu Pentakosta entah pe kenca Minggu Pentakosta. Si enda silakoken erkiteken :1) Pelaksanaan Kerja Rani i bas Pustaka si Badia e me i bas wari pelimapuluhken (pentakosta). 2) Perpulungen GBKP la nai kerina perjuma, enggo erbage pendahin, ras si perjuma pe erbage wari nuan ras rani. 3) Sue ras Tahun Gerejawi adi i bas bulan Maret biasana Minggu-minggu Passion, minggu perenungen kerna kiniseran Tuhan Jesus Kristus. Alu bage min kerina perpulungen GBKP ikut muat bagin i bas kiniseran Kristus alu la erbahan kerja subuk i gereja entah pe i keluarga. Arah piga-piga alasen enda maka GBKP muat kesimpulan maka Kerja Rani ilakoken i bas Minggu Pentakosta entah kenca Minggu Pentakosta.

Penjelasen Bahan Pustaka Si Badia

I bas perikopta ras piga-piga teks Pustaka si Badia si ngerana kerna Kerja Rani (Kel. 22:29, 23:15-16, 34:22, Im. 23:15-20), maka Kerja Rani ilakoken i bas wari pelimapuluhken kenca panen gandum. Masa raya buah pertama (the first fruit) entah pentakosta (shavout). Perayaan enda awalna pesta panen, ibahan makna si mbaru arah pendahin Kesah si Badia, jadi wari raya pantekna gereja bagi tertulis i bas Perbahanen Rasul 2. Setiap keluarga maba persembahenna alu ukur meriah guna pehaga Tuhan Dibata. Buena rikutken pasu-pasu si ibereken Tuhan man banta sekalak-sekalak. Ertina, setiap pribadi (keluarga) pasti la banci ipebali, sebab pasu-pasu Dibata pe berbeda-beda man banta. Si penting palas i bas kita nehken persembahen i bas Kerja Rani e me kap nggejapken pemeliharaan ras pemasu-masun Tuhan i bas geluhta. Maka Tuhan si enggo masu-masu kegeluhenta rikutken usaha ras pendahinta, secara khusus Tuhan masu-masu page/gandum si enggo sisuan (kontkes bangsa Israel ras kalak Karo si idaerah pertanian).

Janah adi sibandingken ras Bil. 28:26-31, maka i je pe icidahken proses pelaksanaan Kerja Rani. Asum Kerja Rani e iendesken perpulungen persembahen gandum si mbaru iperanina janah enda ilakoken i bas sada kebaktin ras la banci kai pe idahiken. Persembahen-persembahen si enggo iaturken (2 jenggi lembu si nguda denga, sada bajar biri-biri, 7 anak biri-biri bajarna umur 1 tahun, persembahen buah gandum si payo i bas tepung nari icampur ras minak saitun, sada bajar kambing jadi persembahen pengalemi dosa ras persembahen anggur jadi tambahan persembahen tutungen). Intina, kerina si nipersembahken e, la lit si man pandangen (si terbaik) ras ngena iakap Tuhan.

Adi sipepayo kebaktin i bas Kerja Rani e, maka lit dua hal penting si perlu iperdiateken:

• Mpehaga ras mpermuliaken Tuhan arah nehken persembahen si jadi pengataken bujur ras buah kininiteken.
• Mpeteguhi persadan bangsa e, sabab pulung alu meriah ukur radu ras anak-anak, suruh-suruhen, kalak Lewi, petandang bage pe anak melumang ras diberu mbalu-mbalu.

Perenungen

Gerejanta setiap setahun sekali mprogamken kegiaten Kerja Rani erkiteken nginget Tuhan si mereken keselamaten man banta, itebusi Tuhan dosa-dosanta ras seh asa gundari Tuhan tetap memeliharaken geluhta arah pendahinta si pelain-lain (perjuma, supir, perbinaga, karyawan, rsd.). Tentu patut kita ngataken bujur man Tuhan, la perlu nari terlalu rumit persembahenta bali ras si nilakoken bangsa Israel, sabab Yesus Kristus, Anak domba Allah enggo mpersembahken diriNa guna nebusi dosa-dosanta. Tentuna i bas si e la ka banci kita meros, tetap si terbaik sibereken rikutken pasu-pasu si enggo ibereken Tuhan man banta. Paulus i bas suratna man Perp. Korinti mpersingetisa i bas nehken persembahen man Tuhan, sekalak-sekalak iberekennalah sue ras si enggo itetapkenna i bas ukurna; ola alu pusuh jungut-jungut entah pe bagi si terpaksa, sabab Dibata ngkelengi kalak si mere alu ukur meriah. Keriahen ukurta mere man Tuhan i bas persembahen Kerja Rani erpalasken pasu-pasu si enggo ibereken Dibata man banta sekalak-sekalak. Tetap sipehaga Tuhan, sabab IA ngasup mereken man banta kasakai pemereNa alu sampur. Sue ras padan Jesus i bas Matius 6:33, “Tapi si pentingna kal daramilah lebe kinirajanNa, janah dalankelah si ngena ateNa maka icukupiNa kai si perlu man bandu.” Kai si nipadankenNa, ya ras amin. Nai, gundari ras seh rasa lalap tetap ipasu-pasu Tuhan kegeluhenta.

La pe kita perjuma, pelain-lain enggo dahinta, maka  i bas perayaan Kerja Rani enda, tetap siinget identitasta sebage kalak Karo si umumna sitading i Tanah Karo perjuma, ngingetken kita guna mpertahanken Tanah Karo sebage daerah pertanian ras kalak GBKP la ndayaken tanehna guna mpertahanken identitasta si erat berkaiten ras tanah. La pe kita perjuma, tapi nuansa kerja (pesta meriah ukur) tetap banci sicidahken tupung kita ngelakoken Kerja Rani.

Rikutken Tata Gerejanta (Bab XI, Pasal 3), maka salah sada pos keuangen jemaat guna kerina kegiaten persekutuan, kesaksian, diakonia ras biaya operasional gerejanta arah Kerja Rani. 50% tading bas runggun ras 50% setor ku Moderamen. Alu kita nehken persembahenta termasuk Kerja Rani kita mendukung kerina kegiaten si iaturken gerejanta sekaligus ndalanken perpadanenta tupung kita ingawanken maka kita nggit nanggung tanggungenta i bas GBKP enda. Sitotoken gelah perdalanen Kerja Rani bas runggunta erdalen alu mehuli, Tuhan ipehaga ras imuliaken arah persembahenta.